16
Lom ma luk Yerusalem
Yhensain ngos lyis doms jis. Nyang taiq, Lvcang eh, Yerusalem lyis nyang kuot goeus dah vchoqh vlhauq muh tuonh shet aq. Yerusalem lyis Yomzains Yhensain cha taiq nyeis yvlyis taiq kyoh aq. Nvng gas Khanan mau mas khoeu los. Nah uwus gas Amori dius, ungwes gas Hiti vmesbih nghuot. Nvng khoeu los lyis nah choqh twih hank ma thyet, nvng lyis coh yah hank ma buot cheih dyei, shipu hank ma lyet dyei. Nah nyhenshang housoeh kuot das zis nhaiq hank ma nyen. Nvng khoeu los lyis nvng lyis hank ma jyet. Nvng lyis peq tyamp las pa mha tyamp toh.
Ngos houcho suh lai lyis nvng nvnyang suih mas lhoeuh nyeis yvlyis nyvng. Nvng nah suih mas nyop joq laus eq ngos nvng lyis ma shei nhang mes. Ngos nvng lyis pazoe mas dah mhanh zains teh kuh los nhang. Nvng yombos las kuh nyhang zis yah lonyi bweh los. Nah dyeinauh yungh, nah cam eq yuk los laus eq nvng shohchen dvnghuot. note 16.7 Hebre mas bvng bvng ma nghuot.
Ngos houcho doms lai loh lyis, nvng gas yoeuh ngwis yoq nghuot yvlyis ngos nyvng. Housoeh ngos ngah shanhzoe nah shohchen lhyi nghop dyei las ngos nvng lyis jyet das oen dangthoengh toh. Nvng yah phoengh wvng thanghchvp toh goeus las nvng ngah zisnote 16.8 Ngah zis, nghuot ya ngah yhensain nyhiq bweh los. Heika Yomzains Yhensain taiq zis nghuot.
Hauh thang lhyi ngos jeis yoeus las nah suih cheih tyamp dyei las nah shohyeis mas tsanlun coeu yah buot dyei. 10 Ngos nvng lyis khoh kat dyimis huot; gis thank shohyeis thyvkoq, misyhwiq uhthop, baulo dyixing tsain dyei. 11 Ngos nvng lyis phauhdap luk yah shunk, thoengh huot, uhshot huot. 12 Nhokhwank, nodangh yahge yungh dah buismuk tsungh dyei. 13 Nvng gas ngwis xing yah shunk dah shunk zis yoh; nvng vjangh yah khoh kat dyimis eq misyhwiq, baulo dyimis wuot. Gis thank sunghso mons, dyoyhei yahge tsanlun coeu yah kuot dah ohlhyoq xauh zo. Nah yungh cho ka bvng las nvng hwankti nyih bweh los. 14 Ngos gas nvng lyis yungh yungh kuot dyei soeu nghuot yvmvyah nvng yungh cho dyinghjet yvlyis dius nyau khanghmuh mas nyings hoeuh loh. Heika Yomzains Yhensain taiq zis nghuot.
15 Nghuot laus eq nvng nvnyang yungh yvmas khauq las nvng houmha los bang khanghmuh yah yhetgoh cho mha nyings hoeuh. 16 Nvng nah dyimis dvkhamh yah nvng paiq joqyos lyis shunk las nvng nghe nyhiq teh yuk khanghmuh lyis nah gungs dyei. 17 Ngos nvng lyis dyei dah ngwis xing shunkzis yoeus zis yah yukgis gungslho kuot las nyi shuot lvng shuot goh. 18 Ngos nvng lyis dyei dah khoh kat misseh yoeus las gungslho lhyi phomh dyei. Ngos nvng lyis dyei dah tsanlun coeu yahge loban gungslho lhyi dyei. 19 Ngos nvng lyis wom, gis thank sunghso mons, tsanlun coeu, dyoyhei dyei. Nghuot laus eq phvra nyoqzons doeus shoq nvng phvra lyis phudyei khyvlyis dyei. Heika Yomzains Yhensain taiq zis nghuot.
20 Hauh thang lhyi nvng ngos lyis khoeu dyei dah loloeu lonyi jens lyis eq yoeus las phvra lyis phudyei khyvlyis dyei. Houka ngos lyis lom maluk zis ma nghuot lhyeh? 21 Nvng chamus ngah lo jens lyis yoeus las phvra lyis ngheq phudyei? 22 Nvng vchoqh vlhauq nghe nyhiq teh kuot nyeis uhlyis, nvng loshang yoq lyis shohchen nghuot las nvnyang suih mas lhoeuh nyeis yvlyis khanhamp eq ma doms soh lhyeh?
