42
Yhenmuh Nvm mas Aiq Yhen
Hauh thang lhyi hauh dius yuk ngos lyis khyamkhau nghe puk pheh shwih loh las, Yhenmuh mautsung pheh joq dah yhen mha shwih wvng loh. Houka Yhenmuh buiswvng shot vthang mha dah yhen yah ma we. Haih yhen ka xing choeu 168 pe, lvm choeu 84 pe nghuot. Dvshot gas Yhenmuh xing choeu yah byi las 34 pe lywas dah ngo joqyos pheh xoeu lha, gohtoeu dvshot gas khyamkhau nghe puk dah luk nyhoeuh yvpheh xoeu toh. Hauh yhen ka vkeq somh keq thoq mas ci toh. Dvkeq dvkeq gas o keq thoq lyis nungs jik wvng las ci toh. Haih yhen dah mautsung chank yah 16 pe lywas las 168 pe xing dah cholo dvkhvt bos. Hauh shot pheh wumuk tsain bos. Haih yhen dah thoq keq mas dah yvp jens gas, vlvt keq, o keq mas dah yvp jens thoq lyis zes zvvs joq: khasoeh ge lyis houka nungsjik wvng las tsain ci toh. Hai somh keq gonh mas dah yvp jens gas, haih khyam khau mha dah gohtoeu yhen jens teh zains yah ma thuk, vmheq thoq mas dvnghuot. 7-8 O keq mas hau yhen dah nghe tyoyvm xing choeu dvgohyih gas 84 pe nghuot. Nyet dah 84 pe mas yvp tsain bos. Nyhang thyoh keq mas yhen xing nyhoq yvp jens dyingh bos. 9-10 Haih yvp jens dah vjeis, buisthuq shot yhen thang, khyamkhau tyoyvm xi yvmas khyamkhau nghe puk pheh wvng dah wumuk bos. Yhenmuh dah mautyi shot pheh, buiswvng pheh Yhenmuh vthang mha dah yhen yah ma we yvmas, hau dvyhangteh dah yhen joq. 11 Hauh yvp jens dah xik mas mautsung shot pheh bos dah cholo teh dah cholo dvkhvt bos. Houka keq cho, vzwvng yahge wumuk jens dvyhangteh bos. 12 Mautyi shot pheh dah yhen, yvp jens dah vjeis, buisthuq pheh vthang tyoyvm xi yvmas khomh dvkoeuq bos.
13 Hauh dius yuk ngos lyis taiq, Haih yhen aiq yhen yah gyingshang. Yhensain xikkhonh mas wvng dah phudyei bang gas houmha gyingshang jyungshuk tsain zo. Khasoeh ge lyis hauh yvp jens gas gyingshang, phudyei bang gas gyingshang thank jyungshuk houmha toh das. Jyo jyungshuk yahge yaunos, nghuot ya yobos khyuot jyungshuk nyhenshang dyei dah lomhxangh tsain toh das. 14 Phudyei bang Yhenmuh khau mha nyeis las khyamhkhau nghe puk pheh thuq loh mes lyis, nyamoq Yhensain lhyi phuqsoe uhlyis wuot dah gyingshang thau lhyi haih yvpkhau mha toh khoq chah. Nyamoq dius phung huom yvmas ma thuq loh shih lyis gohtoeu dyimis thaiq wuot chah, ge.
Yhenmuh Joqyos lyis Keq
15 Hauh dius yuk Yhenmuh vkhau pheh joqyos lyis dye keq lyis, nyang ngos lyis buisthuq khyam khomh cho shwih thuq las nghe puk joqyos lyis keq. 16 Nyang keqseh yoeus las buisthuq pheh keq lyis houka 840 pe nghuot. 17-19 Hauh thang lhyi nyang mautsung pheh, mautyi pheh yahge buiswvng pheh tsain keq lyis houka dvyhangteh 840 pe xing. 20 Housoeh ciank lyis yvmlhaink dvshot 840 pe soehuq thunk yah lhaink toh. Hauh ciank gas gyingshang joqyos yahge ma gyingshang joqyos lyis gvn toh.