38
Yuda yahge Tamar
1 Hauh uhlyis Yuda gas nyah vmang vnoeuh moq yah gang las Hira ge Adulam mau mas dius dvyuk jyank mas wvng nyeis.
2 Houmha Shua ge Khanan dius dvyuk dah lonyi lyis Yuda xauhgoh las yoeus toh.
3 Housoeh hauh vmesbih ung mha loshang bos las yukgis lo khoeu. Nyang lyis Era nyhink.
4 Tsai, nyang ung mha loshang bos las yukgis lo khoeu. Nyang lyis Onan nyhink.
5 Nyang yukgis lo dvyuk doms khoeu lha Shela nyhink. Hauh loshang khoeu uhlyis Yuda gas Kezip mas nyeis.
6 Gvshih Yuda gas nyah loxeih Era lyis yhensain nyhiq yoeus dyei; nyah nyings Tamar nghuot.
7 Yuda dah loxeih Era gas Yhensain xikkhonh mas ma shop las Yhensain yah nyang lyis shei nhang.
8 Hauh thang lhyi Yuda gas Onan lyis, Nah vmang dah chauhmuh wvng shoeuh aq; nah vmang vnyau vshih tsoq dyei aq, ge.
9 Onan gas lo bos lyis nyah vnyau vshih ma ge das zis seq las, vmang dah vnyau vshih ma mes tsoq dyei yvmvyah vmang dah chauhmuh jyank mas wvng yhet khanghmuh nyau lyis tsoh mas pa-i huot tyamp.
10 Nyang kuot cho Yhensain xikkhonh mas ma shop yvmvyah nyang lyis eq shei nhang.
11 Hauh uhlyis Yuda gas nyah doeusmuh Tamar lyis, Ngah lo Shela kuh shoq nvng chauhmuh duot las nah uwus yhen mha loh nyeis aq, ge: khasoeh ge lyis Shela eq nyah vmang aiq yuk teh ma shei bas jungh ge las nghuot. Tamar eq nyah uwus yhen mha loh nyeis.
12 Gvshih nyangh nyangh lo thang lhyi Shua lonyi, Yuda yhensain nyhiq eq shei. Yuda eq kuk zis nhaiq dainh las nyah dyenschangh Adulam dius Hira yah dvgeh nyah yvng mauh gom das xiklyis Timna pheh loh.
13 Hauh uhlyis dius dvyuk yah Tamar lyis, nah nyimuh gas yvng mauh gom das zis Timna pheh loh das, ge taiq kyoh.
14 Housoeh las Tamar gas chauhmuh thau khyuot tyamp las nyah nyoqnho mha nyoq nghop nghop, gungs mas eq misseh gangh lho lha, Timna pheh bangh loh cho Enaim wus khomh mas loh tsung toh. Khasoeh ge lyis Shela kuh goeus laus eq nyang lyis ma yoeus nhang zis nyang seq.
15 Hauh vmesbih lyis Yuda nyvng lyis, nyah nyoqnho nghop toh yvmvyah nyang lyis nghe nyhiq ge nghamh.
16 Housoeh nyang choyvm pheh nyah jyank mas loh las, Ngos nah jyank mas wvng bah, ge. Hauh vmesbih gas nyah doeusmuh nghuot zis nyang ma seq.
Hauh vmesbih gas, Nvng ngah jyank mas wvng das lyis nvng ngos lyis cha dyei das, ge.
17 Yuda gas, Ngah beq phung mha dah beq lo dvdoeu dyei kat das, ge.
Vmesbih gas, Hauh zis ma dyei kat shih lyis dvja ja vtank toh das lah, ge.
18 Yuda gas, Cha tank toh nhang mes lah, ge.
Vmesbih gas, Nah kyihau yahge twih eq, lhamloq eq dyei toh aq, ge. Housoeh nyang tank toh las nyah jyank mas wvng. Housoeh vmesbih eq nyah gvng mas ung mha loshang bos los.
19 Hauh thang lhyi nyang yhen pheh loh zis yah nyoq nghop yoeus tyamp lho lha chauhmuh thau doms wuot chi.
20 Yuda gas hauh vmesbih jyank mas tank toh dah vyhang khyuot das zis nyah dyenschangh Adulam dius lyis yah beqlo dvdoeu dyei kat: Nyang gas hauh vmesbih lyis ma xo nyvng.
21 Nyang gas houmha bang lyis, Enaim choyvm mas tsung toh dah nghe nyhiq khalhye nyeis, ge nyei.
Nyamoq gas, Heimha nghe nyhiq ma nyeis, ge tsain toeuh.
22 Nyang gas Yuda jyank tauh loh las, Ngos hauh vmesbih lyis ma xo nyvng. Houmha bang eq, Heimha nghe nyhiq ma nyeis, tsain ge.
23 Hauh uhlyis Yuda gas, Ngos nvng lyis hauh beqlo dyei kat goeus, nvng nyang lyis xo ma nyvng lo zis gas, yang xoq ma phuh das xiklyis hauh vyhang ka nyang jyah yoeus tyamp goeus jungh, ge.
24 Lhamhmuh somh khyvp ko lai thang lhyi Yuda lyis tsain taiq kyoh zis gas, Nah doeusmuh Tamar gas nghe nyhiq duot yenh las gvshih ung mha loshang bos goeus, ge.
Yuda gas, Nyang lyis shwih thuq los geh, nyi yah ngheq sat goh, ge.
25 Nyang lyis shwih thuq goeus ya nyimuh jyank mas hauh vyhang huon lha, Haih vyhang sain dah gvng mas, ngah ung mha loshang bos: yoeuh aq, haih khying eq cheq dah kyihau yahge lhamloq gas hank zis nghuot lah, ge.
26 Yuda hauh zis lyis seq goeus las, nyang ngah thoq lyis zes dan; nyang lyis ngah lo Shela ma dyei las nghuot, ge rhen. Hauh thang lhyi ka nyang yah ma doms zomh lo.
27 Lo khoeu das shishenh dyingh lyis, yoeuh aq, nyah ung mha yukgis lozoms bos.
28 Lo khoeu nyeis lyis loshang dvyuk dah loq yhonh kat las, bos yoeuh khoeu dyei soeu ka loshang loq mas khying nes twih las, Haih soeu shih thuq los das, ge.
29 Nghuot laus eq hauh loq doms she lhyi yoeuh aq, vmang yuk thuq los. Housoeh las bos yoeuh khoeu soeu ka, Nvng cho heisoeh yoh thwang thuq los, ge nyang lyis Pere nyhink.
30 Hauh thang lhyi loq mas khying nes wuot dah vnoeuh yuk thuq los. Nyah nyings Zera nghuot.