28
Domsyos gyo dah Shvmanh
(Lew 26:3-13; Lyi 7:12-24)
1 Nvng Yhensain, nah Mangso lhyi domsyos gyo las khvnyhik ngos nvng lyis dyei dah nyah tying dang lyis lomluk luk chank lyis gas, nyang nvng lyis nyeisjvng thoq mas dius nyau dvnganh thoq lyis zes kuhxing shoq kuot das.Ref 28.1-14: Lyi 11.13-17
2 Yhensain, nah Mangso dah domsyos gyo aq, haih shvmanh dvnganh gas nah zis nghuot das.
3 Yhensain nah wus jens lyis eq, nah yos lyis eq shvmanh dyei das.
4 Yhensain ka nvng lyis lo jens nyoshoq, shih nyau vboms dom, noeu yahge yvng nyoshoq shvmanh das.
5 Yhensain ka nah guk nyau shih nyau yahge hou mhayah zonoms sont yvmas nvng lyis shvmanh das.
6 Yhensain ka nvng kuot loh zis dvnganh mas shvmanh das.
7 Nah jeswus jens nvng lyis zan lyis Yhensain ung tyamp dyei das. Nyamoq dvcho yah dvlos zan laus eq nyamoq namoq masyah dvkhau yah phang das.
8 Yhensain, nah Mangso ka nah muh mas shvmanh las, nah jyi mha jyo yah dyingh nhang das. Nyang namoq lyis dyei dah mau mas nyang namoq lyis shvmanh das.
9 Nvng Yhensain, nah Mangso dah domsyos gyo las nyang tyingtoh zis dvnganh chank kuot lyis, nyang dangthoengh toh vgus nyang namoq lyis nyah dius nyau kuot das.
10 Housoeh Yhensain ka nvng lyis nyah dius bweh das xiklyis khyen yoeus cho nyeisjvng thoq mas dius jens dvnganh nyvng seq las nyamoq nvng lyis gyuk das.
11 Yhensain ka namoq lyis dyei das ge nah phauh thyeih moq lyis dangthoengh toh dah mau mas nvng lyis lo jens nyoshoq, noeu nyoshoq, shih nyau vboms vbeq dyei das.
12 Nyang gas dis dah nyah maukhung ziskwi mhayah nyah yoq lyis mau wus nhang das. Nah muh dvnganh mas shvmanh dyei das. Housoeh nvng dius nyau nyoshoq lyis jyeih dyei das, laus eq nvng gas hank jyank masyah eq cha ma jyeih noh.
13 Khvnyhik ngos nvng lyis dyei nyeis, Yhensain, nah Mangso dah tying dang lyis lomluk luk chank lyis gas, Nyang nvng lyis dius nyau jens mas thang chank soeu ma nghuot, uhshe soeu kuot das. Nvng gas vjangh ung cho yoh las khanhamp eq ma somh das.
14 Nghuot laus eq hauh yvlyis ma chank khanhamp eq vkuot. Nghuot ya gohtoeu mangso jens lhyi vpaiq phuqsoe loh.
Domsyos Ma gyo Vthang
(Lew 26:14-46)
15 Nghuot laus eq Yhensain, nah Mangso dah domsyos ma gyo, khvnyhik ngos nvng lyis dyei nyeis, nyah tying dang yahge lyi dvnganh lyis lomluk luk ma chank lyis gas, nvng mas hai ma gis cho dvnganh bweh los das.
16 Yhensain ka nah wus jens yahge nah yos lyis nhoengh das.
17 Yhensain ka nah jyo nyau shih nyau yahge hou mhayah zonoms sont yvmas nhoengh das.
18 Yhensain ka nvng lyis lo jens nainlo dvdyei zis yah eq, nah maunyeis mas dah vshih ma gis zis yah eq, noeu, yvng nainlo dvdyei zis yah eq noengh das.
19 Yhensain ka nvng kuot zis dvnganh yvmas nhoengh das.
20 Nvng ma gis zis kuot las Yhensain lhyi peq tyamp lyis, nyang nah thoq mas nvng kuot ya kuot yvmas dyoqbis zainsmuh, vnhunk nhunk mus cho, yaukyenh cho lhyi nvng lvnyap shank shoq monh loh shoq she kat das.
21 Nvng loh wvng nyeis das mau mas dvyuk eq ma nyet lo shoq namoq thoq mas noslom dvja thang lhyi dvja nhang das.
22 Yhensain nvng lyis yam las gungs ngeh teh, dap lwis dah noslom yah zan das. Nyang nah jyo lhyi mhont das nyhenshang, mau ma wus, buis ngeh gywes dah lyeis nhang das. Nvng shei shoq haih dyoqbis zainsmuh namoq yah dvgeh nghuot nhang das.
