20
Dius toeu nghank cho
1 Heika ngamoq jonsdoeus loh zis nyhet vzvn, oeng vkhyvp dah dvci vnyeih nghuot. Israel dius phung mha dah uhshe bang dvyhamh Yhensain dah ehnyet cho nyei gyo das xiklyis ngah xikkhonh mas los tsain tsung toh.
2 Hauh thang lhyi Yhensain ngos lyis jis.
3 Nyang taiq, Lvcang eh, Haih uhshe bang lyis jis las Yomzains Yhensain heisoeh ge oen taiq kyoh aq. Namoq ngah ehnyet lyis los nyeigyo ma nghuot lhyeh? Ngos jyoengh dwis nyeis Mangso nghuot zis yah dvyhangteh, ngos namoq lyis cha ma nyeigyo nhang das. Ngos Yomzains Yhensain taiq goeus.
4 Lvcang eh, nvng nyamoq lyis soetuon das zis cicont nghuot goeus lah? Nyamoq lyis soetuon aq. Nyamoq dah phauh thyeih moq kuot dah vchoqh vlhauq cho lhyi taiq kyingh las soh nhang aq.
5 Ngos Yomzains Yhensain cha taiq zis nyamoq lyis taiq kyoh aq. Ngos Israel lyis khyen yoeus uhlyis ngos nyamoq yah dangthoengh toh. Egutu mas ngos ngah gungs nyamoq lyis thuqxoeuq las ngos gas Yhensain, namoq dah Mangso nghuot, oen taiq kyoh.Ref 20.5-6: Dyu 6.2-8
6 Ngos nyamoq lyis Egutu masyah shwih thuq las, ngos nyamoq xiklyis khyen toeuq toh mau, mau dvnganh mas gis thank las, nyeis coeu bos dah mau mas shwih wvng das oen ngos nyamoq lyis dangthoengh toh.
7 Ngos nyamoq lyis, nyamoq ngwis dah vchoqh vlhauq phvra lyis tyamp das zis yahge ma jus dah Egutu mangso yah nyamoq nyang gungs lyis vwot v-oeu ma kuot das zis taiq goeus. Khasoeh ge lyis ngos gas Yhensain, nyamoq dah Mangso nghuot.
8 Nyamoq ngos lyis gomloeus toq, domsyos gyo das zis ngoek. Nyamoq dah vchoqh vlhauq phvra lyis ma doeuh tyamp, nghuot ya Egutu mangso jens lyis ma tyamp. Housoeh las Egutu mas ngos ngah nhaiqyo cho nyamoq thoq mas dyingh dyingh kham nhang das zis cicont nghuot goeus.
9 Nghuot laus eq ngos ma kuot, nyamoq mas nyeis bang xikkhonh mas ngah nyings lyis goessang cho she los das las, ngos Israel jens lyis Egutu masyah shwih thuq das oen taiq hoeuh.
10 Housoeh ngos nyamoq lyis Egutu masyah sihyos pheh shwih los.
11 Houmha ngos nyamoq lyis ngah tyingtoh dang dyei las ngah lyi jyauh: houka lyi chank soeu hank laus eq dwis nyeis das.Ref 20.11, 13: Lew 18.5
12 Nyamoq lyis tsingh-kan nhang soeu ka ngos Yhensain nghuot yvlyis nyamoq taiq Kyingh khyvlyis ngos yahge nyamoq jo mas vlho, No nyeih lyis chank das zis ngos nyamoq lyis dyei toh.Ref 20.12: Dyu 31.13-17
13 Nghuot laus eq sihyos mas yangh nyamoq ngos lyis gomloeus toq. Nyamoq ngah lyi thyoq, ngah tyingtoh dang lyis eq peq tyamp. Houka hauh zis tsain chank soeu hank laus eq dwis nyeis das. Nyamoq No nyeih lyis shoqlang ma phauh ma nyang kuot. Hau sihyos mas ngos nyamoq lyis ngah nhaiqyo cho kham nhang lha mhont das zis cicont nghuot.
14 Nghuot laus eq ngos nyamoq lyis ma mhont. Israel jens lyis Egutu masyah shwih los yvlyis nyvng dah dius nyau mas bang ngah nyings lyis ma phauh ma nyang kuot zis ma xauh shoq ngos kuot.
15 Housoeh ngos nyamoq lyis dyei toh goeus, mau dvnganh mas gis thank, nyeis coeu bos las dis dah mau mas ma shwih loh das oen ngos sihyos mas nyhen goeus.Ref 20.15: Gyu 14.26-35
16 Nyamoq ngah tyingtoh dang lyis peq, ngah lyi thyoq, No nyeih lyis lhoq lhoeuh, nyamoq dah phvra lyis paiq mes yvmvyah ngos nyhen goeus.
