5
Ezekiel nyah Cam Thyet
1 Yhensain taiq, Lvcang eh, zuk dah uhyuk shamthoh yoeus aq, hauh zis yhung lha nah nhuotmi yahge cam dvnganh yuk lho lha jvng mas laiq las somh gvm khyoq toh aq.
2 Yerusalem lyis lhaink toh vlho dye kuot lyis, somh gvm dvgvm lyis hauh wus vkhau mha ngheq aq: gohtoeu dvgvm lyis nvng wus nghe yvmlhaink mas loh zoh lyis nah moengsa yah tu tyamp aq. Nyet shih vgvm lyis lyeis mas lhank tyamp aq. Ngos hauh yvlyis ngah moengsa yah chank khat das.
3 Hou mhayah dvmhauh yoeus las nah dyi thang chap yvmas koek toh aq.
4 Hauh thang lhyi hou mhayah dvmhauh doms yoeus las nyi mas doeuh kat las ngeh loh nhang aq. Hou mhayah nyi gas Israel dvnyau gonh mas dyos loh das.
5 Yomzains Yhensain taiq: Yerusalem lyis yoeuh aq. Ngos nyang lyis mungkvn dah vgungs mas toh. Nyah vyvm vwi mas gohtoeu mau jens yah tsain lhaink toh.
6 Nghuot laus eq Yerusalem gas ngos tyingtoh dang lyis tyi lha gomloeus toq. Nyang gas gohtoeu dius nyau jens thoq lyis zes lhung cho, nyah vyvm vwi mau mas nyeis bang thoq lyis zes las domsyos ma gyo cho chixoeuq. Yerusalem gas ngos tyingtoh dang lyis peq zis yah ngah lyi chank das zis ngoek.
7 Gvshih Yerusalem eh, ngos Yomzains Yhensain cha taiq nyeis zis gyo aq. Nvng gas ngah lyi lyis domsyos ma gyo, ngos tying dang ma chank gvng mas nvng gas nah vyvm vwi mas nyeis dah dius nyau jens thoq lyis yau zes dyei los. Nvng gas nah vyvm vwi mas dah dius nyau jens thoq lyis zes lhung los.
8 Housoeh las ngos Yomzains Yhensain taiq nyeis zis gas, Ngos gas nah jeswus nghuot. Ngos nvng lyis dius nyau jens dvnganh yoh nyvng yvmas soetuon das.
9 Nvng ngos hoeng dah cho dvnganh kuot goeus yvmvyah ngos Yerusalem lyis ngos khanhamp eq ma kuot ku, thang pheh eq ma doms kuot lo das dah joeng cho kuot das, ge.
10 Housoeh yvmvyah Yerusalem mas dah nyhiphoq gas nyamoq lo jens lyis zo das. Lo jens eq nyamoq nyhiphoq lyis zo das. Ngos namoq lyis joeng las kang dwis nyeis shih bang dvnganh lyis shot khanghmuh pheh sanh tyamp das.Ref 5.10: Kuk 4.10
11 Housoeh yvmvyah ngos kang dwis Mangso nghuot zis yah dvyhangteh heika Yomzains Yhensain dah dang nghuot. Nvng gas nah dah choqh phoh ma gis muh dvnganh yah ngah gyingshang joqyos lyis vwot v-oeu kuot yvmvyah ngos nvng lyis nhaiq ma nyen lo zan khyoq das.
12 Nah dius somh boms dvboms gas wus mas yomh yahge phanghkhauq yah shei das. Dvboms lyis wus nghe pheh moengsa yah jap khyoq das. Thang thank vboms lyis gas ngos lyeis mas sanh tyamp las nyamoq lyis moengsa yah khat das.
13 Ngos nhaiq shei shoq nvng ngah nhaiqyo las tsoeu cho xauh kham das. Haih zis dvnganh bweh los lyis, ngos Yhensain ka nvng lom ma luk cho gvng mas nhaiqlom dyis las heisoeh taiq goeus yvlyis nvng bon das.
14 Ngos nvng lyis thyoqpi das. Nah vyvm vwi mas nyeis dah dius nyau jens houmha suh lai bang yuk khanghmuh gas jwangh nyhap zis yah we we loh.
15 Ngos nvng lyis nhaiqyo zis yah tsoeu lha joeng lyis nah vwi vyvm mas nyeis dah dius nyau jens gyuk dvn das. Nyamoq nvng lyis hoeng zis yah yoeuh las nvng lyis yisnaus toeuq das.
16 Ngos nvng lyis zonoms dyei cho thyet tyamp das las yuot shet nhang das. Yuot shet zis gas, nvngnote 5.16 Nvng ge zis Hebre mas, Nyamoq, ge. lyis mhont das zis chuon dah nyo baiq kat lyis nos teh mus das.
17 Ngos namoq dah lo jens lyis sat das zis phanghkhauq yahge yewus nhang das, namoq lyis sat das zis yomh, lhuot zo cho yahge jeszan cho nhang das. Ngos Yhensain taiq goeus.Ref 5.17: Nyoq 6.8