JOEUI DANG
(ECCLESIASTES)
Joeui nghamh bang gas nyothyang gang yvpheh lhyoh loh las nhaiqlom thank phoh nghuot. Nghuot laus eq haih buk lyis Jyomp maussauh mas kat toh zis gas, Jyomp maussauh mas dah lomsjingh cho mha housoeh teh ma gis shot pheh nyvng cho yahge khamkhvv ehnyet lyis yoh nghamh yoeuh das nyhenshang dvm dvm nghuot. Dius nyoshoq gas joeui dang dah bvngtoenk mas vsainnyang gungs lyis vsainnyang nyvng las nhaiq dainh cho yoh thoq lyis magoh, hai nghamh cho chixoeuq dah Jyomp maussauh masyah eq Mangso jyank masyah yoh, hau dis dah kang dwis cho lhyi yoh nghamhloms.
1
Kang Dwis Cho Vkom
Heika Dawi dah lo, Yerusalem mas hwankti kuot soeu, joeui nghamh soeu dah dang tsain nghuot.
Joeui nghamh soeu taiq, Heika vkom, vkom dvnghuot. Kang dwis zis gas vkom, dvnganh vkom dvnghuot. Nvng gas dvcaiq yah muh lyis yomkat las zwi khank laus eq chah vkyuh xauh kham zo lah? Dius gas dvcaiq thang lhyi dvcaiq lai loh laus eq mungkvn gas vgus dvjoq. Buis gas thuq las wvng loh thang lhyi nyang doms thuq das joqyos mas nyungdaus zis yah doms loh. Lyeis gas mautyi pheh muot loh, mautsung pheh muot loh. Lyeis gas lhain lha lha muot zis yah vkhang joqyos mas doms jweh loh. Jeislvng dvnganh gas thomh mas yaus wvng laus eq, thomh gas ma dyingh shih. Jeis gas jeislvng yaus xi yvmas tauh loh las doms xi. Vyhang dvnganh gas nyungdaus yvpheh shwih loh, hau nyungdaus zis gas dang yah mathoq taiq shoq kuh. Yah nyoqjeih gas khanhamp eq nyvng las nhaiq ma yoh tap, no eq khanhamp eq ma tham gyo. Xikpheh bweh ku goeus zis doms bweh das. Kuot ku dah vyhang lhyi doms tsain kuot das. Mungkvn gonh mas vsaiq ge zis cha ma bos. 10 Yoeuh aq! Nyamoq taiq, Haih zis vsaiq dvja nghuot, ge. Nghuot laus eq ma nghuot, houka xikpheh bweh ku goeus zis, yang ma khoeu los shih lhyi bweh goeus zis dvnghuot. 11 Lai loh caiq lyis bweh goeus cho hank ma soh kat. Haq caiq yahge jweh los das caiq gyo lyis bweh cho lhyi eq jweh los das caiq mas bang hank ma soh das.
Thungh phuh Cho
12 Joeui nghamh soeu ngos gas, Yerusalem mas Israel thoq mas hwankti nghuot khoq. 13 Ngos gas haih mungkvn mas kuot cho dvnganh lyis xo lhau lha xuq das oen nghamh thyet toh. Mangso ka yah thoq mas lyei yvwons toh dyei goeus. 14 Ngos gas haih mungkvn mas khanh dah muh dvnganh lyis nyvng goeus. Ngos nvng lyis taiq bah, houka jyoengh, dvnganh vkom dvnghuot. Houka lyeis lyis chank khat teh dvnghuot. 15 Nvng gas guih yvlyis ma yoh lhoq dan, ma bos yvlyis eq ma yoh suon kat.
16 Ngos ngvnyang taiq zo zis gas, Ngos gas dius zains bweh los goeus. Yerusalem mas ngah xik pheh guon los bang dvnganh thoq lyis joeui zes bos. Jyoengh joeui yahge seq cho cha tsain nghuot yvlyis ngos seq.Ref 1.16: 1Hw 4.29-31 17 Ngos gas seq cho yahge koh cho cha shaih, joeui yahge huonh cho cha shaih zis xuq das oen nghamh thyet. Nghuot laus eq ngos eq lyeis lyis chank khat teh nghuot das yvlyis xo nyvng. 18 Nvng joeui zes nyo zes chiqh cho bos los. Seq cho zes bos los zes nhaiqkuk cho je los.