23 Mau ma wus das las, nah nyeisjvng gas thyeq teh than das.
24 Mau wus das gungsthaiq Yhensain ka nvng monh loh shoq tsohmop yahge sihsho lyeis jyang khyoq das.
25 Yhensain ka nah jeswus lyis nah thoq mas ung nhang das. Nvng nyamoq lyis dvcho wvng zan lyis nvng nyamoq masyah dvkhauyah phang sanh loh das. Housoeh nyeisjvng dius jens gas namoq cha bweh zis nyvng lyis nyamoq gyuk dvn das.
26 Namoq shei lhyi nghoq yahge yewus gas namoq mvng lyis los zo das. Nyamoq lyis hank ma khat tyamp das.
27 Yhensain ka nvng lyis nyang Egutu jens lyis dyei ku teh dah dyings nyuk nhang das. Nah gungs mas dvm thuq los nhang das, nvng mas yo yo, eh eh zis yah dyingh das. Hauh zis ma yoh yhoh.
28 Yhensain ka nvng lyis ehnyet ma gying mus nhang das. Nyang namoq lyis nyoqjet cho yahge vnhunk nhunk mus nhang zis yah zan das.
29 Nyoqjet soeu ka sop yenh teh, nvng nyeih gungs lyis sop yenh das. Nvng nah cho xo ma nyvng das. Nvng cha kuot laus eq ma ung das. Nvng vjangh yah zaiq zis yahge lhuot zo zis xauh das las, nvng lyis pangh das soeu hank ma bos.
30 Nvng nyi kwank toh laus eq dvyuk yuk nyihwank loh das. Nvng yhen tsuk toh laus eq houmha khanhamp eq ma xauh nyeis das. Zvbiq khyam tsungh toh laus eq nyah vshih khanhamp eq ma xauh zo das.
31 Nah noeulu nah xikkhonh mas sat toh laus eq nvng hauh shoh ma xauh zo das. Nvng yoeuh nyeis lyis nah mauhlyihzoe jens she loh las nvng lyis ma tauh dyei lo das. Nah yvng jens nah jeswus lyis dyei las hauh yvlyis pangh das soeu hank ma bos.
32 Nvng yoeuh nyeis lyis nah loloeu lonyi jens lvbaus lyis jons khyvlyis dyei tyamp. Nyeih yau nyeih nah nyoq kyink phank las namoq lo jens tauh los das yvmas yoeuh gom das.
33 Nvng yomkat zwi khank khyoq toh dah jyo nyau lyis lvbaus dius nyau yoeus tyamp das. Namoq cha ma xauh yoeus das. Namoq gas vjangh yah zaiq zis yahge than than kuot zis xauh das.
34 Nvng khamzo cho ka nvng lyis koh loh nhang das.
35 Yhensain ka nah khyei lhyi ma yoh yhoh, nos dah dvm yah dyingh nhang das. Uhloms mas zis khyeiwu jweh shoq dyings nyuk nhang das.
36 Yhensain ka nvng yahge nah hwankti lhyi lvbaus mau pheh shwih loh das. Houmha xikpheh nvng yahge nah phauh thyeih moq khanhamp eq ma nyeis ku. Houmha nvng luk mangso, saiq mangso lyis phuqsoe das.
37 Yhensain ka namoq lyis hauh mau mas sanh tyo tyamp das. Dius jens gas namoq mas cha bweh yvlyis dvn das. Nyamoq gas namoq lyis yinaus toeuq, jwangh nyhap das.
38 Nvng yos mas jyo nyau nyoshoq khyoq laus eq nainlo kyingh dvxauh yhomh das: khasoeh ge lyis janghgyik yah nah shih nyau zo tyamp das.
39 Nvng zvbiq khyam tsungh las dyangh kat laus eq zvbiq nwis lyis bau zo yvmvyah nvng zvbiq shih ma xauh yhomh, hou mhayah zvbiq ma xauh shuk.
40 Nah mau dvkhauyah tsanlun zains bos laus eq shih gywis yvmvyah nvng coeu ma yoh das.
41 Namoq mas lonyi loloeu jens bos laus eq nyamoq jes mas jonsdoeus loh das yvmvyah nyamoq dyuk loh das.
42 Namoq dah saiqzains yahge vshih dvnganh bau yah zo tyamp das.
43 Nah mau mas nyeis dah lvbaus gas yomsoq zes zes yoh los las nah yomsoq gas zoh zoh chithyuk das.
44 Nyamoq gas namoq lyis jyeih dyei das ngwis yoh, nvng gas nyang lyis jyeih dyei das zis ma yoh. Vthang chon mha nyamoq gas namoq lyis guon bang duot los das.
45 Nvng Yhensain, nah Mangso dah domsyos ma gyo, nyang dyei toh dah lyi ma chank yvmvyah, hai dyoqbis zainsmuh nah jyank jweh las nvng dyoqbis tyamp shoq nvng yah dvgeh nghuot das.
46 Hauh zis gas nvng yahge nah vnyau vshih thoq mas Mangso dah soetuon cho dah vlho vcaiq vto joq das.
47 Yhensain ka nvng lyis cho khvt khanghmuh mas shvmanh dyei laus eq nvng gauslaus ehnyet yah ma phuqsoe.
48 Housoeh las Yhensain nvng lyis tyi lha nhang kat dah jeswus lyis nvng phuqsoe chah das. Namoq gas yuot shet, shohchen, ja khanghmuh mas chah loh das. Nvng monh loh shoq Yhensainnote 28.48 Yhensain, nghuot ya Nah jeswus ka nvng lyis than than zaiq das.
