13
Lvpe Hwah jens lyis Tyi
1 Yhensain ngos lyis jis.
2 Nyang taiq, Lvcang eh, nyamoq nyang kuot taiq dah Israel lvpe jens lyis taiq hoeuh aq. Yhensain dah dang lyis gyo geh oen nyamoq lyis taiq aq.
3 Heika Yomzains Yhensain taiq zis nghuot. Hai koh dah lvpe jens gas mvtanhzoe nghuot. Nyamoq gas nyamoq nyang dyos muot kat zo las nyoqnyvng tsain kuot yoeus.
4 Israel jens eh, namoq dah lvpe jens gas wus dyoq gyoh joq yvmas nyeis dah womkhuih jens teh vkyuh ma bos.
5 Nyamoq gas ciank dyoq joq dah joqyos lyis ma zungh, ci eq ma doms ci, housoeh las Yhensain dah buisnyeis lyis jeszan los lyis Israel jens ma yoh khomp das.
6 Nyamoq dah nyoqnyvng ma jus, nyamoq pe zis eq dvhwah. Nyamoq gas ngah loeus taiq nyeis ge sang laus eq ngos nyamoq lyis ma nhang. Nghuot laus eq nyamoq dah dang gas nyuk los das ge nghamhloms nyeis.
7 Ngos nyamoq lyis taiq, Hau namoq nyvng dah nyoqnyvng gas ma jus. Namoq pe zis eq dvhwah. Hauh zis gas ngah dang nghuot ge namoq taiq laus eq, ngos namoq lyis ma taiq, oen.
8 Housoeh las Yomzains Yhensain nyamoq lyis taiq. Namoq dah dang gas ma jus, namoq dah nyoqnyvng eq dvhwah las ngos namoq yah tyi.
9 Namoq ma ying nyoqnyvng nyvng, ma nghuot zis pe dah lvpe jens lyis ngos joeng bah oen goeus. Ngah vnyau jens huom lha thyet yvmas ma xauh bos das; Israel vnyau nyings mas namoq ma yoh bos. Namoq mau mas eq khanhamp eq ma tauh los lo das. Housoeh lyis ngos Yomzains Yhensain nghuot yvlyis namoq yoh seq das.
10 Lvpe jens gas nyenstap zis ma bos laus eq, nyenstap joq ge nyamoq ngah dius jens lyis mhuih; ngah dius jens gas ma goeng dah ciank ci lha lvpe jens gas shvhwih cauh.Ref 13.10: Yer 6.14, 8.11
11 Lvpe jens lyis taiq aq, Nyamoq dah ciank gas gywis gyoh das. Ngos maugis wus nhang das. Houmha gyutomp mau gyoh das, lyeisjyang yah hauh yvlyis khyauh das.
12 Hau ciank gas lhain das, housoeh yuk khanghmuh gas nvng lyis, hau shvhwih cauh zis cha gis, ge nyei das.
13 Gvshih haih zis Yomzains Yhensain taiq zis nghuot. Ngos nhaiqyo las hau ciank lyis mhont das zis lyeisjyang nhang das, maumuh jyang wus khyoq das, gyutomp khyoq das.
14 Nyamoq shvhwih cauh dah ciank lyis ngos nyeisjvng jweh shoq thyoq khyoq zis yah dvyos dvsanh kuot das las hauh ciank pom thuq joq das. Hauh zis lains las namoq dvnganh lyis nhiq sat das. Housoeh ngos Yhensain nghuot yvlyis yuk khanghmuh seq das.
15 Ciank eq, shvhwih cauh bang eq, ngah nhaiqyo zis xauh kham das. Hauh thang lhyi ciank dyuk loh das, ciank cauh bang dyuk loh das, oen ngos taiq das.
16 Hauh lvpe jens gas Yerusalem nyenstap cho ma bos uhlyis nyenstap joq ge tsain pe, ge Yomzains Yhensain taiq goeus.
Vmesbih jens lyis Tyi lha Pe
17 Yhensain taiq, Lvcang eh, gvshih nah dius jens mas pe cho kuot thuq kat dah vmesbih jens lyis yoeuh aq; nyamoq lyis tyi lha taiq hoeuh aq.
18 Nyamoq lyis Yomzains Yhensain taiq zis taiq kyoh aq.
Namoq vmesbih jens gas mvtanhzoe nghuot. Namoq gas gohyuk lyis yoh zwi dah yomsoq yoh das nyhenshang mandan twih kuot, mandan lainlyet chop las yuk khanghmuh dah uhloms mas khuk toh dyei. Namoq gas ngah dius jens dah kang lhyi mhuih jyomh las vsainnyang kang lhyi ka shomus.
19 Namoq gas bali dvtsop yahge ohlhyoq dvmhauh yoh das xiklyis ngah dius jens xikkhonh mas ngos lyis nyoqnho ngelang khyoq. Namoq gas ma shei vvng bang lyis sat, shei vvng bang lyis gas vdwis toh. Housoeh namoq ngah dius jens lyis hwah taiq las nyamoq eq lomsjingh.
20 Gvshih heika Yomzains Yhensain taiq zis nghuot. Shei cho yahge kang dwis cho lhyi joeu das xiklyis yhung shi yoeuh dah mandan twih lyis ngos hoeng. Ngos nyamoq dah loqyom lyis khyauh tyamp las namoq joeu nyeis dah dius lyis lhuiq kat das.
21 Namoq dah uhloms nghop yvlyis eq ngos lang chuiq tyamp dyei das las ngah dius jens lyis namoq yomsoq masyah dvlhain lhyi yah phang luiq los nhang das: housoeh ngos Yhensain nghuot zis namoq seq das.
22 Namoq hwah zis yah ngos ma nos nhang mes dah dius gis jens lyis nhaiqngis nhang. Namoq gas ma gis bang ma gis zis tyamp las nyamoq dah kang lhyi khyuot yoeus zis khomp toh.
23 Housoeh las gvshih namoq dah ma ying nyoqnyvng yahge ma jus dah pe zis eq thank goeus. Ngos ngah dius jens lyis namoq yomsoq masyah khyuot yoeus nyeis. Housoeh las ngos Yhensain nghuot zis namoq seq das, ge.