DYUNG THUQ
(EXODUS)
Thoq mas zis dvnganh gas haih buk mas Mangso ka jons duot nyeis dah nyah dius jens lyis lhuiq kat las thang pheh nghamh loms cho bos dah dius dvnyau bweh nhang cho lhyi byixoeuq toh.
Mangso nyah dius jens lyis Egutu masyah shwih thuq das xiklyis Moshe khyen. Tyingtoh lyi 10 bos, sonzoh kuh zis 20 ka haih buk dah hoeuh thank vdoeus nghuot.
1
Israel jens lyis Shoeuhshih
1 Heika Egutu mau mas jweh e, Israel loloeu jens dah nyings nghuot. Nyang yuk nyang yhen Yakop yah dvgeh e bang gas,Ref 1.1-4: Vpm 46.8-27
2 Ruben, Simon, Lewi, Yuda,
3 Isakha, Zebulun, Benyamin,
4 Dan, Napthali, Gad, Asher nghuot.
5 Yakop gungs mas yaus zis dvnganh lyis nyhetci nghuot.Yosep gas Egutu mas nyeis langh goeus.
6 Yosep yahge nyah vmang vnoeuh moq eq, hauh caiq mas bang dvnganhmoq eq shei goeus.
7 Israel jens gas jebais, svsoh nyo los zis yah, yombos los las hauh dvmau gonh nyamoq kyingh dyingh joq.Ref 1.7: Lgy 7.17
8 Hauh thang lhyi Yosep dah cho lhyi ma seq dah hwankti saiq dvyuk Egutu mau lyis guon los.Ref 1:8 Lgy 7:18
9 Hauh soeu ka nyah dius jens lyis, Yoeuh aq, Israel jens dah vnyau gas nyo los las yah thoq lyis yom zes bos nyeis.
10 Los geh, nyamoq ma yoh nyo los das zis yahge jes bos lyis nyamoq yah jeswus shot pheh wvng zis yah yang lyis zan khoq las haih mau masyah ma yoh phang bas jungh, nyamoq lyis joeui yah kuot goh, ge.Ref 1.10: Lgy 7.19
11 Housoeh las nyamoq gas muh changh yah nyamoq lyis zaiq das xiklyis nyamoq thoq mas lvgungh tsain toh. Nyamoq eq hwankti Pharao dah zis toh wus Pithom yahge Ramse kuot.
12 Nghuot laus eq Egutu jens zes zaiq zes nyo las dyingh los. Housoeh las nyamoq gas Israel jens gvng mas chiq nyeis.
13 Housoeh Egutu dius jens gas Israel jens lyis vshoh vjyen jons zaiq kuot.
14 Mu phot muh yahge jyenhchvp kuot muh, danh kuot, yos zwi muh yah nyamoq lyis jons kuot las nyamoq gungs dyos lyis nyungdaus nhang.
15 Egutu hwankti ka Hebre vmesbih jens lyis lo bos yoeuh khoeu dyei dah Hebre dius Shipra yahge Pua lyis taiq toh zis gas,
16 Nah aiq yuk hau Hebre vmesbih jens lyis bos yoeuh khoeu lha, choq thyet jang mas yukgis lo nghuot lyis gas sat geh, nyelo nghuot ya gas dwis nyeis goeus jungh, ge.
17 Bos yoeuh khoeu vzomh gas, Mangso lhyi gyukwoms las Egutu hwankti taiq toh khyvlyis ma chank, yukgis lo jens lyis kang dwis nhang toh.
18 Housoeh yvmvyah Egutu hwankti ka bos yoeuh khoeu vzomh lyis doms khi lha, Chamus yukgis lo jens lyis Kang dwis nhang toh? Chamus housoeh kuot lah, ge.
19 Hauh vzomh Pharao lyis taiq zis gas, Hebre vmesbih jens gas Egutu vmesbih jens teh ma nghuot, nyamoq yom bos las, bos yoeuh khoeu soeu ma jweh shih lyis nyamoq yoh khoeu luiq goeus, ge.
20 Housoeh las Mangso ka bos yoeuh khoeu dah vmesbih aiq yuk lyis jyehjuh dyei. Hauh vnyau eq jebais los las svsoh kuhxing los.
21 Housoeh bos yoeuh khoeu vzomh gas Mangso lhyi gyuk yvmvyah Mangso ka nyamoq dah yhenkhung yoskhyangh lyis toenk nhang.
22 Pharao nyah dius dvnganh lyis taiq toh zis gas, Khoeu toh dah Hebre yukgis lo dvnganh lyis Nile lvng mas doeuh khyoq geh, nyelo lyis gas kang dwis nhang toh geh, ge.Ref 1:22: Lgy 7:19