23
Lyi jus cho, Yih cho
1 Nvng ma ying loeus vhoeuh. Yobos bos soeu ma ying kanghjyoeng kat yvmas vpangh.Ref 23.1: Dyu 20.16; Lew 19.11-12; Lyi 5.20
2 Ma gis muh kuot das zis dius nyo shot vdap. Soetuon cho mha lyi bos yvlyis thyoq das zis dius nyo shot kanghjyoeng vkat.
3 Nyungs soeu lhyi nyah soe mha lyi yah dvyhangteh tuon aq.Ref 23.3: Lew 19.15
4 Nvng nah jeswus dah noeu, mauhlyihzoe chowhang whang loh zis zangh nyvng lyis nyah jyank mas loh komp kat dyei aq.Ref 23.4-5: Lyi 22.1-4
5 Nyah mauhlyihzoe tu yah lains nyih joq zis zangh nyvng lyis hauh yvlyis vlai toh khoq, bos toeu tsung dyei aq.
6 Soetuon jang mas nyungs soeu soe bos lyis nvng ma jyoeng khyvlyis soe vtuon dyei.Ref 23.6-8: Lew 19.15; Lyi 16.19
7 Lyi ma bos dah kauq cho vgyo dyei, yobos ma bos soeu lhyi vsat. Khasoeh ge lyis housoeh teh ma gis zis kuot soeu hank lyis laus eq ngos dang thang thyet das.
8 Nvng khauwhot vzo, hauh ja khauwhot gas dius jens dah nyoq lyis jet nhang lha jus cho lhyi ma nyvng, yobos ma bos bang lyis dyoqbis nhang.
9 Nvng boenghwus lyis vzaiq; namoq Egutu mas boengh duot ku yvmvyah namoq boenghwus dah ehnyet seq.Ref 23.9: Dyu 22.21; Lew 19.33-34; Lyi 24.17-18, 27.19
Nyhet Vzvn, Nyhet Vnyeih
10 Nvng nah maunyeis mas khyuk zvn top xoh las shih los zis yhomh yoeus.Ref 23.10-11: Lew 25.1-7
11 Nghuot laus eq nyhet vzvn lyis hwangh toh bas jungh. Houmha yuk los zis cha eq ma yhomh bas jungh, shohjyen bang yoeus zo bas jungh, nyet goeu gas yewus tsain zo bas jungh. Nah zvbiq khyam yahge tsanlun khyam lhyi eq housoeh kuot aq.
12 Dvdaus lyis khyuk nyeih muh zwi aq, nghuot laus eq nyhet vnyeih lyis muh vzwi. Housoeh lyis nah jons jens, nah xiklyis muh zwi dah gohmau bang yahge nah gaunyhauq jens yoh no das.Ref 23.12: Dyu 20.9-11, 31.15, 34.21, 35.2; Lew 23.3; Lyi 5.13-14
13 Ngos Yhensain namoq lyis taiq ya taiq yvlyis gyo yoeus geh. Gohtoeu mangso lhyi vdung goh, nyamoq dah nyings yangh vyoeus goh.
Pwe Zainsmuh Somh Koeuq
(Dyu 34:18-26; Lyi 16:1-17)
14 Nvng ngos lyis chungh das zis dvzvn lyis somh lhain pwe kuot chah.
15 Nvng Egutu masyah thuq los Abi khyvp lyis ngos nvng lyis taiq toh vgus hau bicheih ma bos ohlhyoq zo pwe kuot chah. Haih pwe nyhet nyeih gyo lyis bicheih kat ohlhyoq ma gis zo. Jyungshuk ma chi ngah jyank mas hank eq ma gis thuq xoeuq.Ref 23.15: Dyu 12.14-20; Lew 23.6-8; Gyu 28.17-25
16 Nah jyo yhomh xi uhlyis Jyo Yhomh Pwe kuot aq. Cungh thuq zoh, nah zvbiq khyam mha jyo dye yhomh uhlyis Phunk Pwe eq kuot chah.Ref 23.16: Lew 23.15-21, 39-43; Gyu 28.26-31
17 Zvn khanghmuh haih pwe somh koeuq mas namoq dah vbusbih jens dvnganh ngos Yhensain, nah Mangso lhyi los paiq chah.
18 Ngos lyis gaunyhauq yah phudyei uhlyis bicheih bos dah ohlhyoq vdyei. Haih pwe jens gyo lyis ngos lyis phudyei dah gaunyhauq coeu lhyi nungsnvp jweh shoq vtoh.
