32
Egutu Hwankti Mvnjung Teh
1 Ngamoq jonsdoeus loh zis dvci aiq vzvn, dvci aiq vkhyvp das vnyeih lyis Yhensain ngos lyis jis.
2 Nyang taiq, Lvcang eh, Egutu hwankti lhyi zaih nhang cho vlhomuh dyei aq. Hai ngah jyank mas dah loeus nyang lyis dyei aq. Nvng gas dius nyau jens mas khangkhyi teh kuot goeus, nghuot laus eq nvng gas jeislvng mas tyauq loh dah mvnjung teh zes doeus. Nah khyei yah jeis lyis nang nghon lha jeislvng jens lyis lhoq lhoeuh.
3 Dius nyau jens nyoshoq zain lyis ngos nvng lyis ngah nyho yah doeuh las nyamoq lyis yah nvng lyis jyankyvm mas she thuq los nhang das.
4 Ngos nvng lyis tungyos mas kih tyamp toh das las nghoq jens yahge mungkvn gaunyhauq jens lyis nah mvng yah tsain jo nhang das.
5 Ngos nah shoh bop mvng yah boms jens yahge langhkhau jens mas tsain nghop das.
6 Ngos nah suih lyis boms jens mas goms shoq, jeislo lvng jens dyingh shoq huot kat das.
7 Ngos nvng lyis mhont uhlyis, ngos maukhung lhyi nghop das las kyi lhyi eq tsain buot tyamp das. Ngos buis lyis jyommauh yah gos las lhamhmuh eq ma bvng lo das.Ref 32.7: Esa 13.10; Mat 24.29; Mak 13.24-25; Luk 21.25; Nyoq 6.12-13, 8.12
8 Ngos maukhung mha dah bvng zis dvnganh yoeus tyamp las nah mungkvn lyis chuot zis yah nghop das. Ngos Yomzains Yhensain taiq goeus.
9 Ngos namoq ma xauhgyo ku dah mau chank yah namoq dah dyoqbis cho taiq hoeuh lyis, dius nyau nyoshoq chiqjyen das.
10 Ngos nvng lyis kuot cho ka dius nyau nyoshoq lyis mauh dvn nhang das. Ngos sham yings lyis hwankti jens gyuk dvn das. Namoq gyoh buisnyeis lyis nyamoq dvnganh gas nyamoq kang xiklyis gyuk nvn das.
11 Yomzains Yhensain ka Egutu hwankti lhyi taiq. Babilon hwankti dah sham nah thoq mas jweh das.
12 Ngos lhoeng dah dius nyau jens mas dah jeslo jens lyis nyamoq dah moengsa she nhang lha namoq dah dius jens dvnganh lyis sat das. Namoq dah dius dvnganh eq, namoq hwank nyeis dah vyhang dvnganh monh tyamp das.
13 Jeis nyoshoq joq dah jeislvng yvm mas tsain nyeis dah nah noeu jens dvnganh lyis ngos sat das. Housoeh lyis houmha dius eq noeu eq jeis ma lhoq nghon lo das.
14 Ngos nah jeis lyis doengs nhang lha gying los das las nah jeislvng jens samlo yaus das. Ngos Yomzains Yhensain taiq goeus.
15 Ngos Egutu lyis jyamhjyuklhyuk tyeihgesles kuot las houmha nyeis bang dvnganh lyis mhont lyis, ngos Yhensain nghuot yvlyis nyamoq seq das.
16 Hai zaih nhang dang gas uhngauh dah lvkhyank bweh los. Dius nyau jens dah vmesbih jens gas Egutu mau yahge nyah dius jens dvnganh xiklyis kuk ngaus das. Ngos Yomzains Yhensain taiq goeus. ge.
Shei Mau
17 Ngamoq jonsdoeus loh zis dvci aiq vzvn, cangxeih vkhyvp dvci oeng vnyeih lyis Yhensain ngos lyis jis.
18 Nyang taiq, Lvcang eh, Egutu dius jens nyoshoq xiklyis kuk geh. Nyamoq lyis gohtoeu yomsoq bos dah dius nyau jens yah dvgeh shei mau mas khyoq kat geh.
19 Nyamoq lyis taiq aq,
Nvng gas gohyuk thoq lyis zes yungh oen nghamh lhyeh?
Namoq gas Shei mau mas gyoh das las,
mangso ma bos bang mas joq das.