49 Yhensain ka nyeisjvng vthang mhayah nvng lyis tyi das dius dvnyau shwih los das. Nvng nyah nyingh ma seqgyo dah dius nyau nghuot. Nah thoq mas zonsmuh teh dang jweh los das.
50 Nyamoq gas lhoeng lha ngislo kuhlo hank lyis eq nhaiqnyen cho ma chixoeuq bang nghuot das.
51 Nyamoq gas nah gaunyhauq, nah jyo zo tyamp las nvng gas yuot shei das. Nyamoq gas nvng lyis jyo, zvbiq, tsanlun coeu, noeu, yvng cha eq ma nyhet toh dyei lo las nvng shei das.
52 Nyamoq gas Yhensain, nah Mangso nvng lyis dyei dah mau mas dah wus khanghmuh lyis zan das. Nvng khau nges toh, hau nyhang lha goeng dah wusciank gyop das.
53 Nah jeswus jens nah wus lyis lhaink toh uhlyis nvng ngvn las Yhensain, nah Mangso nvng lyis dyei dah lo jens lyis zo das.
54-55 Noeuh nhamp thank zaulo vbusbih yangh hau lhaink toh gyo lyis zonoms yau los las gohtoeu zonoms cha ma joq yvmvyah nyah lo gyingh jens lyis yangh zo das. Nyang hauh zis nyah vmang vnoeuh, nyang jyet dah nyah yhensain nyhiq, nyet shih dah nyah lo jens lyis yangh ma dyei das.
56-57 Noeuh nhamp thank dah zau lonyi, dis las khyei cho khalhye eq ma suh loh ku dah vmesbih yangh housoeh dvyhangteh kuot das. Jeswus jens nyah wus lyis lhaink toh uhlyis zonoms yau los las nyang khoeu dah lo jens yahge lo dyenschangh lyis eq gauh zo das. Hauh zis nyang jyet dah nyah yhensain phoq, nyah lo jens lyis ma gvm das.Ref 28.57: 2Hw 6.28-29; Kuk 4.10
58 Haih maussauh mas lhaih toh, Mangso dah jyauh cho dvnganh lyis lomluk luk ma chank, Yhensain, nah Mangso dah mauhphoh zis yahge gyukphoh nyings lyis ma chungh lyis gas,
59 Nyang nvng yahge nah vnyau vshih thoq mas ma yoh yhoh dah noslom, khanhamp eq ma dyuk lo, dap lwis dah gyukphoh yomh nhang das.
60 Nyang nvng Egutu mas nyvng ku gyukphoh noslom nah jyank mas doms she kat las nvng khanhamp eq ma gis los lo das.
61 Hai Mangso dah lyi yahge jyauh cho maussauh mas ma taiq toh dah noslom yahge yomh vja ja eq nhang lha, nvng dyoqbis loh das.
62 Nvng Yhensain, nah Mangso dah domsyos ma gyo yvmvyah, namoq gas maukhung kyi nyhoq nyo los laus eq dvtsiq kyingh dvdoeng lo das.
63 Nvng lyis nyeisgis nhang das cho kuot dyei yvmas eq, jebais nhang yvmas eq Yhensain gausyis zis yah dvyhangteh, nvng lyis mhont las monh loh das cho kuot das yvmas eq gausyis. Nvng gas loh sain das mau masyah shang tyamp zis xauh das.
64 Yhensain ka nvng lyis nyeisjvng dvthang mhayah gohtoeu dvthang jweh shoq dius nyau jens dvnganh mas sanh tyo tyamp das. Nvng houmha xikpheh nvng eq nah phauh thyeih moq eq ma paiq ku dah saiq mangso, luk mangso lhyi phuqsoe das.
65 Nvng houmha nyenstap cho ma yoh, nah joqyos oen das zis ma bos. Yhensain nvng lyis chiqjyen cho, yom gyau cho dyei zis yah nghamhloms cho ma bos mus nhang das.
66 Nah kang ka vjangh gyuk chah yvmas bos. Nyeih nyenh gyukphoh zis yah dyingh joq. Shei cho lhyi vjangh chiq nyeis.
67 Nvng nyvng cho dvnganh gvng mas gyuk las sainh guk thungh das. Nvp yau nvp nyenhthang jweh ya, ge das. Nyenhthang khanghmuh gas nvpsangh jweh nhang mes nyeis.
68 Yhensain ka, Namoq houmha khanhamp eq ma doms e lo noh, ge taiq laus eq nyang namoq lyis Egutu mas sangpho chank doms nhang kat das. Namoq houmha namoq dah jeswus lyis namoq nyang gungs jons khyvlyis tungh ungh das laus eq namoq lyis hank ma mes wis, ge.