6
1 Yhensain Moshe lhyi taiq zis gas, Ngos Pharao lyis khasoeh kuot das zis gas, nvng gvshih nyvng das. Ngah yombos loq yah nyang nyamoq lyis nhang kat das, nghuot goeus, ngah yombos loq yah nyang nyamoq lyis nyah mau masyah khat thuq das, ge.
Mangso Moshe lhyi Lui
2 Mangso Moshe lhyi taiq zis gas, Ngos gas Yhensain nghuot.Ref 6.2-3: Vpm 17.1, 28.3, 35.11; Dyu 3.13-15
3 Ngos gas Abraham, Isak, Yakop moq jyank mas yomzains Mangso khyvlyis thuq xoeuq. Nghuot laus eq ngah nyings Yhensain nghuot zis ngos nyamoq lyis ma chixoeuq.
4 Nyamoq boengh duot las khau nyeis dah Khanan mau gas nyamoq lyis dyei das oen ngos ngah thanghchvp toh las dangthoengh dyei toh.
5 Egutu bang yah jons kuot nyeis, Israel vnyau dah noskyingh dang eq ngos xauhgyo goeus, ngah thanghchvp dangthoengh eq ngos soh nyeis.
6 Housoeh las Israel vnyau lyis heisoeh taiq aq: Ngos Yhensain nghuot. Ngos namoq lyis Egutu bang dah jons duot nyeis masyah khyuot las lhuiq kat das. Ngah yombos loq toeu nyamoq lyis soetuon zis yah namoq lyis khyuot yoeus das.
7 Ngos namoq lyis ngah dius nyau kuot las ngos eq namoq dah Mangso duot das. Ngos gas namoq lyis Egutu bang dah jons duot masyah khyuot yoeus soeu, namoq dah Yhensain namoq seq das.
8 Abraham, Isak, Yakop moq lyis dyei das oen maukhi toh dah mau mas ngos namoq lyis shwih loh las vso vlho xiklyis dyei das: Ngos Yhensain nghuot, ge.
9 Moshe eq Israel jens lyis vgus taiq. Nghuot laus eq nyamoq dah ehnyet nyungdaus zis yahge jonsmus gvng mas Moshe dang ma gyo dyei.
10 Hauh thang lhyi Yhensain Moshe lhyi taiq zis gas,
11 Egutu hwankti Pharao gas nyah mau mas dah Israel jens lyis nhang kat bas jungh nyang lyis loh taiq aq, ge.
12 Nghuot laus eq Moshe ka Yhensain xikkhonh mas, Israel jens yangh ngah dang ma gyo zis, Ngos dang taiq ma duot soeu taiq dang lyis Pharao khasoeh gyo dyei das, ge.
13 Yhensain Moshe Yahge Aron lyis taiq zis gas, Israel jens lyis Egutu masyah shwih yoeus das cho Israel jens lyis eq, Egutu hwankti Pharao lyis eq taiq geh.
Moshe yahge Aron Yhenbang
14 Heika nyah zomh phauh thyeih moq dah yhenbang nghuot. Israel dah loxeih Ruben dah loloeu jens gas, Hanok, Palu, Hezron, Kharmi. Heika Ruben yhenbang dah phauh thyeih moq nghuot.
15 Simon loloeu jens khyuk yuk moq gas, Yemuel, Yamin, Ohad, Yakin, Zohar yahge Khanan lonyi khomh mas Shaul nghuot. Nyamoq gas haih vkoq dah phauh thyeih moq nghuot.
16 Lewi loloeu jens somh yuk moq gas Gershon, Kohat yahge Merari nghuot. Nyamoq gas Lewi vkoq dah phauh thyeih moq nghuot. Lewi nyenhkyi ka dvxo somhci nyhet zvn nghuot.Ref 6:16-19: Dyu 3:17-20, 26:57-58; 1Ss 6:16-19
17 Gershon dah loloeu tang ka Libni yahge Shimei nghuot. Nyamoq dah dius yaus gyung nyoshoq nghuot.
18 Kohat loloeu jens nyei yuk gas Amram, Izhar, Hebron, Uziel nghuot. Kohat nyenhkyi ka dvxo somhci somh zvn nghuot.
19 Merari dah loloeu tang ka Mali yahge Mushi nghuot: Heika Lewi vkoq mas dah dius yaus gyung nghuot.
20 Amram gas nyah uwus dah nhamhmuh Yokhebed lyis phoengh hwank las Aron yahge Moshe bos. Amram dah nyenhkyi ka dvxo somhci nyhet zvn nghuot.
21 Izhar loloeu jens somh yuk gas Kora, Naphek, yahge Zikhri nghuot.
22 Uziel loloeu jens somh yuk gas Mishael, Elzaphan yahge Sithri nghuot.
23 Aron gas Aminadab lonyi, Nashon nhamhmuh Elisheba lyis phoengh hwank las nyang gas Nada, Abihu, Eleaza, Ithama moq khoeu dyei.
24 Kora loloeu jens somh yuk gas Asir, Elkana, Abiasap nghuot: Heika Kora vhuh nghuot.
25 Aron dah loloeu Eleaza gas Putiel lonyi dvyuk yoeus las Phineha lyis khoeu: Haih goeu gas Lewi yhenbang nyang koq nyang dah uwus vpom nghuot.
26 Aron yahge Moshe ka Israel jens lyis Egutu masyah shwih thuq geh ge Yhensain taiq dang xauh yoeus vzomh nghuot.
27 Nyah aiq yuk gas Israel jens lyis Egutu masyah shwih yoeus das zis Egutu hwankti Pharao lyis sang vzomh eq nghuot.
Yhensain Vmingh
28 Egutu mas Yhensain ka Moshe lhyi khi taiq buisnyeis lyis eq,
29 Ngos gas Yhensain nghuot. Ngos nvng lyis taiq toh cho dvnganh Egutu hwankti Pharao lyis taiq aq, ge.
30 Nghuot laus eq Moshe Yhensain xikkhonh mas taiq zis gas, Ngos gas dang taiq ma duot las Pharao ngah dang khasoeh gyo dyei das, ge.