7
Soetuon Cho Ni Goeus
Yhensain ngos lyis jis. Nyang taiq zis, Lvcang eh, heika ngos Yomzains Yhensain, Israel mau lyis taiq nyeis. Heika mau gonh xiklyis thank goeus.
Israel eh, thang thank zis jweh goeus, nvng ngah nhaiqyo cho xauh kham das: khasoeh ge lyis nvng kuot goeus cho xiklyis ngos nvng lyis soetuon nyeis. Nah vchoqh vlhauq wotwu xiklyis ngos nvng lyis tauh dyei das. Ngos nvng lyis ma lhuiq toh, nhaiqnyen cho ma chixoeuq das. Ngos nvng lyis, nvng kuot goeus dah vchoqh vlhauq muh gvng mas ngos nvng lyis joeng das. Housoeh ngos Yhensain nghuot yvlyis namoq seq das, ge.
Heika Yomzains Yhensain taiq nyeis. Nah thoq mas dyoqbis zainsmuh dvkoeuq thang lhyi dvkoeuq jweh los nyeis. Dye loh goeus, haih zis thank goeus. Nvng gas dye goeus. Hauh mau mas nyeis dah dius jens eh, namoq xiklyis thang thank zis jweh los. Boms mas pwe ma bos lo das shishenh ni los goeus, vnhunk nhunk cho kyingh dvnghuot.
Ngah nhaiqyo cho namoq thoq mas lvnyap huot khyoq das. Ngos namoq kuot goeus cho lhyi soetuon nyeis. Ngos namoq dah vchoqh vlhauq wotwu dvnganh xiklyis tauh dyei das. Ngos nvng lyis ma lhaiq kat das, nhaiqnyen cho ma chixoeuq das. Nvng kuot goeus dah vchoqh vlhauq wotwu gvng mas ngos nvng lyis joeng das. Housoeh lyis ngos gas Yhensain yahge nvng lyis joeng soeu nghuot yvlyis nvng seq das.
10 Israel xiklyis dyoqbis zainsmuh buisnyeis jweh los. Lhuotzo cho ka lho lho nghuot. Khwank cho nyhang thank nghuot goeus. 11 Lhuotzo cho ka zes lhung cho kuot thuq kat. Nyamoq zis cha ma nyet lo, nyamoq dah yoh khuiq cho, nyamoq dah yunghshop cho, nyamoq dah phunk bos cho eq ma nyet lo.
12 Shishenh jweh los, buisnyeis ni los, ungh cho, wis cho eq vjyuk ma bos lo das: khasoeh ge lyis Mangso dah joeng cho yuk khanghmuh thoq mas dvyih gyoh los das. 13 Mangso dah nhaiqyo zis gas yuk khanghmuh thoq mas joq yvmvyah soenghi jens gas nyamoq somh toh zis doms yoh shoq kang hank ma xing nyeis. Nyamoq dah yaunos gvng mas dvyuk eq kang ma dwis das. 14 Lvbuh muot las yuk khanghmuh cicont kuot laus eq jeszan das zis hank ma thuq loh. Khasoeh ge lyis Mangso dah nhaiqyo zis gas yuk khanghmuh thoq mas dvyih gyoh das.
Yaunos xiklyis Joeng Cho
15 Wus talhoeu mha jeszan nyeis. Yhen vkhau mha ka yomh yahge phanghkhauq joq. Pa mha nyeis soeu jeszan yvmas shei das; wus khau mha nyeis soeu hank laus eq phanghkhauq yahge yomh yah thank das. 16 Dvyhamh gas langhkhau mhayah khotjyauh jens dvn loh teh, boms mas phang luiq loh das. Dvnganhmoq gas nyamoq dah yaunos gvng mas noskyingh das. 17 Yuk khanghmuh dah loq gas lhyauh las phvlukchvp eq tsain nvn das. 18 Nyamoq gas yanghthung dyimis wuot las tyik tyik nvn das. Nyamoq dah uhloms tsain yuk tyamp zis xauh das las nyamoq nyoqnho ngelang gyoh das. 19 Nyamoq dah ngwis xing lhyi talhoeu mha mhotkhyot teh tyamp das. Khasoeh ge lyis Yhensain dah nhaiqlom dyis zis huot khyoq lyis hau ngwis xing yah nyamoq lyis ma yoh khyuot yoeus. Hau ngwis xing lhyi yhung lha nyamoq omes zis lyis nhaiq ma yoh tap nhang, womdau eq ma yoh tyink. Ngwis xing ka nyamoq lyis yaunos cho pheh dvshe loh. 20 Nyamoq gas nyamoq dah yungh dah shunkzis mas tsain khwank khoq laus eq nyamoq hauh yvlyis vchoqh vlhauq phvra kuot yvmas yhung. Housoeh yvmvyah Yhensain ka nyamoq dah zisyos lyis nyamoq hoeng yvpheh thaiq kat dyei.
21  Yhensain taiq, Ngos Lvbaus lyis yah nyamoq zis lhuot yoeus nhang das, lyi lhyweq bang lyis yah nyamoq dah zisyos dvnganh yoeus las vwot v-oeu kuot nhang das. 22 Ngah zisyos joqyos lyis lhoq lhoeuh las khyanktau jens houmha thyoq wvng zis yah vwot v-oeu kuot. Housoeh ngah nyoqnho nyamoq masyah lhaiq loh das.
23 Hauh mau gas suih huot cho yah dyingh joq, hauh wus gas lhuot zo cho yah dyingh joq yvmvyah shwih jons loh das zis shamjvng sont geh. 24 Ngos heimha ma gis thank dah dius nyau shwih los las namoq dah yhen lhyi sain loh nhang das. Ngos hau dius nyau jens lyis nyamoq paiq dah joqyos jens lyis lhoq lhoeuh nhang lhyi namoq dah yombos thank bang nghamhnywe joqyos dyuk tyamp das. 25 Yomgyau cho bweh los. Namoq nyenstap cho xo das laus eq khanhamp eq ma nyvng. 26 Dyoqbis zainsmuh dvkoeuq thang lhyi dvkoeuq chank los das. Loeus gang eq jeis soeh huot los das. Namoq lvpe jens lyis nyamoq cha nyvng zis dung pe nhang das. Phudyei bang gas dius jens lyis jyauh das zis cha ma bos. Logis jens eq joeui dyei das zis cha ma yoh. 27 Hwankti ka kuk das, hwankti lo jens gas nghamhloms cho ma bos lo. Dius jens gas gyuk zis yah nvn das. Ngos namoq lyis namoq kuot vgus joeng das, namoq gohyhamh lyis soetuon zis yah dvyhangteh ngos namoq lyis soetuon das. Heika ngos Yhensain nghuot zis namoq lyis chixoeuq das.