32
Xing Noeulu lo
(Lyi 9:6-29)
Moshe boms mas nyangh dyuk yvlyis dius jens nyvng seq lyis, nyamoq Aron jyank mas huom e lha taiq zis gas, Toq aq, ngamoq nyhenshang ngamoq xik mas loh das mangso jens kuot dyei aq: Hau ngamoq lyis Egutu masyah shwih los soeu, Moshe cha mus goeus zis ma seq, ge.Ref 2.1: Lgy 7.40
Aron nyamoq lyis taiq zis gas, Namoq dah yhensain nyhiq, loloeu lonyi jens cwih dah xing nodangh ngah jyank mas tsain shang los geh, ge. Housoeh dius jens dvnganh, nyamoq no mas dah xing nodangh shang lha Aron jyank mas chi e. Aron eq hauh zis tsain lhom yoeus las shauq. Hauh thang lhyi noeulo vzwvng thwang toh yvmas xing huot kat. Hauh zis dye lyis nyamoq gas, Israel vnyau eh, haih zis gas Egutu masyah yang lyis shwih thuq los mangso nghuot, ge.Ref 32.4: 1Hw 12.28; Lgy 7.41
Aron hauh zis nyvng lyis, hauh xik mas phon ci lha, nvpyo gas Yhensain lhyi phauh nyang das pwe nyeih nghuot, ge kyoh kat. Nyamoq nungsnvp noq yah toq las ngheq phudyei zis yahge nyenstap phudyei chi e. Dius jens eq zo shuk las tsung toh, tsai nyamoq gas zo shuk yet las tsain kaiq, tsain goh nyeis.Ref 32.6: 1Kr 10.7
Housoeh las Yhensain Moshe lhyi taiq. Nvng lvnyap gyoh loh aq; nvng Egutu masyah shwih los bang yaunos kuot las nyamoq nyang nyamoq gungs lyis tsain lhoeu thyoq goeus. Nyamoq ngos taiq toh cho mhayah lvnyap whang loh las, noeu gungslho kuot las Israel jens eh, mangso haih zis gas nvng lyis Egutu masyah shwih los, nah mangso nghuot ge taiq zoh lyis, hauh gungslho xik mas paiq las phudyei nyeis. Haih dius jens nhaiqlom kha iq than zis ngos seq. 10 Housoeh las ngos lyis vtomp, ngos nhaiqyo las nyamoq lyis mhont tyamp das. Housoeh ngos nvng yahge nah vnyau vshih lyis dius nyau zainsmuh kuot das, ge.
11 Moshe Yhensain nyah Mangso lhyi dung zis gas, Yhensain eh, nvng nah yomsoq zains, yombos loq yah Egutu masyah kyoeu kat, nah vnyau lyis nhaiq vjenh yo.Ref 32.11-14: Gyu 14.13-19 12 Mangso ka ma gis khyvlyis nghamh zis yah nyamoq lyis boms mas sat las nyamoq lyis nyeisjvng thoq masyah thyuk das zis shwih los ge, Egutu bang taiq gus chamus bos nhang? Nah nhaiqyo nhaiqlom lyis bi nhang aq; nah vnyau lyis heisoeh yaudyei das zis auhuiq aq. 13 Nvng taiq zis yah dvyhangteh, namoq vnyau lyis maukhung kyi teh nyo nhang das las, hai ngos taiq toh mau dvnganh namoq dah vnyau lyis dyei las hauh yvlyis nyamoq vcaiq vto xauh sain das, ge nvng nvnyang gungs lyis nyings yoeus maukhi dang xauh yoeus bang ge, nah jons Abraham, Isak, Israel moq lyis soh aq, ge.Ref 32.13: Vpom 22.16-17, 17.8 14  Yhensain eq nyah vnyau lyis yaudyei das cho toh tyamp las nhaiqlom thaiq yoeus.
15 Moshe ka hau thanghchvp luk aiq lhywaq chi lha boms masyah tauh gyoh los. Hau luk aiq lhywaq gas aiq shot shot lhaih zis nghuot. 16 Hau luklhywaq aiq koeuq gas Mangso kuot las, tyingtoh dang eq Mangso thwang tap zis nghuot.
