29
Aron, Lo jens Phudyei Gyamh huon Xauh
(Lew 8:1-36)
1 Heika nvng Aron yahge nyah loloeu jens lyis ngah muh mas phudyei muh khyvlyis wons wuq das xiklyis, nvng nyamoq lyis toeuq toh chah. Nos ma bos dah noeulu dvdoeu, yvnglus aiq doeu,
2 gis thank sunghso mons yhung lha, bicheih ma kat, dvkhamh lyis tsanlun coeu yah nis dah ohlhyoq, dvkhamh lyis coeu ma kat nis dah ohlhyoq, gohtoeu dvkhamh lyis kyap las tsanlun coeu juot dah ohlhyoq kyuk kuot chah.
3 Hau ohlhyoq lyis kyank dvkoeuq mas kat las, noeulu yahge yvnglus aiq doeu dvgeh ngah jyank mas chi los dyei chah.
4 Aron yahge nyah loloeu jens lyis eq zvng khomh Mangso xikkhonh mas shwih los las gungs tsain cheih dyei chah.
5 Hauh thang lhyi Aron lyis hau phudyei dyimis nghuot dah dyi, ephod, ephod vkhau mha dah shanhzoe, sainhkhonh gos yahge dyichih gvm huot.
6 Uhloms mas eq hau uhthop thop dyei las, uhthop thoq mas hau Yhensain lhyi kyauh ge gyingshang vlho thwang tap toh dah vlhyoq tap dyei chah.
7 Hauh thang lhyi juot das coeu yoeus las, nyah uhloms mas huot kat dyei zis yah nyang lyis juot dyei chah.
8 Nyah loloeu jens lyis eq shwih los las shanhzoe tsain gvmhuot chah.
9 Nyamoq thyikdom mas dyichih chih dyei las, uhloms mas uhthop thop dyei chah. Heika nvng Aron yahge nyah lo jens lyis muh khasoeh huon cho nghuot. Nyamoq yahge nyamoq diusjangh caiq gas ngos lyis vcaiq caiq phudyei bang khyvlyis phuqsoe nyeis das.
10 Noeulu lyis moq zvng xikkhonh mas she los las, Aron yahge nyah loloeu jens hau noeulu uhloms mas nyamoq loq kih geh oen taiq aq.
11 Hau noeulu lyis moq zvngkhonh nvm, Yhensain xikkhonh mas sat chah.
12 Noeulu suih dvkhamh yoeus las phon dah khyau mha nah loqnyhauh yah juot lho lha, nyet joq suih dvnganh lyis phon khyei mha huot khyoq chah.
13 Oeu nghop dah ungkyo dvnganh, gis thank sainh doeus eq, jinghloms aiq koeuq yahge houmha dap dah coeu eq yoeus las phon mha ngah xiklyis jyungshuk ngheq dyei chah.
14 Hau noeulu dah shoh, yeis yahge oeu lhyi ka dvp nghe mha ngheq chah. Houka yobos khyuot lomhxangh nghuot.
15 Nvng yvnglus dvdoeu eq she los las, Aron yahge nyah loloeu jens hau yvng uhloms mas nyamoq loq tsain kih geh oen taiq aq.
16 Hau yvnglus lyis eq sat las, suih yoeus lho lha phon nyei shot mas doeuh gyon chah.
17 Yvnglus gungs lyis thyoq las, hau ungkhau mha vyhang yahge nungs khyei lhyi cheih lho lha uhloms thoq mas kih las shoh doms kih.
18 Yvnglus dvgungs gonh lyis phon mha zonoms jyungshuk khyvlyis ngheq dyei chah. Haih jyungshuk xangh shom ka ngos lyis nhaiqdoeus nhang.Ref 29.18: Eph 5.2; Php 4.18
19 Gohtoeu yvnglus dvdoeu eq she los las, Aron yahge nyah loloeu jens hau yvng uhloms thoq mas loq kih chah.
20 Hau yvnglus lyis sat, nyah suih dvkhamh yoeus las, Aron yahge nyah loloeu jens dah loqyos nodyen mas eq, nyamoq dah loqyos loqmuhchamh, loqyos khyeimuhchamh mas tsain juot das, nyet yvlyis phon nyei shot mas doeuh gyon chah.
21 Hau phon mha dah suih dvkhamh yahge juot coeu dvkhamh tsain yoeus las Aron yahge nyah dyimis mas eq, nyah loloeu jens yahge nyamoq dah dyimis mas eq tyitsant dyei chah. Housoeh nyang eq nyah loloeu jens eq, nyamoq dah dyimis eq gyingshang das.
22 Yvnglus dah banhyoeuh yoeus, coeu dap dah lhyank, oeu nghop ungkyo, gis thank sainh doeus, jinghloms aiq koeuq yahge houmha dap coeu, loqyos bungssan yoeus,
23 ngos lyis dyei dah ohlhyoq kyank masyah dvja mas zis dvlhyoq: tsanlun coeu yah kuot zis dvlhyoq, coeu ma bos kuot zis dvlhyoq, ohlhyoq bu dvkoeuq yoeus aq.
