34
Moshe Luklhywaq Saiq Kuot
(Lyi 10:1-5)
Yhensain Moshe lhyi taiq zis gas, Xik lyis dah luk lhywaq teh zis aiq koeuq bat aq: ngos hauh luklhywaq mas xik lyis nvng doeuh khwih yvmas lhaih toh vgus doms lhaih das. Nvpsangh noq yah Sina boms mas doq las, boms thyoh mas nvng ngah xikkhonh mas yap das xiklyis cicont kuot aq. Nvng yah hank eq ma gis doq los; hau boms khathunk mas eq hank lyis eq vloh nhang: yvng shvbeq, gaunyhauq phung eq hauh boms nvm mas chungh vtsoh nhang, ge. Moshe ka xik lyis dah luk teh zis aiq lhywaq bat chi, noq yah toq las, Yhensain nyang lyis taiq toh zis yah dvyhangteh, hau luk aiq lhywaq chi lha Sina boms mas doq loh.
Yhensain eq jyommauh yah gyoh los, houmha Moshe yah dvgeh yap las Yhensain ge dah nyah gyingshang nyings lyis taiq hoeuh. Yhensain Moshe xikkhonh mas lai loh las taiq hoeuh zis gas, Ngos gas Yhensain nghuot, Ngos gas Yhensain nghuot, nhaiqnyen, jyehjuh yah dyingh dah Mangso nghuot. Ngos gas nhaiqlom xing, jyetdap, jyoeng cho yah dyingh.Ref 34.6-7: Dyu 20.5-6; Gyu 14.18; Lyi 5.9-10, 7.9-10 Ngos dius khyoenghsoe lhyi nhaiqnyen cho chixoeuq las lyi ma chi cho, lyi lhyweq cho yahge yaunos lhyi khyuot dyei. Nghuot laus eq Ngos yaunos lyis ma joeng ma toh. Ngos lo jens lyis somh nyei caiq jweh shoq nyamoq dah uwus moq dah yaunos joeng, ge.
Moshe eq nyeisjvng mas lvnyap dupaiq. Nyang taiq, Yhensain eh, ngos nah xikkhonh mas nyoqnho yoh lyis gas, nvng Yhensain ngamoq mas bos los aq. Haih bang nhaiqlom than vnyau nghuot laus eq, ngamoq dah lyi ma chi cho yahge ngamoq dah yaunos lyis khyuot dyei las ngamoq lyis nah vso xiklyis shwih toh aq, ge.
Thanghchvp doms Soq
(Dyu 23:14-19; Lyi 7:1-5; 16:1-17)
10  Yhensain taiq, nghuot goeus, haih zis gas ngos nvng yah toh das thanghchvp nghuot: nyeisjvng mungkvn dvnganh mas khamha eq, nghuot ya dius nyau khanyau mas eq ma kuot ku dah mauhphoh muh lyis ngos kuot das. Ngos nvng masyah chixoeuq das cho ka gyukphoh cho nghuot das yvmvyah, nvng yah dvgeh nyeis dah dius nyau gas, Yhensain dah yomsoq lyis nyvng das. 11 Nah yvwons gas, khvnyhik ngos nvng lyis taiq toh dang dvnganh chank kuot aq: housoeh lyis, nah xik mas dah Amori, Khanan, Hiti, Perizi, Hiwi yahge Yebusi jens lyis ngos khat tyamp das. 12 Gvshih nvng jweh das mau mas bang yah thanghchvp vtoh, zaih aq. Khasoeh ge lyis hauh zis gas namoq lyis cho shwih whang lha Mangso yah we loh das. 13 Nvng nyamoq phon lhyi thyoq tyamp chah, nyamoq paiq lukzains lyis khwih tyamp chah, nyamoq dah gywes nyih Ashera gungslho zains lyis jap tyamp chah.Ref 34.13: Lyi 16.21
14 Gohtoeu chah mangso lyis eq vpaiq. Khasoeh ge lyis Ngos Yhensain ka jyoeng dah Mangso nghuot las ngos lyis khyank soeu lyis nhaiqlom ma xing. 15 Hauh mau mas bang yah thanghchvp vtoh. Khasoeh oen lyis nyamoq gas nyamoq dah yius mangso lyis paiq las phudyei uhlyis, namoq lyis khi lha namoq nyamoq dah yius kauh shoh zangh bos zo das. 16 Namoq dah loloeu jens gohnyau lonyi yoeus las, hau lonyi jens gas namoq dah loloeu jens lyis ngos lyis ma lomluk das yvpheh shwih loh las, nyamoq dah mangso jens lyis shwih paiq das.
