20
Abraham yahge Abimelek
Gvshih Abraham gas hou mhayah mautyi pheh tyungh loh las Kadesh yahge Shur jo mas nyeis lho lha Gerar wus mas khau nyeis. Hauh uhlyis Abraham gas nyah yhensain nyhiq gas nyah nhamhmuh dvnghuot ge taiq. Housoeh las Gerar hwankti Abimelek gas dius nhang lha Sara lyis yoeus toh.Ref 20.2: Vpm 12.13, 26.7 Nghuot laus eq Mangso ka nyenh lyis Abimelek jyank mas yhetmoq masyah los taiq zis gas, Nvng haih vmesbih lyis yoeus yvmvyah nvng shei soeu nghuot. Nyang gas phoengh wvng goeus soeu nghuot, ge.
Abimelek gas Sara yah ma zomh shih las, Yhensain eh, Dan dah vnyau lyis nvng sat das lah. Nyang ngah nhamhmuh nghuot ge, Abraham nyang ngos lyis dvtaiq ma nghuot lhyeh? Vmesbih nyang eq, Ngah mungs nghuot, ge taiq. Housoeh ngos ma cu oen dah shangkyei ehnyet yah dvkuot, ge.
Mangso ka yhetmoq masyah nyang lyis, Nghuot goeus, nvng ma cu dah nhaiqlom yah haih zis kuot yvlyis ngos seq. Nvng ngos lyis ma cu bas jungh oen ngos nvng lyis tomp. Housoeh las ngos nvng lyis nyang yah zomh das toeuh ma dyei. Gvshih nyah yhensain nyhiq nyang lyis doms dyei aq. Nyang gas Lvpe nghuot las nyang nah xiklyis shvmanh dung dyei lyis nvng kang dwis das. Nvng ma doms dyei lyis gas nvng eq, nvng yah sen ya sen bang eq jyoengh shei das zis seq toh aq, ge.
Abimelek gas noq yah toq las nyah jyeidwis jens dvnganh lyis khi huom lha hauh cho dvnganh taiq kyoh. Nyamoq eq svsoh gyuk nyeis. Abimelek gas Abraham lyis eq khi lha, Nvng ngamoq lyis cha kuot? Ngos nvng lyis cha shuot gvng mas ngos yahge ngah munghdan thoq mas haih yaunos zainsmuh she los lah, ma gis kuot dah muh nvng ngos lyis kuot lhyeh? 10 Abimelek gas, Nvng chah gvng mas housoeh kuot lah, ge Abraham lyis nyei.
11 Abraham gas, Heimha Mangso lhyi gyuk bang hank ma nyeis las ngah yhensain nyhiq gvng mas ngos lyis sat das oen nghamh yvmvyah dvnghuot. 12 Hauh thoq lyis nyang gas ngah nhamhmuh sain eq nghuot, ngah uwus dah lonyi nghuot, ngah ungwes lonyi gas ma nghuot. Ngos nyang lyis phoengh hwank toh. 13 Mangso ngos lyis ngah uwus yhen mhayah thuq loh nhang uhlyis, ngos Sara lyis taiq toh zis gas, Nvng ngos lyis nhaiqnyen zis yah kuot das jyehjuh gas, Yah zomh jweh ya jweh yvmas ngos lyis, Ngah mungs nghuot oen aq, ge.
14 Hauh uhlyis Abimelek gas Abraham lyis nyah yhensain nyhiq Sara tauh dyei las, yvng eq, noeu eq, jyeidwis vbusbih vmesbih jens eq dyei kat. 15 Housoeh Abimelek taiq zis gas, Yoeuh aq, ngah maunyeis nah xikkhonh mas joq, nvng nyeis mes yvmas nyeis aq, ge. 16 Sara lyis eq, Yoeuh aq, ngos nah mungs lyis ngwis kyvp dvkhyoengh dyei goeus. Houka nvng yah nyeis bang dvnganhmoq dah xikkhonh mas eq, gohyuk xikkhonh mas eq ngos nvng lyis shauq dah whot nghuot bas jungh ge, nyang jyauh mhoq zis xauh.
17 Abraham eq Mangso lhyi shvmanh dung dyei las, Mangso ka Abimelek yahge nyah yhensain nyhiq lyis eq, nyah jyeidwis vmesbih jens lyis eq gis los nhang lha nyamoq loshang tsain bos. 18 Khasoeh ge lyis Abraham dah yhensain nyhiq Sara gvng mas Yhensain ka Abimelek yhenbang vmesbih jens loshang ma dap shoq ung nyheih toh.