5
Hauh thang lhyi lvpe aiq yuk nghuot dah Hagai, Ido vnyau vshih Zekharia gas Yuda mau yahge Yerusalem mas nyeis Yuda jens lyis Israel Mangso dah nyings masyah lvpe pe dyei. Housoeh las Shealtiel lo Zerubabe yahge Yehozadak lo Yoshua gas toq las Yerusalem mas dah Mangso yhen lhyi doms tsuk xi. Mangso dah lvpe vzomh eq nyamoq yah dvgeh nyeis las nyamoq lyis bos pangh.Ref 5.2: Hag 1.12; Zek 4.6-9
Hauh shishenh lyis Uphrat lvng buiswvng tvp mas dah mungh zau Tatenai, Shetha Bozenai yahge nyamoq dah dyenschangh jens gas nyamoq jyank heisoeh ge los taiq, Haih Yhenmuh doms tsuk das zis yahge haih wusciank tyeh das cho hank taiq, ge nyei. Housoeh las ngamoq gas hai yhen kuot bang dah nyings taiq kyoh. Nghuot laus eq nyamoq dah Mangso nyoqjeih gas nyamoq lyis yoeuh gomh nyeis las, Yuda logis jens gas Yhenmuh doms tsuk muh lyis Dari jyank mas maussauh yoh huon lha, nyah jyank masyah phuk dang ma jweh los dvchank ma toh tyamp. Heika Uphrat lvng buiswvng tvp mas mungh zau Tatenai, Shetha Bozenai yahge nyah dyenschangh jens, Uphrat lvng buiswvng tvp mas nyeis bang gas hwankti Dari lyis lhaih huon kat maussauh nghuot.
Nyang lyis nyamoq huon maussauh heisoeh ge: Hwankti Dari gas nyenstap nyeis bas jungh.
Ngamoq gas Yuda mau mas kuhxing dah Mangso dah yhen yos mha jweh loh. Hauh mau mas bang gas Yhenmuh lyis tsan toh luk kuh yah tsuk las, yvm zis gas thyeh nghuot. Nyamoq gas ma no lo yomsoq zainsmuh yah kuot las nyamoq dah muh, nyap ung los nyeis yvlyis hwankti lhyi seq nhang.
Ngamoq hau logis jens lyis, Haih Yhenmuh tsuk aq, haih wusciank tyeh ci aq ge, hank taiq toh lah, oen nyei. 10 Nyamoq mas uhjyung jens dah nyings nah jyank yoh lhaih huon shoq eq nyei gyo. 11 Nyamoq ngamoq lyis phuk taiq zis gas, Ngamoq gas maukhung nyeisjvng Mangso dah jyeidwis jens nghuot. Xikpheh kuhxing dah Israel hwankti kuot toh dah Yhenmuh lyis doms tsuk nyeis. 12 Ngamoq dah phauh thyeih moq gas maukhung Mangso lhyi nhaiqyo nhang yvmvyah, nyang ngamoq lyis Khalde mau Babilon hwankti Nebukhaneza loq mas kyauh las nyang gas hauh Yhenmuh lhyi mhont, dius lyis gas Babilon pheh shwih jons loh.Ref 5.12: 2Hw 25.8-12; 2Ss 36.17-20; Yer 52.12-15 13 Nghuot laus eq Babilon hwankti Kuru gas nyang guon xi zvn lyis hai Yhensain dah Yhenmuh doms kuot das cho taiq toh.Ref 5.13: Ezr 1.2-11 14 Nebukhaneza gas Yerusalem Yhenmuh masyah yoeus las Babilon yhenmuh mas kat toh, Mangso yhen yah sen dah ngwis xing kyahsoe lhyi hwankti Kuru gas Babilon yhenmuh masyah yoeus thuq, nyang mungh zau kuot nhang toh soeu Sheshbaza loq mas kyauh kat. 15 Haih kyahsoe tsain yoeus loh aq, Yerusalem Yhenmuh mas kat toh las, Mangso dah Yhenmuh lhyi nyah joqyos mas doms kuot aq, ge. 16 Hai Sheshbaza nyang eq jweh los las Yerusalem mas Yhenmuh dah yhen vpom lhyi ci toh. Hauh zaih masyah gvshih jweh shoq ngamoq hauh yhen lhyi kuot nyeis, laus eq ma yoh dye shih, ge.
17 Housoeh las hwankti gyo nghuot lyis gas, Yerusalem mas hai Mangso dah Yhenmuh kuot das toeuh Kuru hwankti dyei toh lah? Babilon wus mas dah hwankti ziskwi mha bos dah comh maussauh lyis xo yoeuh las, hwankti ehnyet tap khyvlyis ngamoq jyank huon kat aq, ge bos.