17 Yoshua hauh dius jens kaiq hoeu sam xauhgyo las Moshe lhyi, dvp mas jeszan nyhink, ge. 18 Moshe ka, Ngos xauhgyo thwe ka ung lha kaiq zis eq ma nghuot, somh las kaiq zis eq ma nghuot, kaiq hoeu lha goh nyeis thwe dvnghuot, ge.
19 Housoeh thoenggus mas gyoh jweh e lhyi, noeulo lyis eq, tsain goh nyeis yvlyis eq nyvng. Housoeh yvmvyah Moshe nhaiqyo las boms khyei mha hau nyah loq mas dah luk aiq lhywaq doeuh khyoq las gwi tyamp. 20 Nyamoq kuot dah noeulo lyis eq, nyang nyi mas yoeus ngheq, phih soeh mhont, jeis mas lhoeuq las Israel jens lyis shuk nhang. 21 Moshe ka Aron lyis, Nvng haih vnyau lyis hei iq teh dah yaunos yoh kuot thuq nhang zis gas, nyamoq nvng lyis cha kuot lah, ge.
22 Aron toeuh zis gas, Ngos lyis nhaiq vyo, haih vnyau ma gis ehnyet bos zis gas nvng seq. 23 Nyamoq ngos lyis, Ngamoq lyis ngamoq xik mas loh das mangso jens kuot dyei aq. Ngamoq lyis Egutu masyah shwih los soeu Moshe chamus goeus zis ngamoq ma seq, ge taiq yvmvyah, 24 ngos eq, Xing yoh soeu hank eq shang bas jungh oen goeus: housoeh nyamoq ngah jyank mas xing tsain chi los las, ngos hauh yvlyis nyi mas shauq lyis haih noeulo thuq los, ge.
25 Housoeh Aron dah yobos gvng mas dius jens gas nyamoq dah jeswus xikkhonh mas yoeu las, nyamoq gungs nyamoq ma yoh joeu lo zis lyis Moshe nyvng lyis, 26 nyah dvp khomh mas yap las taiq zis gas, Yhensain shot hank nyeis? Ngah jyank mas los geh, ge. Hauh uhlyis Lewi vkoq mas bang dvnganh nyah jyank mas zain los. 27 Nyang nyamoq lyis taiq zis gas, Namoq yuk khanghmuh vsainnyang sham yoeus wons las dvp dvshot khomh cho wvng las gohtoeu dvshot khomh cho thuq las nah vmang vnoeuh, dyenschangh, yhenkyoh lyis sat aq ge Yhensain, Israel Mangso taiq, ge. 28 Housoeh Moshe dang vgus Lewi lo jens kuot las hauh nyeihyo dius yukgis somh khyoengh ko shei. 29 Moshe taiq zis gas, khvnyhik namoq hank eq hank vsainnyang loloeu, vmang vnoeuh lyis sat zis yah namoq Yhensain o khyvlyis kuot goeus las Yhensain namoq lyis shvmanh dyei goeus.
30 Nungsnvp Moshe dius jens lyis taiq zis gas, Namoq yaunos zainsmuh kuot goeus. Nghuot laus eq ngos Yhensain jyank mas doq loh las, namoq yaunos xiklyis yoh shangphu mvbeh, ge. 31 Moshe ka Yhensain jyank mas doq loh las dung zis gas, jyoengh haih vnyau gas nyamoq xiklyis xing mangso kuot las paiq zis yah yaunos zainsmuh kuot goeus. 32 Nghuot laus eq nyamoq dah yaunos khyuot dyei das zis bauh lyis gas khyuot dyei aq; housoeh ma nghuot lyis gas, nvng nah dius jens nyings lhaihtoh maussauh masyah ngah nyings eq thyuk tyamp dyei aq, ge.Ref 32.32: Chd 69.28; Nyoq 3.5
33  Yhensain ka Moshe lhyi, Ngos lyis hank shuot lyis hank nyings ngah sauhbuk masyah thyuk das. 34 Housoeh yvmvyah gvshih nvng gyoh e aq, dius jens lyis, ngos nvng lyis taiq joqyos mas shwih los aq; yoeuh aq, ngah loeuswons nah xik mas loh das: nghuot laus eq, nyamoq yaunos gvng mas nyamoq lyis ngos joeng das buisnyeis jweh das, ge.
35 Housoeh Aron lyis nyamoq xing noeulo nyhenh kuot nhang yvmvyah Yhensain nyamoq lyis yomh yah joeng.