9
Jew Nyamoq Jeswus Mhont
Adar lhamhmuh khyvp dvci somh vnyeih jweh los. Hauh nyeih gas hwankti dah hoeuh kat cho kuot thyet das nyeih, Jew jens dah jeswus gas Jew jens nyamoq yomsoq khau mha jweh los das zis nghamhloms nyeis dah nyeih nghuot. Nghuot laus eq hauh gungsthaiq, Jew jens gas nyamoq lyis ung tyamp. Munghdan khau, wus khanghmuh, Jew jens nyeis dah vgyons mas Jew jens gas nyamoq lyis nos nhang mes bang hank lyis laus eq zan das xiklyis nyamoq xamxom toh. Dvkhauyahnote 9.2 Dvkhauyah Jew jens dah wus khanghmuh mas. dah dius jens gas nyamoq lyis gyuk las hank eq nyamoq yah tyi lha ma yoh yap. Jyoengh, mungh zau jens, guon bang, hwankti muh wons bang nghuot dah mauxom zau jens dvnganhmoq gas Mordekhai lhyi gyuk yvmvyah Jew jens lyis tsain pangh. Gvshih Mordekhai ka hwankti yhen mha yomsoq bos soeu dvyuk nghuot las nyah yomsoq zes zes kuh los nyeis cho munghdan gonh mas hoeuh jyangh toh. Housoeh las Jew jens gas nyamoq dah jeswus lyis nyamoq kuot mes khyvlyis yoh kuot. Housoeh Jew jens gas nyamoq dah sham yah zan las jeswus lyis sat.
Jew jens gas Susa wusmuh mas kyingh dius oengxo lhyi sat. 7-10 Hauh bang mas Jew jens dah jeswus Hamedatha lo Haman lo jens dvci yuk bos. Parshan Datha, Dalphon, Aspatha, Poratha, Adalia, Aridatha, Parmashta, Arisai, Aridai, Waizatha moq nghuot. Nghuot laus eq houmha lhuot cho ma bos.
11 Hauh nyeihyo Susa wus mas khanyhoq yuk sat zis hwankti lhyi kyoh los. 12 Hwankti ka hwankti nyhiq Esther lhyi taiq, Jew jens gas Susa wus mas kyingh Haman dah loloeu jens dvci yuk bos dah dius oengxo lhyi sat goeus. Mauxom jens mas khanyhoq kuot goeus lah? Gvshih nvng cha o? yoh das, nvng cha o shih zis ngos lyis taiq aq, yoh das, ge.
13 Esther phuk taiq, Hwankti nhaiqdoeus lyis gas, Susa wus mas Jew jens khvnyhik xauh kuot zis yah dvyhangteh phvnaq nyeihyo eq Haman loloeu jens dvci yuk dah mvng lyis taplhangh zains mas lhangh toh nhang das vmingh dyei shih aq, ge. 14 Haih cho kuot das zis hwankti vmingh dyei las, Susa wus mas taiq hoeuh cho thuq kat. Housoeh Haman loloeu jens dvci yuk dah mvng lyis lhangh sat zains mas tsain lhangh toh. 15 Adar lhamhmuh dvci nyei vnyeih lyis Susa wus mas dah Jew jens gas doms zain las wus mas dius somhxo doms sat. Nghuot laus eq nyamoq lhuot yoeus cho ma kuot.
16 Mauxom jens mas nyeis dah Jew jens eq tsain xamxom lha nyamoq nyang khomp zo. Nyamoq gas nyamoq lyis hoeng bang nyhetmons oeng khyoengh lyis sat zis yah jeswus jens lyis shang tyamp. Nghuot laus eq lhuot cho ma kuot. 17 Heika Adar lhamhmuh dvci somh vnyeih lyis nghuot. Nungs nyeih, dvci nyei vnyeih lyis sat cho ma bos lo. Housoeh nyamoq gas dvci nyei vnyeih lyis gauslaus pwe kuot dah nyeih tsain kuot. 18 Nghuot laus eq Susa wus mas dah Jew jens gas, dvci somh dvci nyei lyis nyamoq dah jeswus jens lyis sat, dvci oeng vnyeih lyis sat cho no las hauh nyeih lyis xent nyeih kuot. 19 Housoeh yvmvyah wukhau mha tsain nyeis dah Jew jens gas, Adar lhamhmuh dvci nyei vnyeih lyis gauslaus dah xent nyeih khyvlyis dvyuk yah dvyuk zo shuk jyungshuk dyei goh dah shishenh toeuq toh.