Nghe nyhiq Teh kang dwis
23 Yomzains Yhensain taiq, Nvng mvtanhzoe! Mvtanhzoe! Nvng hau ma gis cho dvnganh kuot lho lha, 24 cho yvm khanghmuh mas phvra paiq das joqyos tsain ci lha nghe nyhiq kuot. 25 Nvng nah yungh cho lhyi xoq lhoeu phuh. Nvng houmha lai loh soeu khanghmuh lyis nah gungs dyei las nyeih khanghmuh nghe nyhiq zes zes kuot. 26 Nyetnau dah nah yhenkyoh, Egutu bang yah yhetgoh nhang las nvng yhung dah nghe nyhiq muh gas ngos lyis nhaiqyo nhang.
27 Gvshih ngos nvng lyis joeng das zis ngah loq toeu goeus, lho lha nvng yoh dah maunyeis dvkhamh yoeus tyamp das. Ngos nvng lyis, nvng lhyap lhyi muh lyis choqh, nvng lyis hoeng dah Philisti jens lyis kyauh das.
28 Nvng gas obos cho ma bi yvmvyah Asiria bang thang mha chank wuih las nyamoq nvng yah nghe nyhiq kuot, nghuot laus eq nyamoq obos ma bi. 29 Nvng gas Babilon soenghi dius nyau yah eq nghe nyhiq kuot, laus eq nyamoq nvng yah obos ma bi.
30 Heika Yomzains Yhensain taiq nyeis zis nghuot. Nvng hai ma seq xoq dah nghe nyhiq kuot teh kuot goeus. 31 Nvng talhoeu khanghmuh mas phvra lyis paiq das joqyos ci lha nghe nyhiq kuot. Nghuot laus eq nvng gas gohtoeu soenghchoenk nghe nyhiq teh ngwis ma sang. 32 Nvng gas nyah yhensain phoq lyis jyet das gungsthaiq lvbaus yah lvng shuot dah vmesbih teh nghuot. 33 Nghe nyhiq gas phauh yoeus, nghuot laus eq nvng gas nah hwank jens lyis jyungshuk dyei las, dvkhauyah bang nvng yah los yhetgoh das xiklyis khau whot dyei. 34 Housoeh nvng gas lhyenwhei nghe nyhiq ja nghuot. Nvng lyis nghe nyhiq hank ma tsoengh kuot nhang. Nvng lyis ngwis hank ma dyei, hauh bang lyis nvng dvdyei! Nghuot goeus nvng gas shaih, ge.
Yhensain Joeng Cho
35 Housoeh las Yerusalem eh, ma seq xoq dah nghe nyhiq! Yhensain taiq nyeis zis gyo aq.
36 Heika Yomzains Yhensain taiq zis nghuot. Nvng nah dyimis shang tyamp las nghe nyhiq teh nvnyang gungs nah hwank yahge nah dah vchoqh vlhauq phvra jens lyis dyei. Nah lo jens lyis sat las phvra jens lyis lomhxangh teh phudyei. 37 Ngos haih gvng mas xik pheh dah nah hwank jens dvnganh, nvng jyet bang, hoeng bang dvnganh lyis tsainh toh das. Ngos nyamoq lyis nah yvmlhaink shwih tsainh toh das. Hauh thang lhyi ngos nah dyimis shang tyamp dyei las, nyamoq nvng shohchen nghuot yvlyis nyvng nhang das. 38 Nyilvng shuot, dius sat gvng mas ngos nvng lyis dang thang thyet das. Ngos nhaiqyo, phot phot tsoeu lha shei cho yah joeng das. 39 Ngos nvng lyis nyamoq yomsoq mas kyauh las nyamoq gas nvng nghe nyhiq kuot las phvra lyis paiq das ge doengs dah joqyos jens lyis mhont das. Nyamoq gas nah dyimis, nvng shunk zis yoeus loh das las nvng lyis shohchen toh khoq das.
40 Nyamoq gas nvng lyis luk yah doeuh das xiklyis dius phung lhyi jaus jyonh las, hauh bang gas nvng lyis nyamoq moengsa yah vdoeus doeus jap das. 41 Nyamoq gas nah yhen lhyi ngheq das las nvng lyis joeng cho vmesbih jens lyis nyvng nhang das. Ngos nvng lyis nghe nyhiq kuot cho no nhang das, nah hwank jens lyis jyungshuk dyei cho eq no nhang das. 42 Housoeh lyis ngos nhaiqyo bi las ngos nyens nyens nghuot das. Ngos nhaiq ma yo lo, noh cho ma bos lo. 43 Nvng ngis shih yoq lyis ngos nvng lyis khasoeh kuot zis tohnyhik goeus. Nvng kuot ya kuot zis yah ngos lyis nhaiqyo nhang. Housoeh las ngos nah yobos lyis nah uhloms mas jweh nhang das; nvng kuot khoq dah vchoqh vlhauq muh dvnganh dah thoq mas wotwu dyoq nyetnau cho chamus lhungh kat, ge Yomzains Yhensain taiq.
