37
Thanghchvp Kwi Tsuk
(Dyu 25:10-22)
Bezale gas akhesha saiq yah xing choeu loq 45 shih, khonh choeu loq 27 shih, nyhang choeu loq 27 shih bos dah kwi dvlom tsuk. Hauh yvlyis vkhau vthoq xing gyingh yah kyop. Hauh vthoq vzam chank xing yah khomp toh. Xing khwank nyei koeuq kuot las hauh kwi khyei nyei koeuq mas dvshot aiq koeuq koeuq tap toh. Akhesha saiq yah tanzoe tsain kuot las hauh yvlyis xing yah kyop. Hau Thanghchvp Kwi dvng das xiklyis kwi dah thyishot haqshot mas dah vkhwank mas tanzoe jauh toh. Nyang gas xing choeu loq 45 shih, khonh choeu loq 27 shih bos dah kwi nghop lyis eq xing gyingh yah kuot. Nyang gas Kherubim lho aiq koeuq lyis yoh bat shonh dah xing yah kwi nghop 2 thang gonh mas dvthang mha dvlho lho kuot tap. Housoeh nyang hauh zis lyis kwi nghop yah dvkoeuq teh kuot. Hau Kherubim aiq koeuq gas nyoqnho changh xoeu goh toh. Houmha nyamoq dungs tsain tyo lha vnghop lyis nghop toh.
Phudyei Ohlhyoq Kihgus Kuot
(Dyu 25:23-30)
10 Tsai nyang akhesha saiq yah xing choeu loq 36 shih, khonh choeu loq 18 shih, nyhang choeu loq 27 shih bos dah kihgus dvkoeuq kuot. 11 Nyang hauh yvlyis xing gyingh yah kyop las, vyvm chank xing yah dungh. 12 Nyang gas hauh kihgus mas khonh choeu loq 3 shih bos dah vzam lyis kuot tap las xing yah hauh vzam lyis dungh. 13 Nyang dvng das nyhenshang xing yah vkhwank nyei koeuq kuot las, nyah vthunk nyei koeuq mas hau vkhwank tsain tap toh. 14 Hau kihgus dvng das xiklyis vzam mas vkhwank tsain tap las houka tanzoe jauh gus tsain nghuot. 15 Kihgus dvng das tanzoe eq akhesha saiq yah kuot las xing yah tsain kyop. 16 Hau kihgus xiklyis bvn lywas, zvbiq jyungshuk xiklyis bvn, kom, jywang yahge khuq lyis xing gyingh yah kuot.
Nyituonh Gus Kuot
(Dyu 25:31-40)
17 Nyang xing gyingh yah nyituonh gus dvkoeuq kuot. Hauh vkhyei, vyau, shunk dah ban, vlhaink yahge vbuh lyis dvzwvng kyingh kuot las bat.
18 Hauh vzwvng mas dvshot somh ko ko mulas khyuk ko thuq joq. 19 Nyituonh gus vko khyuk koeuq mas dvko dvko mha batan buh buh teh vlhaink somh koeuq, vbuh somh koeuq dvgeh shunk toh. 20 Hau nyituonh gus vgungs vyau mas eq batan buh buh teh vlhaink nyei koeuq, vbuh nyei koeuq shunk toh. 21 Vko somh zomh mas dvzomh dah o mha vlhaink dvkoeuq koeuq bos. 22 Hauh vlhaink, vko yahge nyituonh gus lyis xing gyingh yah dvkoeuq teh bat toh. 23 Nyang nyituonh gus xiklyis nyitoengh nyhet koeuq kuot las nyvp yahge bvnlywas eq xing gyingh yah kuot. 24 Nyang hau nyituonh gus yahge nyah kyahsoe dvnganh lyis xing gyingh 75 paung yah kuot.
Xangh Phon Kuot
(Dyu 30:1-5)
25 Tsai nyang xangh ngheq das xiklyis phon eq akhesha saiq yah kuot; hauh xing choeu loq 18 shih, khonh choeu loq 18 shih, mulas soefuqthunk kuot: nyhang choeu ka loq 36 shih nghuot: nyah khyau lhyi eq houyah dvkoeuq teh kuot. 26 Hau nyah vthyoh, vyvm yvmlhaink yah eq, khyau mha eq xing gyingh yah tsain kyop las vyvm chank xing yah khop toh. 27 Hauh nyhenshang eq vkhwank aiq koeuq kuot las xing shauq toh dah vjeis mas phon thyishot haqshot vthunk mas tap toh. Houka dvng das tanzoe jauh gus nghuot. 28 Tanzoe dvzomh lyis akhesha saiq yah kuot las xing yah kyop.
Juot Coeu yahge Xangh Kuot
(Dyu 30:22-38)
29 Xangh seq phung soeu phung khyvlyis, juot das gyingshang coeu eq, xangh gyingh lyis eq phung.Ref 37.29: Dyu 30.22-38