24 Hauh zonoms dvnganh Aron yahge nyah loloeu jens loq mas kat dyei las nyamoq gas lhyenwhei jyungshuk khyvlyis ngah jyank mas chi los chah.
25 Hauh thang lhyi hauh yvlyis nyamoq loq masyah yoeus las phon thoq mas ngheq phudyei thoq mas kih las ngos lyis zonoms jyungshuk khyvlyis ngheq dyei chah. Haih jyungshuk dah xangh shom ka ngos lyis nhaiqdoeus nhang.
26 Haih yvnglus sainhkhonh lyis yoeus las ngos lyis lhyenwhei jyungshuk khyvlyis dyei chah. Hai gaunyhauq dah vboms gas nah xiklyis nghuot.
27 Phudyei dvyuk lyis muh huon lhyi, muh huon yvnglus dah sainhkhonh yahge bungssan ka ngos lyis lhyenwhei jyungshuk khyvlyis dyei lho lha phudyei bang xiklyis toeuq toh chah.
28 Heika Israel jens Aron yahge nyah loloeu jens lyis vjangh dyei nyeis das gvmboms nghuot. Haih zis gas Israel jens nyamoq dah nyenstap jyungshuk masyah ngos Yhensain lhyi dyei dah jyungshuk nghuot.
29 Aron dah phudyei dyimis lyis eq, nyang shei thang lhyi nyah loloeu jens lyis muh huon uhlyis gvm huot chah.
30 Aron thang mha nyah loloeu jens mas phudyei muh wvng soeu ka, gyingshang joqyos mas phuqsoe das ge, ngah xikkhonh zvng mas wvng uhlyis haih dyimis nyhet nyeih top wuot chah.
31 Aron yahge nyah loloeu jens lyis muh huon dah yvnglus shoh lyis yoeus las gyingshang joqyos mas jyauq aq.
32 Aron yahge nyah loloeu jens hau yvnglus shoh yah dvgeh kyank mas nyet dah ohlhyoq lyis ngah xikkhonh zvng khomh mas zo chah.
33 Nyamoq lyis muh huon das xiklyis yobos khyuot cheihshang yvmas yhung dah lomhxangh lyis nyamoq tsain zo chah. Hauh lomhxangh gas gyingshang yvmvyah phudyei bang kyingh dvgis zo.
34 Muh huon yvmas dah shoh laus eq, ohlhyoq laus eq, nungsnvp ma gis zo lo. Hauh yvlyis ngheq tyamp chah; houka gyingshang yvmvyah ma gis zo.
35 Ngos nvng lyis taiq toh vgus, Aron yahge nyah loloeu jens lyis muh huon pwe nyhet nyeih top kuot chah.
36 Yobos khyuot dyei das nyhenshang noeulu dvnyeih dvdoeu lomhxangh lainh chah. Heika phon lhyi cheihshang cho nghuot. Hauh thang lhyi gyingshang das nyhenshang tsanlun coeu juot chah.
37 Nyhet nyeih top nyeih yau nyeih haih zis kuot chah. Housoeh lyis phon gyingshang das las, hauh phon mha tanh soeu nghuot ya tanh dah vyhang cha eq gyingshang das.
Nyeih yau Lomhxangh
(Gyu 28:1-8)
38 Jweh los das shishenh lyis hau phon mha nyeih yau nyeih zvn dyingh dah yvnglo aiq doeu lomhxangh lainh nyeis chah.
39 Hauh zis nvp lyis dvdoeu, nyenhthang lhyi dvdoeu lainh chah.
40 Nvp lyis cangxeih dah yvnglo phudyei yvmas, sunghso mons noeuh aiq thunk yoeus las nyhet yoeus dah tsanlun coeu dvthunk yah lhoeuq dah jyungshuk; huot khyoq jyungshuk xiklyis zvbiq dvthunk bos chah.
41 Nyenhthang lhyi yvnglo aiq vdoeu phudyei yvmas, nvp lyis dah sunghso phih nyhoq, tsanlun coeu yahge zvbiq bos teh nghuot chah. Heika ngos Yhensain lhyi dyei dah zonoms jyungshuk nghuot las hauh xangh shom ka ngos lyis nhaiqdoeus nhang.
42 Jweh los das shishenh lyis haih zis gas ngos namoq yah xauhgoh las jisgoh das joqyos ge, ngah xikkhonh zvng khomh mas dah ngheq phudyei nghuot.
43 Houmha ngos Israel jens yah xauhgoh las, ngos jweh nyeis ge dah phunk bvng zis gas hauh joqyos lyis gyingshang nhang das
44 Ngos hauh zvng yahge phon lhyi gyingshang nhang das. Aron yahge nyah loloeu jens lyis eq, phudyei bang khyvlyis ngos lyis phuqsoe nyeis das zis toeuq toh das.
45 Ngos Israel jens mas nyeis las nyamoq dah Mangso duot das.
46 Ngos nyamoq mas nyeis das zis, nyamoq lyis Egutu masyah shwih los, Yhensain, nyamoq dah Mangso nghuot yvlyis nyamoq seq das. Ngos Yhensain, nyamoq dah Mangso nghuot, ge.