17 Nghuot laus eq ngos nyamoq lyis nhaiqnyen las, hau sihyos mas ma sat das oen nghamh thyet.
18 Hauh gungsthaiq ngos nyamoq mas dah loyvm jens lyis, Namoq dah phauh thyeih moq kuot toh dah lyi lyis vchank goh, nyamoq dah lyi thungh lyis vchank goh, nyamoq dah phvra yah namoq nyang gungs lyis vwot v-oeu vkuot goh oen zaih nhang.
19 Ngos Yhensain, namoq dah Mangso nghuot las ngah lyi yahge ngos tyingtoh dang lyis domsyos gyo geh.
20 Ngah No Buisnyeis lyis gyingshang nhang geh. Houka yang kuot toh dah thanghchvp vlho nghuot das las, ngos gas Yhensain, namoq dah Mangso nghuot yvlyis soh nhang.
21 Nghuot laus eq hauh caiq mas bang ngos lyis gomloeus toq. Nyamoq ngah lyi thyoq las ngos tyingtoh dang ma chank. Houka chank kuot soeu hank laus eq dwis nyeis das cho nghuot. Nyamoq ngah No nyeih lyis eq lhoq lhoeuh. Housoeh las hau sihyos mas ngos nyamoq lyis ngah nhaiqyo cho kham nhang lha dvnganh sat das zis cicont nghuot.
22 Nghuot laus eq ngos ma sat. Nyamoq lyis Egutu masyah shwih los yvlyis nyvng dah dius nyau jens ngah nyings lyis ma phauh ma nyang kuot zis ma xauh shoq ngos kuot.
23 Housoeh las sihyos mas ngos nyamoq lyis nyhen toh cho gohtoeu dvkoeuq kuot. Houka ngos nyamoq lyis mungkvn gonh mas sanh tyamp das oen zis nghuot.Ref 20.23: Lew 26.33
24 Khasoeh ge lyis, nyamoq ngos tyingtoh dang lyis peq goeus, ngah lyi thyoq, ngah No nyeih lyis lhoq lhoeuh las nyamoq dah phauh thyeih moq phuqsoe goeus dah hau dvyhangteh phvra lyis tsain paiq.
25 Hauh thang lhyi ngos nyamoq lyis ma gis dah lyi dyei, kang ma yoh dwis nhang dah tyingtoh dang dyei toh.
26 Ngos nyamoq lyis nyamoq nyang dah jyungshuk yah vwot v-oeu bweh nhang. Ngos nyamoq lyis nyamoq dah loxeih lyis phudyei nhang. Heika nyamoq lyis joeng las ngos gas Yhensain nghuot yvlyis chixoeuq.
27 Housoeh las Lvcang eh, ngos Yomzains Yhensain Israel jens lyis cha taiq nyeis zis nyamoq lyis taiq kyoh aq. Heika nyamoq dah phauh thyeih moq nyamoq dah lom ma luk zis yah ngos lyis laihwangh zis gohtoeu dvcho nghuot.
28 Ngos nyamoq lyis dyei das oen dangthoengh toh dah mau mas shwih los. Nyamoq gas jing nyhang jens yahge saiqnyaus zains jens tsain nyvng lyis dvnganh mas lomhxangh tsain lainh. Nyamoq lomhxangh tsain ngheq zis yah eq, zvbiq lyis shuk phoh jyungshuk khyvlyis huot zis yah eq ngos lyis nhaiqyo nhang.
29 Ngos nyamoq lyis, Hai namoq loh dah nyhang joqyos gas cha tsain nghuot, oen nyei. Housoeh hou mhayah hauh joqyos lyis, Nyhang joqyos ge tsain lui goeus.
30 Ngos cha taiq nyeis zis gvshih Israel jens lyis taiq kyoh aq. Namoq gas namoq dah phauh thyeih moq kuot goeus, hau dvyhangteh dah yaunos kuot las nyamoq dah phvra thang mha chamus tsain chank wuih loh?
31 Namoq khvnyhik jweh shoq hau dvyhangteh dah jyungshuk dyei las, dvyhangteh dah phvra lyis namoq lo jens nyi mas ngheq phudyei zis yah namoq nyang gungs lyis vwot v-oeu kuot. Lho lha namoq Israel jens ngah ehnyet cha nghuot yvlyis los nyei nyeis shih. Jyoengh ngos Yomzains Yhensain, dwis nyeis Mangso nghuot zis yah dvyhangteh, ngos namoq lyis cha eq ma nyei nhang das.
32 Namoq gas gohmau mas nyeis bang yahge gohnyau bang teh bweh mes ge nghamh, saiq yahge luk lyis paiq das ge nghamh. Nghuot laus eq hauh zis khanhamp eq ma gis bweh das.
