17
Luk masyah Jeis
(Gyu 20:1-13)
1 Yhensain dah vmingh vgus, Israel jens moqphung gonh Sin mhanhdyvp masyah thuq, dvjoq dvjoq cheh las Rephidim mas thoeng toh. Nghuot laus eq houmha shuk jeis ma joq.
2 Nyamoq Moshe lhyi lop zis gas, Ngamoq lyis shuk das jeis dyei aq, ge.
Moshe phuk taiq zis gas, Namoq chamus ngos lyis lop nyeis goh? Yhensain lhyi chamus shih yoeuh goh, ge.
3 Nghuot laus eq dius jens jeis svsoh shet las Moshe lhyi tsoq lop. Nyamoq taiq, Nvng ngamoq lyis Egutu masyah chamus shwih los? Ngamoq lyis eq, ngamoq lo jens lyis eq, ngamoq gaunyhauq jens lyis eq jeis shet shei nhang das oen lhyeh, ge.
4 Moshe Yhensain lhyi khyoeuq dung zis gas, Ngos haih bang lyis khasoeh kuot das lah? Ngos lyis lukzains yah doeuh sat bah ge goeus, ge.
5 Yhensain Moshe lhyi taiq zis gas, Nvng Israel uhshe bang dvyhamh shwih las dius jens xik pheh loh aq. Hau Nile lvng lyis lyuk dah lhamloq yoeus chi aq.
6 Horeb boms dah luk-uk thoq mas ngos nah xik mas yap joq das. Nvng hauh luk lyis lyuk aq, hou mhayah dius jens shuk das nyhenshang jeis yaus thuq los das, ge. Moshe eq Israel uhshe bang dah nyoqlvtjvng mas housoeh kuot.
7 Houmha Israel jens gas lop zis yah, Yhensain yang yah dvgeh nyeis au ma nyeis au ge nyei las Yhensain lhyi shi yoeuh yvmvyah hauh joqyos lyis Masanote 17.7 Masa ge zis Shi yoeuh ge eq, Meribanote 17.7 Meriba ge zis Lop ge eq nyhink.
Amalek yah Zan-goh
8 Amalek jens gas Rephidim mas Israel jens lyis jes los zan.
9 Moshe Yoshua lyis taiq zis gas, Dius dvyhamh khyen lha nvpyo Amalek lyis loh zan aq. Mangso ngos lyis chi aq ge taiq toh dah lhamloq chi lha ngos jing thyoh mas yap joq das, ge.
10 Yoshua gas Moshe nyang lyis tying toh vgus kuot las Amalek lyis zan das xiklyis loh. Hauh uhlyis Moshe, Aron, Hur moq gas hauh jing thyoh mas doq loh.
11 Moshe dah loq toeu toh lyis Israel jens ung; nyah loq khyoq goeus ya Amalek jens ung xi los.
12 Nghuot laus eq Moshe loq nyung los las, Aron yahge Hur gas luk dvlom mas nyang lyis tsung nhang lha nyah loq lyis nyah zomh dvshot dvyuk, buiswvng shoq bos thuk toeu toh dyei.
13 Housoeh Yoshua gas Amalek jens lyis dvnganh yoh ung tyamp.
14 Hauh thang lhyi Yhensain Moshe lhyi taiq zis gas, Haih ung cho lhyi soh das xiklyis maussauh mas lhaih toh aq. Ngos Amalek lyis thank shoq mhont tyamp das cho Yoshua lyis taiq kyoh aq, ge.Ref 17.14: Lyi 25.17-19; 1Sa 15.2-9
15 Moshe eq phon ci lha hauh yvlyis, Yhensain ka ngos lyis ung cho dyei soeu nghuot, ge nyhink.
16 Nyang taiq zis gas, Ngos Yhensain lhyi nges toh yvmvyah Yhensain ka Amalek lyis tsoq las vcaiq vto jeszan das, ge.