19 Zvn yau zvn nvng cangxeih yhomh dah jyo lhyi Yhensain, nah Mangso yhen mha chi los chah. Yvnglo, nghuot ya beqlo lyis nyah ungwes nauh yah vjyauq.Ref 23.19: Dyu 34.26; Lyi 14.21, 26.2
Dangthoengh yahge Shet cho
20 Ngos sont toh dah joqyos mas nvng lyis shwih loh lyis cho mha gomh das nyhenshang nah xik pheh loeuswons soeu nhang kat.
21 Nyah dang gyo aq, nyah domsyos gyo aq, nyang lyis tyi lha gomloeus vtoq; khasoeh ge lyis nyang lyis ngos nhang kat las nvng housoeh teh gomloeus toq cho lhyi ma yoh khyuot dyei das:
22 Nghuot laus eq nvng nyah domsyos gyo las ngos taiq zis dvnganh chank kuot lyis gas ngos nah jeswus dvnganh lyis zan das.
23 Ngah loeuswons soeu nah xik pheh loh las Amori, Hiti, Perizi, Khanan, Hiwi, Yebusi dius jens nyeis mau mas nvng lyis shwih loh las nyamoq lyis mhont tyamp das.
24 Namoq nyamoq dah mangso jens lyis vpaiq goh; nyamoq dah paiq cho lhyi vxuq goh. Nyamoq dah mangso jens lyis mhont tyamp geh, nyamoq gyingshang lukzains jens lyis tsain thyoq khyoq geh.
25 Ngos Yhensain, nah Mangso lhyi paiq lyis gas, namoq lyis zonoms shukphoh shvmanh dyei das. Namoq dah noslom lyis ngos wes tyamp dyei das.
26 Nah mau mas loshuot zis ma bos, nghuot ya vthonh ma bos das. Ngos namoq lyis kang xing nhang das.
27 Ngos nah jeswus lyis ngos lyis gyuk nhang das; nvng zan nyeis bang lyis nhaiqchuot nhang das. Nah jeswus dvnganh lyis nungs phuk phang loh nhang das.
28 Ngos nah jeswus lyis nyetlos nyettant yaukyenh nhang das. Nah cho mhayah Khanan yahge Hiti jens, Hiwi jens lyis khat tyamp das.
29 Ngos nyamoq lyis dvzvn dvm lyis ma khat thuq tyamp das. Khat thuq lyis gas, hauh mau jyamhjyuklhyuk mus las nah xiklyis yewus nyo dyingh das.
30 Hauh gungsthaiq nvng jebais los las mau gonh yoh sain buisnyeis jweh shoq ngos nyamoq lyis dvtsiq dvtsiq zohyah khat tyamp das.
31 Ngos nah maukyo lhyi Thomh Nes guih masyah Mediteranean thomh jweh shoq, hauh mhanhdyvp masyah Uphrat lvng jweh shoq toh das. Hauh mau mas bang lyis nah loq mas kyauh las, nvng nyamoq lyis khat tyamp das.
32 Nyamoq yah eq, nyamoq dah mangso jens yah eq thanghchvp vtoh.
33 Hauh bang lyis namoq dah mau mas vnyeis nhang. Nyeis nhang lhyi ka nyamoq gas namoq lyis ngos lyis shuot nhang das. Nvng nyamoq dah mangso lhyi paiq lyis gas houka nah xiklyis lhyik mas nyih teh bweh das, ge.