Ungwes Teh, Lonyi Teh
44  Yhensain taiq, Yerusalem eh, dius jens nah cho haih sodang yhung lha, Vmes teh, lonyi teh, ge das. 45 Nvng gas jyoengh nah ungwes dah lonyi nghuot. Nyang gas nyah yhensain phoq yahge nyah lo jens lyis hoeng. Nvng gas nah vbi moq teh nghuot. Nyamoq gas nyamoq dah yhensain phoq jens yahge lo jens lyis hoeng bang nghuot. Nvng yahge nah vbi wus jens gas Hiti ungwes yahge Amori uwus yoh.
46 Nah vbi gas Samari nghuot las mautsung pheh nyah wukhau jens yah joq. Nah vnoeuh gas Sodom nghuot las mautyi pheh nyah wukhau jens yah joq. 47 Nvng nyamoq dah beszoh chank nang das zis yahge nyamoq dah vchoqh vlhauq kuot yvlyis chank kuot das zis nhaiqtap lhyeh? Ma nghuot, dvsoq kyingh lyis nvng gas, ja khanghmuh mas nvng kuot ku goeus thoq lyis zes las kuot nyeis.
48 Yomzains Yhensain taiq, Ngos dwis nyeis Mangso nghuot zis yah dvyhangteh, nah vnoeuh Sodom yahge nyah wukhau jens gas, nvng yahge nah wukhau jens kuot dah ma gis zis khanhamp eq ma kuot. 49 Nyang yahge nyah lonyi jens gas nyoshoq xauh zo, nyenstap zis yah samlo xauh nyeis las khwank. Nyamoq shohjyen bang, toeuh ma yoh bang lyis loqzamh ma zwi. 50 Nyamoq gas khwank las nhaiqlom than zis yah ngos hoeng dah yvlyis tsain kuot. Housoeh las namoq vlhomuh seq zis yah dvyhangteh ngos nyamoq lyis mhont.
51 Samari wus gas nvng kuot dah yaunos dvgohyih ko ma kuot ku; nvng gas nyamoq kuot thoq lyis zes dah vchoqh vlhauq muh kuot goeus. Nvng vchoqh vlhauq dyoqbis cho yah nah vbi vnoeuh yobos ma bos yvlyis yoh byi thuq kat. 52 Gvshih nvng nah nyoqnho ngelang gyoh cho nvnyang kham chah. Nah yaunos gas nah vnoeuh moq thoq lyis sunk nyo las nah yvm mas nyamoq gas yobos ma bos teh dvnghuot. Nvng nah vnoeuh moq lyis lhoqshang teh kuot goeus yvmvyah gvshih nah nyoqnes cho yahge xoqphuh cho nvnyang kham chah, ge.
Sodom, Samari lyis Doms toeu
53  Yhensain Yerusalem lyis taiq, Ngos nyamoq lyis nyeisgis yaplhoq shoq doms kuot dyei das. Sodom yahge nyah wukhau jens, Samari yahge nyah wukhau jens lyis eq nyeisgis yap doms lhoq nhang das. Ngos nvng lyis eq nyeisgis yap doms lhoq nhang das. 54 Nvng nvnyang xoqphuh das. Nah nyoqnho ngelang gyoh cho ka nah vbi vnoeuh moq kha iq nyeisgis cho lhyi dede chixoeuq. 55 Nah vbi vnoeuh Sodom yahge nyah wukhau jens, Samari yahge nyah wukhau jens nyeisgis yap doms lhoq los das. Nvng yahge nah wukhau jens eq doms toeu dyei zis xauh das. 56 Nvng khwank nyeis dah buisnyeis lyis nvng Sodom dah cho lhyi yinaus toeuq ma nghuot lhyeh? 57 Houka nvng kuot dah ma gis cho lhyi ma phant thuq kat shih lyis nghuot. Gvshih nvng gas nah vnoeuh teh Edom jens, Philisti jens yahge gohtoeu nvng lyis hoeng dah yhenkyoh bang yah yisnaus toeuq gus bweh nyeis. 58 Nvng kuot goeus dah vchoqh vlhauq muh xiklyis joeng zis xauh chah, ge Yhensain taiq goeus.
Vcaiq Vto Goeng joq Thanghchvp
59 Yomzains Yhensain taiq, Nah dangthoengh lyis tyamp toh zis yah thanghchvp thyoq yvmvyah ngos nvng lyis nvng yah mon-yih khyvlyis kuot das. 60 Nghuot laus eq nvng ngis shih yoq lyis ngos nvng yah toh dah thanghchvp lyis soh las ngos nvng yah vcaiq vto thanghchvp toh das. 61 Nah vbi yahge vnoeuh doms los lyis nvng khasoeh kuot goeus las xoqphuh yvlyis soh das. Houka ngos nvng yah toh dah thanghchvp mas ma bos laus eq ngos nyamoq lyis nah lonyi jens teh dyei das. 62 Ngos nvng yah ngah thanghchvp vsaiq doms toh das las, ngos Yhensain nghuot yvlyis nvng seq das. 63 Ngos nvng kuot shuot zis dvnganh khyuot dyei das, nghuot laus eq nvng hauh yvlyis soh las, nhuot haq das zis sunk xoq das, ge Yomzains Yhensain taiq.