33
Israel Vkoq jens lyis shvmanh
1 Heika Mangso dah dius Moshe, nyang ma shei shih lyis Israel jens thoq mas taiq hoeuh dah shvmanh nghuot.
2 Nyang taiq, Yhensain ka Sina boms masyah los.
Nyang gas Edom thoq mas buis canh los teh
toq los las Paran boms masyah nyah dius jens thoq mas pank dyei.
Loeuswons bang dvmons nyang yah los.
Nyah loqyos loq mas nyiduk chi toh.note 33.2 Haih sonzoh Hebre mas bvng bvng ma mus.
3 Yhensain ka nyah dius lyis jyet las nyang yah sen bang lyis gomh dyei.
Housoeh ngamoq nyah khyeiyang mas dupaiq las nyang tyingtoh dang lyis chank kuot. note 33.3 Haih zis Hebre mas bvng bvng ma nghuot.
4 Ngamoq gas Moshe ngamoq lyis dyei dah lyi lyis tsain chank kuot,
hauh zis ngamoq dius nyau sain dah vso zisyos nghuot.
5 Yhensain ka nyah dius Israel jens nyamoq vkoq jens yahge
uhshe bang dvgeh huom uhlyis nyamoq dah hwankti bweh los.
6 Moshe ka Ruben vkoq cho taiq:
Ruben dius jens nain laus eq
7 Nyang Yuda vkoq cho taiq:
Yhensain eh, nyamoq pangh das cho dung yvlyis gyo dyei aq.
Nyang lyis gohkoq jens yah doms xonh nhang aq.
Yhensain eh, nyamoq xiklyis jeszan dyei aq.
Nyamoq dah jeswus jens lyis zan yvmas pangh aq.
8 Nyang Lewi vkoq cho taiq:Ref 33.8: Dyu 17.7, 28.30; Gyu 20.13
Yhensain eh, nah ehnyet nghuot cho lhyi
nah lomluk jyeidwis Lewi jens lyis yah
Urim yahge Thumim masyah chixoeuq aq.
Nvng hauh yvlyis Masa mas shi yoeuh las,
Meriba jeis mas jyoeng yvlyis kyink thuq kat goeus.
9 Nyamoq gas nyamoq dah ungwes uwus,
vmang vnoeuh yahge lo jens lyis dang jings thoq lyis
nvng lyis dang zes jings cho chixoeuq goeus.
Nyamoq gas nvng tyingtoh zis chank kuot,
nah thanghchvp lyis lomluk luk tyink goeus.
10 Nyamoq gas nah dius jens lyis nah lyi chank das zis jyauh das.
Nyamoq nah phon mha phudyei das.
11 Yhensain eh, nyamoq vkoq yombos los shoq pangh aq.
Nyamoq kuot cho lhyi nhaiqdoeus dyei aq,
nyamoq dah jeswus ma doms yoh toq los shoq
dvnganh thungh thyi dyei aq.
12 Nyang Benyamin vkoq cho taiq:
Heika Yhensain jyet las gomh kat dah vkoq nghuot.
Nyang nyamoq lyis dvnyeih gonh zungh dyei,
nyang nyamoq vgungs mas nyeis.
13 Nyang Yosep vkoq cho taiq.
Yhensain nyamoq dah mau lyis mau wus zis yah eq,
nyeis khau mha dah jeis yah eq shvmanh dyei bas jungh.
14 Buis tso zis gas gis thank vshih shih nhang zis yah shvmanh dyei bas jungh.
Vyoq yoq gis thank vshih yoh bas jungh.
15 Nyamoq dah jing cauh gas gis thank vshih yah nghop bas jungh.
16 Nyamoq dah mau gas gis dah vyhang dvnganh yah dyingh bas jungh,
Mhanhgyomh nyi ngeh nyeis yvmas taiq soeu
Yhensain dah gis cho yah shvmanh dyei bas jungh.
Haih shvmanh gas Yosep dah vkoq mas jweh bas jungh.
Khasoeh ge lyis nyang gas nyah vmang vnoeuh moq mas uhshe soeu kuot ku.
17 Yosep gas noeulu dah yom bos,
noeuphuk lu dah khyau nghuot.
Nyah khyau ka Manase khyoengh khyoengh,
Ephraim mons mons nghuot.
Hauh zis yah nyang dius nyau jens lyis
nyeisjvng vthang mha jweh shoq duon tyamp.
18 Nyang Zebulun yahge Isakha cho taiq:
Zebulun gas thomh mas nyamoq dah soenghi kuot yvmas ung bas jungh,
yhen mha Isakha dah dis cho je los bas jungh.
19 Nyamoq gas lvbaus lyis nyamoq boms mas yus.
Houmha nyamoq dah dan cho lomhxangh dyei.
Nyamoq dah dis cho ka thomh masyah eq,
thomh jyankyvm chank yah sihmuis masyah eq xauh yoeus.
20 Nyang Gad vkoq cho taiq,
Nyamoq dah maunyeis kuh kuh kuot dyei dah Mangso lhyi chungh.
Gad gas loqyom, nghuot ya uhshoh lang chuiq dyei das ge
khangkhyi teh lhom nyeis.
21 Nyamoq gas nyamoq nyang xiklyis gis thank maunyeis yoeus.
Uhshe soeu dah gvmboms nyamoq lyis dyei
Israel uhshe bang dvgeh huom uhlyis
Yhensain dah tying dang yahge lyi tsain chank kuot.
22 Nyang Dan vkoq dah cho taiq.
Dan gas khangkhyi kyoh lo nghuot.
Nyang Bashan mhayah dyvm thuq los.
23 Nyang Napthali vkoq cho taiq.
Napthali gas Yhensain dah nhaiqdoeus zis yah shvmanh dyingh dyingh yoh soeu nghuot.
Nyamoq dah mau gas Galile thomh mautyi shot pheh jweh.
24 Nyang Asher vkoq cho taiq.
Asher gas gohkoq jens thoq lyis shvmanh zes yoh.
Nyah boekyis jens nyang lyis nhaiqdoeus bas jungh.
Nyah mau mas tsanlun zains yah dyingh bas jungh.
25 Nyah wus jens gas thyeq khyam khomh yah gos toh bas jungh.
Nvng dwis nyeis dvchank yombos bas jungh.
26 Israel dius jens eh, nah Mangso teh dah mangso ma bos.
Nvng lyis pangh das ge, shoenkkhyi yah jyommauh ji las
maukhung thyi vshot masyah los.
27 Mangso ka nvng lyis vjangh khomp toh.
Nyah dah vcaiq vto loqyom gas nvng lyis thuk toh.
Nvng wvng loh zis yah dvyhangteh nah jeswus jens lyis khat tyamp,
hauh bang dvnganh lyis mhont tyamp das xiklyis taiq toh.
28 Housoeh las Yakop dah vshih jens eh,
maukhung mha dah jyweh nyeisjvng lyis jyweq nhang lha,
jyo yahge zvbiq dyingh shoq yoh dah mau mas
nyenstap zis yah gau gau nyeis geh.
29 Israel eh, nvng kha iq pyo!
Yhensain khyuot yoeus dah dius nyau,
nvng yah doeus zis hank ma bos.
Yhensain nyang nah gos,
nah moengsa duot las nvng lyis khomp dyei, ung los nhang.
Nah jeswus jens nvng lyis nhaiqnyen aq ge los dung das laus eq
nvng gas nyamoq lyis doq nang khyoq das, ge.