Yhensain Joeng, Khyuot dyei
33 Jyoengh ngos Yomzains Yhensain nyang nyeis Mangso nghuot zis yah dvyhangteh, ngos nhaiqyo zis yah ngah yomsoq dvnganh yah, ngah yombos loq yah namoq lyis guon das oen zaih nhang.
34 Ngos namoq dyos joq dah mau dvnganh masyah namoq lyis xwih tsainh las shwih tauh los uhlyis ngah yomsoq yahge nhaiqyo cho chixoeuq das.
35 Ngos namoq lyis dius nyau jens dah sihyos mas shwih los das las, houmha ngos namoq xikkhonh mas namoq lyis soetuon das.
36 Ngos namoq phauh thyeih moq lyis Sina Sihyos mas dang thang thyet zis yah dvyhangteh gvshih ngos namoq lyis thyet das, ge Yomzains Yhensain taiq.
37 Ngos namoq lyis toek toek zwi das las ngah thanghchvp lyis domsyos gyo das cho kuot das.
38 Ngos namoq masyah gomloeus toq bang yahge yaunos kuot bang lyis yoeus tyamp das. Ngos nyamoq lyis gvshih nyamoq nyeis mau masyah yoeus tyamp das. Nghuot laus eq nyamoq lyis Israel mau mas ma tauh los nhang das. Housoeh lyis ngos Yhensain nghuot yvlyis namoq seq das.
39 Yomzains Yhensain taiq, gvshih Israel jens dvnganh eh, namoq nyang nhaiqdoeus zo geh, tsoq las phvra lyis phuqsoe geh. Nghuot laus eq ngos namoq lyis zaih nhang bah. Houka hauh thang lhyi namoq ngos lyis domsyos gyo chah los das. Housoeh namoq phvra lyis jyungshuk dyei zis yah ngah gyingshang nyings lyis ma chungh cho no lo das.
40 Hauh mau mas Israel dah boms nyhang, ngah gyingshang boms thoq mas, namoq Israel dius jens dvnganh ngos lyis los paiq das. Ngos namoq lyis nhaiqdoeus das las, houmha namoq dah phudyei, namoq dah gis thank jyungshuk, yahge namoq dah gyingshang jyungshuk chi los das zis sang das.
41 Namoq dyos sanh joq dah mau masyah namoq lyis dvgeh tsainh las shwih los thang lhyi, namoq ngheq dyei dah phudyei lyis lhom yoeus das. Housoeh dius nyau jens gas, ngos gyingshang yvlyis nyvng das.
42 Ngos namoq dah phauh thyeih moq lyis dyei das oen dangthoengh toh dah Israel mau mas namoq lyis shwih tauh los lyis ngos Yhensain nghuot yvlyis namoq seq das.
43 Hauh thang lhyi namoq kuot dah nyoqnho ngelang gyoh zis dvnganh yahge namoq nyang gungs lyis khasoeh vwot v-oeu kuot yvlyis soh das. Namoq kuot dah ma gis cho dvnganh gvng mas, nvnyang gungs lyis vchoqh vlhauq mus das.
44 Israel dius jens eh, ngos namoq lyis ngos hank nghuot zis chixoeuq das zis kuot. Housoeh lyis namoq gas ngos Yhensain nghuot yvlyis seq das. Nghuot laus eq namoq dah lhung cho, ma gis dah wotwu yah dvyhangteh kham vvng yvlyis ma kuot, ge Yomzains Yhensain taiq goeus.
Mautyi pheh nyi Ngeh
45 Yhensain ngos lyis jis.
46 Nyang taiq, Lvcang eh, mautyi pheh yoeuh kat aq, mautyi shot pheh tyi lha taiq aq, mautyi pheh saiqkhyam lhyi tyi lha lvpe pe aq.
47 Yomzains Yhensain cha taiq nyeis zis xauhgyo das zis mautyi saiqkhyam lhyi taiq kyoh aq. Ngos nvng mas nyi tap kat nyeis, hau nyi gas nvng mas dah saiqzains kyuk laus nyaus laus dvnganh ngeh tyamp das: hauh yvlyis cha yah eq ma yoh sat. Hauh zis mautyi mhayah mautsung pheh ngeh loh das. Yuk khanghmuh hauh nyilhyam gywes zis soh das.
48 Hauh nyi lyis ngos Yhensain ngheq kat las hank eq ma yoh sat yvlyis dvnganhmoq nyvng das, ge.
49 Ngos gas, Yomzains Yhensain eh, ngos lyis hauh zis vtaiq nhang. Yuk khanghmuh gas ngos lyis vjangh wishomp shomp ge tsain lop nyeis, oen.