34
Moshe Shei
1 Moshe ka Moab pa mhayah, Yerikho wus buisthuq pheh Pisga boms thyoh mas dah Nebo boms mas doq loh. Houmha Yhensain ka dvmau gonh chixoeuq. Gilead mau lyis mautsung pheh Dan wus jweh shoq,
2 Napthali mau dvnganh; Ephraim mau yahge Manase mau; Yuda mau buiswvng pheh Mediteranean Thomh jweh shoq;
3 Mautyi pheh Yuda vchink; Zoar wus masyah Yerikho jweh dah pazoe, Dyoms zains wus, tsain nghuot.
4 Hauh thang lhyi Yhensain Moshe lhyi taiq, Heika ngos Abraham, Isak, Yakop moq lyis nyamoq dah vnyau vshih lyis dyei das oen dangthoengh toh dah mau nghuot. Ngos nvng lyis yoeuh nhang. Nghuot laus eq ngos nvng lyis thyimha ma loh nhang, ge.Ref 34.4: Vpm 12.7, 26.3, 28.13
5 Housoeh las Yhensain dah dang vgus, Yhensain dah jyeidwis Moshe ka Moab mau mas shei.
6 Yhensain ka nyang lyis Bet Peor yah twi twi Moab mau langhkhau dvkoeuq mas nyhop. Nghuot laus eq khvnyhik jweh shoq nyang lyis nyhop joqyos lyis top hank ma seq.
7 Moshe ka nyang shei uhlyis nyenhkyi dvxo aiqci zvn nghuot. Nyang yombos shih, nyoq eq gis shih.
8 Israel dius jens gas Moab pa mha Moshe xiklyis somhci nyeih kuk ngaus.
9 Nun lo Yoshua gas joeui yah dyingh joq: khasoeh ge lyis nyang lyis gyamh huon lha toeuq toh goeus. Israel jens gas Yoshua dah domsyos gyo las Moshe lhyi yah Yhensain dyei toh tyingdang lyis tsain chank.
10 Israel mas Moshe teh Yhensain yah nyoqnyvng sanghtsuk jis goh dah lvpe khanhamp eq ma thuq los lo.Ref 34.10: Dyu 33.11
11 Yhensain ka Moshe lhyi Egutu hwankti yahge nyah zau jens, nyah mau gonh lyis tyi das zis nhang lha yomsoq muh yahge mauh loqmuh kuot teh gohtoeu lvpe hank eq ma kuot ku.
12 Israel dvnganh dah nyoqlvtjvng mas Moshe kuot teh kuhxing lha gyukphoh muhzains gohtoeu lvpe jens hank ma yoh kuot.