7
Yhensain Moshe lhyi taiq zis gas, Ngos nvng lyis Pharao thoq mas Mangso teh toh las, nah vmang Aron gas nyang lyis nah lvpe teh taiq das. Ngos nvng lyis tying toh zis dvnganh Aron lyis taiq aq, nyang gas, Israel jens lyis Pharao jyank masyah nhang kat das cho Pharao lyis taiq das. Ngos eq Pharao nhaiqlom lyis than nhang lha Egutu mas ngah vlho yahge mauh loqmuh nyo nhang das. Pharao gas nah zomh dang ma gyo dyei das las, ngos eq Egutu mau lyis than dah yaudyei zis yah, ngah dius nyau Israel jens lyis Egutu masyah shwih thuq yoeus das.Ref 7.3: Lgy 7.36 Housoeh ngah loq Egutu mau thoq mas toeu lha Israel lyis nyamoq masyah shwih thuq los uhlyis ngos Yhensain nghuot zis Egutu bang seq das, ge. Moshe yahge Aron eq Yhensain nyah vzomh lyis taiq toh khyvlyis kuot. Nyah zomh Pharao jyank loh taiq uhlyis Moshe ka xetci zvn, Aron gas xetci somh zvn bos goeus.
Aron dah Lhamloq
Yhensain Moshe yahge Aron lyis taiq zis gas, Pharao gas nah zomh lyis, Nah zomh yoh kuot dah yomsoq muh chixoeuq yoeuh geh, ge lyis, Aron lyis, Nah lhamloq Pharao xikkhonh mas doeuh toh aq, oen taiq aq. Hauh lhamloq gas lhangnyis bweh das, ge. 10 Moshe yahge Aron eq Pharao jyank loh las Yhensain vmingh vgus kuot. Aron gas nyah lhamloq lyis Pharao yahge nyah jyeidwis jens xikkhonh mas doeuh toh las, houka lhangnyis bweh los. 11 Hauh uhlyis Pharao gas nyah joeui bos bang yahge mandan svra moq lyis khi yoeus las Egutu mau mas dah hweq kat bang gas nyamoq mandan yah vgus kuot. 12 Nyamoq dah lhamloq doeuh toh lyis houka lhangnyis tsain bweh las, Aron dah lhamloq gas nyamoq dah lhamloq lyis nyhau tyamp. 13  Yhensain taiq zis yah dvyhangteh Pharao dah nhaiqlom than lha nyah zomh dang ma gyo dyei.
Egutu lyis Suih yah Joeng
Suih
14 Hauh thang lhyi Yhensain Moshe lhyi taiq zis gas, Pharao dah nhaiqlom than joq las dius jens lyis kat kat das zis ma gyo. 15 Nvpyo Pharao jyank mas loh aq. Nyang hau Nile lvng mas lyih das; nvng, nyang yah xauhgoh das zis nvng hau nyeismhung mha e yap aq. Nah loq mas hau lhangnyis bweh dah lhamloq eq chi toh aq. 16 Nvng, nyang lyis heisoeh oen aq: Mhanhdyvp mas ngos lyis loh yoh paiq bas jungh ngah dius jens lyis nhang kat aq, ge Hebre jens dah Yhensain Mangso ka ngos lyis nah jyank mas nhang kat; nghuot laus eq gvshih jweh shoq nvng ma gyo. 17 Gvshih Yhensain taiq zis gas, Ngos Yhensain nghuot yvlyis haih cho mhayah nvng yoh seq das; Yoeuh aq, ngah lhamloq yah haih jeis lyis lyuk las hauh jeis gas suih duot das.Ref 7.17: Nyoq 16.4 18 Jeis mas bos dah oengdoq eq dye shei das. Jeis eq nvm tyamp das; Egutu bang eq hauh jeis ma yoh shuk das, ge.
19 Hauh thang lhyi Yhensain Moshe lhyi taiq zis gas, Aron lyis nah lhamloq yoeus las Egutu mau mas dah jeis ge, jeismuh lvng jeislo lvng thomh kuh thomh lo thoq mas nah loq toeu aq; hau dvnganh gas suih bweh bas jungh. Housoeh saiq lang mas eq, luk yam mas eq, Egutu mau gonh suih bweh das, oen aq, ge.
20 Moshe yahge Aron gas Yhensain dah vmingh vgus kuot las, nyang nyah lhamloq yah Pharao yahge nyah jyeidwis jens xikkhonh mas jeislvng lyis lyuk las jeis dvlvng gonh suih kyingh nghuot joq. 21 Jeis mas oeng eq dvnganh shei lha hauh jeis nvm joq yvmvyah Egutu bang hauh jeis ma yoh shuk, Egutu dvmau gonh suih kyingh nghuot joq. 22 Egutu hweq kat bang eq nyamoq dah hweq yah housoeh tsain kuot. Housoeh Yhensain taiq zis yah dvyhangteh Pharao dah nhaiqlom than nyeis las nyah zomh dang ma gyo dyei. 23 Pharao gas nyah yhen pheh tauh loh las hauh cho lhyi ma nghamh dyei. 24 Egutu dius dvnganh gas jeislvng mas jeis ma yoh shuk las, jeis xauh shuk das xiklyis jeislvng yvm chank yah tsain doeu.
25  Yhensain hauh jeis lyis lyuk las suih bweh nhang thang lhyi nyhet nyeih lai shoq mus joq.