20 Egutu dius jens gas, jes mas sat zis xauh bang yah dvgeh gyoh das. Moengsa ka Egutu yahge nyah dius jens dvnganh lyis she thuq kat das zis cicont nghuot.
21 Kuh thank thoeuqzoe jens yahge Egutu shot pheh jeszan bang gas Egutu dius jens lyis shei mau mas jeshuh langh das. Nyamoq kaiq zis gas, Jes mas sat xauh dah mangso ma bos bang gas heimha gyoh los goeus las, nyamoq heimha joq, ge.
22 Asiria gas thyimha nghuot, nyah jeslo jens dah lop yah tsain lhaink toh. Nyamoq dvnganh gas jes mas sat zis xauh bang nghuot.
23 Nyamoq dah lop gas shei mau pheh noq thank vkant mas nghuot. Nyah jeslo jens dvnganh jes mas gyoh goeus. Nyamoq dah lop gas nyah lopkhyung yvmlhaink joq. Nghuot laus eq xikpheh nyamoq gas kang dwis mau lyis kyuk tant goeus.
24 Elam eq nyah jeslo jens dah lop yvmlhaink joq yvmas nghuot. Nyamoq dvnganh jes mas sat xauh bang nghuot las vthyoh ma tyomh, shei mau mas tsain gyoh loh. Nyamoq kang dwis yvmas gyukphoh zis kuot khoq laus eq gvshih nyoqnho ngelang gyoh zis yah shei joq.
25 Elam gas jes mas sat xauh bang yah dvgeh lains joq. Nyah jeslo jens dah lop gas nyah yvmlhaink mas tsain joq. Nyamoq dvnganh gas vthyoh ma tyomh bang, jes mas shei bang tsain nghuot. Nyamoq kang dwis yvmas gyukphoh kuot khoq laus eq gvshih nyoqnho ngelang gyoh zis yah shei joq. Nyamoq lop gas jes mas sat xauh bang yah dvgeh joq.
26 Meshek yahge Tubal moq eq houmha nghuot las, nyamoq dah jeslo jens lop yah tsain lhaink toh. Nyamoq dvnganh gas vthyoh ma tyomh bang, jes mas sat xauh bang nghuot. Nyamoq gas kang dwis bang lyis kyuk tant khoq bang nghuot.
27 Nyamoq gas gohlhain dah seqlyes jens lyis teh nyoqnho ngelang dyei khyvlyis yoh nyhop das zis ma nghuot. Nyamoq gas jesgungs dyingh dyingh yah shei mau mas gyoh loh. Nyamoq dah moengsa lhyi uhkhoeuq khoeuq, gos lyis nyamoq gungs thoq mas kih toh. Hauh seqlyes jens gas nyeisjvng thoq mas dwis nyeis bang lyis gyukphoh zis kuot das yomsoq dyingh dyingh bos khoq.note 32.27 Gos lyis Hebre mas yaunos ge bos.
28 Houka Egutu jens gas vthyoh ma tyomh, jes mas sat zis xauh bang mas khasoeh thungh thyi toh zis nghuot.
29 Edom gas houmha nyah hwankti jens yahge guon bang yah dvgeh nghuot. Nyamoq gas yomsoq bos jeslo jens nghuot khoq, nghuot laus eq gvshih gas shei mau mas jes mas sat zis xauh dah vthyoh ma tyomh bang yah dvgeh joq.
30 Houmha mautsung pheh dah zaulo jens dvnganh bos. Sidon bang dvnganh bos. Nyamoq yomsoq gas gyukphoh kuot khoq, nghuot laus eq gvshih gas, nyamoq nyoqnho ngelang gyoh zis yah jes mas sat xauh bang, vthyoh ma tyomh bang yah dvgeh shei mau mas joq. Nyamoq shei mau mas gyoh bang dvgeh xoqphuh.
31 Hai jes mas sat xauh bang dvnganh dah cho ka Egutu hwankti yahge nyah jesphung lhyi nhaiqtaink dyei, ge Yomzains Yhensain taiq.
32 Ngos Egutu hwankti lhyi yah dwis nyeis bang lyis gyukphoh zis kuot nhang. Nghuot laus eq nyang yahge nyah jesphung ka sat xauh las jes mas shei dah vthyoh ma tyomh bang yah dvgeh lains joq das. Yomzains Yhensain taiq goeus, ge.