Purim pwe
20 Mordekhai ka haih cho lhyi tsain lhaih comh toh lho lha Persia munghdan gonh, ni mas we mas nyeis dah Jew jens dvnganh lyis maussauh huon kat. 21 Houmha nyamoq lyis taiq zis gas, Zvn khanghmuh Adar lhamhmuh dvci nyei yahge dvci oeng vnyeih lyis xent nyeih tsain toh geh. 22 Haih zis gas Jew jens nyamoq dah jeswus jens lyis shang tyamp goeus dah shishenh nghuot. Haih zis gas, kukxi shishenh mhayah gauslaus yvpheh, nhaiqlom thank shishenh masyah pyo yvpheh thaiq los dah lhamhmuh khyvp nghuot. Haih buisnyeis lyis pwe kuot dvyuk yah dvyuk zonoms jyungshuk dyei goh geh, nyungs bang lyis jyungshuk dyei geh, ge taiq kat. 23 Housoeh las Jew jens gas Mordekhai taiq shet cho lhyi chank kuot las hauh pwe ka zvn yau zvn pwe bweh los.
24 Jew dius jens dvnganh dah jeswus Agag vnyau vshih, Hamedatha lo Haman gas Jew jens lyis mhont tyamp das xiklyis Purim ge doeugoh las thyet dah buisnyeis nghuot. Nyamoq dvnyau gonh lyis sat tomh das zis lhaink khoq.Ref 9.24: Est 3.7 25 Nghuot laus eq Esther hwankti jyank mas loh taiq las hwankti ka zau dang lhaih thuq kat lyis, vthang ka Haman Jew jens lyis ma gis joeui da goeus cho nyah uhpui loqkyoq gas nyang yahge nyah loloeu jens gas lhangh sat zains mas lhangh tyamp zis tsain xauh. 26 Housoeh yvmvyah hau xent nyeih jens lyis Purim ge lui. Khasoeh ge lyis Mordekhai dah maussauh yahge nyamoq mas bweh goeus cho dvnganh gvng mas, 27 Jew jens gas hauh yvlyis nyamoq nyang xiklyis, nyamoq vnyau vshih jens yahge hank laus eq Jew bweh los das bang xiklyis lyi thungh kuot toh. Mordekhai taiq shet zis yah dvyhangteh zvn yau toeuq toh shishenh lyis hai aiq nyeih lyis top top chank kuot chah. 28 Mauxom khanghmuh yahge wus khanghmuh mas dah Jew yhenbang khanghmuh dah locaiq ehchen mha hau Purim pwe aiq nyeih lyis soh chah las jweh los das shishenh dvnganh mas kuot nyeis das xiklyis tsain thyet.
29 Hauh thang lhyi Abihail lonyi, hwankti nyhiq Esther yahge Mordekhai eq xiklyis Jew Mordekhai lhaih goeus dah Purim pwe cho lhyi Esther dah vmingh yah doengs nhang das xiklyis maussauh tsain chank lhaih. 30 Hauh maussauh gas Jew jens dvnganh dah nyeisgus tap las sauhtap lyis gas Persia munghdan mas 127 mauxom mha huon kat. Houka Jew jens lyis nyenstap cho yahge sam cho joq nhang mes. 31 Lho lha nyamoq xamxonh kham yoeus toh dah lyi yah dvyhangteh nyamoq yahge nyamoq dah vnyau vshih jens gas toeuq toh shishenh jweh lyis womkyi cho, kukxi cho kuot thang lhyi Purim pwe aiq nyeih lyis tsain chank kuot das zis taiq shet kat. Heika Jew Mordekhai yahge hwankti nyhiq Esther aiq yuk yah tying toh cho nghuot. 32 Esther dah zau dang gas, Purim pwe xiklyis lyi thungh lyis doengs nhang lha, sauhdain mas lhaih toh.