45
Yhensain dah Gvmboms Mau
Dvkoq dvkoq xiklyis maunyeis gvm dyei lyis, dvgvm gas Yhensain lhyi dyei chah: houka xing choeu 10 main, lvm choeu 8 main nghuot. Hauh maunyeis chuq gas gyingshang chah. Haih maunyeis chuq mas dvshot 840 pe bos dah soehuqthunk gas Yhenmuh joqyos xiklyis nghuot chah. Hauh yvmlhaink yah yos 84 pe lvm joq chah. Haih maunyeis dvgohyih lyis xing choeu 10 main, lvm choeu 4 main keq chah: houmha gyingshang thank dah Yhenmuh joqyos bos das. Houka, Yhensain dah Yhenmuh mas nyang lyis phuqsoe dah phudyei bang xiklyis gvm toh, hauh mau mas dah gyingshang joqyos duot das. Houka nyamoq dah yhen yahge Yhenmuh xiklyis maunyeis bos das. Gohtoeu dvgohyih gas Yhenmuh mas muh zwi bang Lewi jens xiklyis vso maunyeis khyvlyis gvm toh zis nghuot. Houmha nyamoq nyeis das wus jens bos das. note 45.5 Hebre mas, nyamoq yvp 20 yoh das, ge bos.
Gyingshang joqyos dah thang lhyi 10 main xing lha 2 main lvm dah gohtoeu dvjoqyos gas Israel hank eq gis nyeis dah wus nyhenshang joqyos gvm toh.
Zaulo Xiklyis Maunyeis
Guon dah zaulo xiklyis eq nyeisjvng gvm toh. Gyingshang maunyeis dah buiswvng maukyo mhayah buiswvng pheh Mediteranean Thomh jweh shoq lvm loh das. Buisthuq maukyo mhayah hauh mau dah buisthuq maukyo jweh shoq lvm loh. Housoeh las hauh xing choeu ka Israel dvkoq xiklyis toeuq dyei dah maunyeis xing choeu yah doeusgoh. Haih maunyeis gas Israel mau mas guon nyeis dah zaulo jens yoh dah gvmboms nghuot. Housoeh las nyang dius jens lyis ma zaiq lo, nyet shih maunyeis Israel vkoq jens lyis sain nhang das.
Zaulo Xiklyis Lyi
Yomzains Yhensain taiq, Namoq Israel dah guon bang eh, namoq yaunos kuot zis svsoh nyangh goeus. Gyvzaiq gyvnang kuot cho yahge lhuot zo cho toh tyamp geh. Jus cho yahge lyi jus cho kuot geh. Namoq ngah dius jens lyis nyamoq mau masyah khanhamp eq ma doms gis khat thuq lo. Ngos Yomzains Yhensain namoq lyis haih zis taiq nyeis.
10 Yuk khanghmuh jus dah jvng yahge luh yhung chah.Ref 45.10: Lew 19.36
11 Vkyuk laiq dah epha yahge jeis laiq dah bat dvyih nghuot chah; homa gas houmha chi dah laiq ja nghuot las, dvhoma mas dvci epha yahge dvci bat yih goh.
12 Nah jvngshih gas o mha khyvlyis nghuot chah. Gera aiqci mha dvshekel, shekel khyukci mha dvmina bos chah.
13-15 Heika nvng dyei chah dah jyungshuk mas nges das vpom nghuot. Yhomh dah sunghso: 60 boms mas dvboms, Bali: 60 boms mas dvboms Tsanlun zains mas dah coeu: 100 boms mas dvboms dyei chah.note45.13 Hauh yvlyis bat khyvlyis laiq dyei chah. 10 bat = 1 homa = 1 kor Yvng: Israel dah katjang mas yvng aiqxo doeu mas dvdoeu mulas jyo jyungshuk, doeu gonh ngheq dyei gaunyhauq yahge nyenstap jyungshuk gaunyhauq chi los chah. Housoeh lyis nah yaunos khyuot zis xauh das. Ngos Yomzains Yhensain tying toh.
16 Hauh mau mas dius jens dvnganh gas Israel lyis guon nyeis zaulo jyank mas haih jyungshuk tsain chi los chah. 17 Lhamhmuh canh pwe, no nyeih yahge gohtoeu pwe jens mas Israel dvnyau gonh xiklyis doeu gonh ngheq phudyei gaunyhauq, jyo jyungshuk, zvbiq jyungshuk thyeq das zis gas hau zaulo dah yvwons nghuot das. Nyang gas Israel dah yaunos yoeus tyamp das xiklyis yaunos jyungshuk, jyo jyungshuk, dvnganh ngheq dyei jyungshuk yahge nyenstap jyungshuk dyei chah.
Pwe
(Dyu 12:1-20, Lew 23:33-43)
18 Yomzains Yhensain taiq, Nvng cangxeih lhamhmuh khyvp das vnyeih lyis nos ma bos noeulu dvdoeu phudyei zis yah Yhenmuh cheihshang chah. 19 Phudyei soeu ka hai yaunos jyungshuk suih dvkhamh yoeus las Yhenmuh khomh zains mas, phon thoq nyei thunk mas, khyamkhau vkhau puk pheh wvng dah khyam khomh cho zains mas tsain juot das. 20 Hauh lhamhmuh khyvp nyhet vnyeih lyis hank laus eq ma soh mathamh zangh kuot dah yaunos nyhenshang houyah dvyhangteh kuot chah. Heisoeh khyvlyis nvng Yhenmuh lyis gyingshang nhang toh das.
21 Namoq gas, cangxeih vkhyvp, dvci nyei vnyeih lyis Lhuiq Kat Pwe kuot xi das. Hau nyhet nyeih, yuk khanghmuh bicheih ma kat ohlhyoq zo das.Ref 45.21: Dyu 12.1-20; Gyu 28.16-25 22 Hauh pwe dah cangxeih vnyeih lyis hauh zaulo gas, nyah yaunos yahge dius jens dvnganh dah yaunos xiklyis phudyei das zis noeulu dvdoeu thuq chah. 23 Nyang gas hauh pwe nyhet nyeih top, dvnyeih lyis nos ma bos dah noeulu nyhet doeu, yvnglus nyhet doeu Yhensain lhyi doeu gonh gonh ngheq phudyei chah. Nyang dvnyeih dvnyeih yaunos jyungshuk khyvlyis beq lus dvdoeu eq phudyei chah. 24 Nyang noeulu yahge yvnglus phudyei lyis dvdoeu xiklyis jyo jyungshuk dvpungh, tsanlun coeu dvjoi dvkhyamh bos chah.
25 Nyhet vkhyvp dvci oeng vnyeih lyis xi kuot dah gyung cho Phunk Pwe mha nyhet nyeih top zaulo gas dvnyeih lyis yaunos xiklyis dvyhangteh phudyei chah, dvyhangteh dvnganh ngheq dyei jyungshuk phudyei chah, jyo jyungshuk yahge tsanlun coeu dvyhangteh bos chah.Ref 45.25: Lew 23.33-36; Gyu 29.12-38