17 Nvng shauq dah mangso vkuot, nvng shauq dah mangso lyis vpaiq.Ref 34.17: Dyu 20.4; Lew 19.4; Lyi 5.8, 27.15
18 Nvng bicheih ma bos ohlhyoq zo pwe kuot chah. Abi khyvp lyis nvng Egutu masyah thuq yvmvyah, hau Abi khyvp toeuq toh yvmas, ngos nvng lyis taiq toh vgus, nyhet nyeih top bicheih ma bos ohlhyoq zo chah.Ref 34.18: Dyu 12.14-20; Lew 23.6-8; Gyu 28.16-25
19 Vxeih dvnganh ngah zis nghuot; nah gaunyhauq mas zis noeu, yvng, shvbeq, suot xeih vlus dvnganh gas ngah zis nghuot.Ref 34.19: Dyu 13.2 20 Nghuot laus eq mauhlyihzoe suot xeih lyis gas yvnglo yah yoh thaiq yoeus; ma thaiq mes lyis gas, nvng hauh mauhlyihzoe dah lainzain khyauh dyei chah. Nah loloeu lomons yuk khanghmuh lyis doms wis aq.Ref 34.20: Dyu 13.13
Ngah xikkhonh mas jyungshuk ma chi hank eq ma gis thuq xoeuq.
21 Nvng khyuk nyeih top muh zwi las nyhet vnyeih lyis no chah: jyo khyoq nyos, jyo yhomh nyos laus eq no chah.Ref 34.21: Dyu 20.9-10, 23.12, 31.15, 35.2; Lew 23.3; Lyi 5.13-14
22 Nvng sunghso yhomh zoh yoq lyis jyo yhomh pwe eq, nvng cungh thuq los, shih thyoq yoq lyis zvng pwe eq kuot chah.Ref 34.21: Dyu 20.9-10, 23.12, 31.15, 35.2; Lew 23.3; Lyi 5.13-14
23 Israel vbusbih dvnganh gas Israel dah Mangso ge, Yhensain, nah Mangso xikkhonh mas dvzvn lyis somh lhain paiq chah. 24 Khasoeh ge lyis, ngos nah xikkhonh masyah dius nyau jens lyis khat thuq dyei las, nah maunyeis jyeq kat dyei goeus: nvng dvzvn lyis somh lhain Yhensain, nah Mangso xikkhonh mas pwe kuot uhlyis, nah maunyeis lyis hank eq ma yoh zan yoeus das.
25 Ngos lyis gaunyhauq yah phudyei uhlyis bicheih bos dah ohlhyoq vdyei. Lhuiq Kat Pwe mha sat dah shoh lyis nungsnvp jweh shoq vtoh.Ref 34.25: Dyu 12.10
26 Zvn yau zvn nvng cangxeih yhomh dah jyo lhyi Yhensain, nah Mangso yhen mha chi los chah.Ref 34.26: Lyi 24.21, 26.2
Yvnglo nghuot ya beqlo lyis nyah ungwes nauh yah vjyauq, ge.
27 Tsai, Yhensain Moshe lhyi taiq. Nvng haih dang lhaih toh aq: haih dang masyah, nvng yahge Israel jens mas ngos thanghchvp toh, ge. 28 Housoeh nyang houmha wom ma zo jeis ma shuk, nyeici nyeih nyeici nyens Yhensain yah nyeis. Hauh luk aiq lhywaq mas dang thanghchvp oen das, Lyi dvci lhaih.
Moshe Sina boms masyah Los
29 Moshe ka thanghchvp luk aiq lhywaq chi lha Sina boms masyah gyoh los lyis, nyang Yhensain yah jisgoh yvmvyah nyah nyoqnho vwot bvng yvlyis Moshe ma seq.Ref 34.29-35: 2Kr 3.7-16 30 Aron yahge Israel jens dvnganh Moshe lhyi yoeuh kat lyis, nyah nyoqnho bvng zis nyvng las, nyamoq gas nyah nvm mas ma womh ni. 31 Nghuot laus eq Moshe ka nyamoq lyis khi lha, Aron yahge moqhuom dah zau jens nyah jyank mas tsain los: Moshe eq nyamoq yah jisgoh. 32 Hauh thang lhyi Israel jens dvnganh los las, Sina boms mas Yhensain nyang lyis taiq kat dang dvnganh taiq kyoh. 33 Moshe nyamoq lyis dye taiq lyis nyah nyoqnho lhyi nyoq nghop nghop toh. 34 Moshe ka Yhensain yah jisgoh das zis nyah xikkhonh mas wvng las doms thuq los shoq nyoqnghopnote 34.34 Nyoqnghop: Nyoqnho lhyi gohyuk ma nyvng shoq nghop das xiklyis za misseh yah kuot toh vyhang. khyuot toh toh kuot. Nyang thuq los las nyang lyis taiq kat cho Israel jens lyis taiq kyoh. 35 Moshe nyoqnho bvng yvlyis Israel jens nyvng. Yhensain yah jisgoh das zvng khau mha doms wvng loh shoq Moshe nyah nyoqnho nghop toh.