29
Egutu lyis Tyi lha Pe
1 Ngamoq jonsdoeus loh zis dvci vzvn, dvci vkhyvp, dvci aiq vnyeih lyis Yhensain ngos lyis jis.Ref 29.1—32.32: Esa 19.1-25; Yer 46.2-26
2 Nyang taiq, Lvcang eh, Egutu hwankti lhyi taiq hoeuh aq. Nyang yahge Egutu dvmau gonh joeng zis khasoeh xauh das cho nyang lyis taiq kyoh aq.
3 Heika Yomzains Yhensain Egutu hwankti lhyi taiq kyoh nyeis cho nghuot yvlyis taiq aq. Ngos nah jeswus nghuot. Nvng jeis mas nyeis dah mvnjung zainsmuh, nvng taiq lyis Nile lvng gas nvng kuot tohnote 29.3 Nvng kuot toh, ge zis Hebre mas, Nvnyang kuot toh, ge. las nah zis nghuot, ge.
4 Ngos nah am chank nghweh kat las nah jeis mas dah oengdoq jens lyis nvng mas tsain tap das. Housoeh ngos nvng lyis nvng mas dap dah oengdoq jens yah dvgeh Nile lvng masyah she thuq yoeus das.
5 Ngos nvng yahge hau oengdoq dvnganh lyis sihyos mas doeuh tyamp toh das. Nah gungsdom nyeisjvng mas lains joq las nvng lyis hank eq ma nyhop. Ngos hauh yvlyis nghoq jens yahge gaunyhauq xiklyis zonoms dyei das.
6 Housoeh lyis Egutu dius jens dvnganh ngos Yhensain nghuot yvlyis seq das.Ref 29.6: Esa 36.6
Yhensain taiq, Israel jens gas namoq Egutu dius jens lyis pangh das xiklyis nges. Nghuot laus eq namoq gas nhuk dah lhamloq thoq lyis ma zes gis.
7 Nyamoq nvng lyis nges lyis nvng jap loh las nyamoq dah loqsanpom lhyi thauh zis yah nyamoq kvtoq lhaiq loh. Nyamoq thyikdom yhik loh nhang.
8 Housoeh lyis ngos Yomzains Yhensain nvng lyis taiq nyeis, ngos nvng lyis moengsa yah zan das zis jesphung yoh. Nyamoq gas nah dius jens yahge nah gaunyhauq jens lyis sat das.
9 Egutu mau gas, cha ma joq dah nyeisgyih yos bweh das. Housoeh lyis Ngos Yhensain nghuot yvlyis nvng seq das.
Khasoeh ge lyis Nile lvng lyis nvng kuot toh las nah zis nghuot ge taiq goeus.
10 Ngos gas nvng yahge nah Nile lvng dah jeswus nghuot. Ngos Egutu dvmau gonh, mautsung pheh Migdol wus masyah mautyi pheh Aswan wus jweh shoq, Ethiopia maukyo chank yah nyeisgyih yos kuot das.
11 Dius cangsoeu eq, gaunyhauq eq houmha ma suh lai das. Nyeici zvn top houmha cha eq ma nyeis das.
12 Ngos Egutu lyis mungkvn mas jyamhjyuklhyuk mus thank dah mau kuot das. Egutu wus jens gas nyeici zvn dyoq gyoh joq das. Gohtoeu wus jens thoq lyis zes las dyoq gyoh joq nhang das. Ngos Egutu bang lyis yaukyenh bang kuot das. Nyamoq gas mau khanghmuh mas phang yenh las gohtoeu dius jens mas nyeis das.
13 Yomzains Yhensain taiq, Nyeici zvn thang lhyi, ngos Egutu jens lyis ngos nyamoq lyis sanh tyamp dah dius nyau jens masyah doms shwih tauh los das.
14 Ngos nyamoq lyis nyamoq dah yhen cauh, Egutu mautyi pheh nyeis nhang das. Houmha nyamoq gas yomnhuk dah munghdan,
15 yomnhuk thank munghdan nghuot das. Nyamoq gas gohtoeu dius nyau jens lyis khanhamp eq ma doms guon das. Ngos nyamoq lyis yomnhuk nhang lha nyamoq khanhamp eq dius nyau jens lyis ma doms guon lo das.
16 Israel jens eq nyamoq lyis pangh das xiklyis khanhamp eq ma doms nges lo das. Egutu dah uhpui loqkyoq gas, Israel jens nyamoq lyis khau zis kha iq shuot cho nghuot yvlyis soh nhang das. Housoeh lyis ngos Yomzains Yhensain nghuot yvlyis Israel jens seq das, ge.
Nebukhaneza zan ung das
17 Ngamoq jonsdoeus loh zis aiqci nyhet vzvn, cangxeih vkhyvp, das vnyeih lyis Yhensain ngos lyis jis.
18 Nyang taiq, Lvcang eh, Babilon hwankti Nebukhaneza gas Taire wus lyis yomkat los zan. Nyang nyah jeslo jens lyis hou iq lyei dah yvwons wons nhang lha nyamoq dah uhloms buot cwe, kvtoq eq gyik cwe. Nghuot laus eq Nebukhaneza yahge nyah jesphung ka Taire lyis zan masyah vmyat cha ma bos.
19 Housoeh las heika ngos Yomzains Yhensain taiq nyeis zis nghuot. Ngos hwankti Nebukhaneza lyis Egutu mau kyauh nyeis. Nyang gas hau yvlyis lvnyhvp thyoq las Egutu dah yoh khuiq cho lhyi nyah jesphung dah uhkung phauh khyvlyis yoeus das.
20 Nyang gas nyah jesphung yah ngah xiklyis muh wons goeus las ngos nyang lyis Egutu mau dyei. Ngos Yomzains Yhensain taiq goeus.
21 Hauh buisnyeis lyis ngos Israel jens lyis yom doms bos nhang das. Ezekiel eh, ngos nvng lyis yuk khanghmuh yoh xauhgyo yvmas taiq nhang das. Housoeh ngos Yhensain nghuot yvlyis nyamoq seq das, ge.