16
Lhuiq kat Pwe
(Dyu 12:1-20)
Abi lhamhmuh khyvp lyis Lhuiq Kat Pwe kuot zis yah Yhensain, nah Mangso lhyi nyoqnho ngelang dyei geh. Hauh lhamhmuh khyvp lyis nyang nvng lyis Egutu masyah nyenh lyis khyuot kat.Ref 16.1-8: Lew 23.5-8; Gyu 28.16-25 Paiq dah joqyos mas loh las nah lhuiq kat lomhxangh ge yvng, nghuot ya noeu sat las Yhensain, nah Mangso lhyi nyoqnho ngelang dyei chah. Nvng hauh pwe zo lyis bicheih kat dah ohlhyoq vzo. Namoq Egutu masyah gyen gyen thuq los lyis kuot teh nyhet nyeih top bicheih ma kat ohlhyoq zo chah. Haih ohlhyoq zo zis gas shanghsenh ohlhyoq ge das. Housoeh nvng dwis nyeis dvchank shanghsenh joqyos Egutu masyah thuq los buisnyeis lyis soh nyeis das. Nah mau mas nyhet nyeih top hank eq yhen mha bicheih ma gis toh. Cangxeih vnyeih dah nyenhthang lyis sat dah gaunyhauq shoh lyis nungsnvp jweh shoq vtoh.
5-6 Lhuiq kat lomhxangh lyis hau paiq joqyos dvjoq mas kyingh sat chah. Nah Yhensain namoq lyis dyei das joqyos dvkhauyah ma gis sat. Nvng Egutu masyah thuq los shishenh, buis wvng loh uhlyis sat chah. Hauh shoh lyis kank las paiq joqyos dvjoq mas zo geh. Hauh nungsnvp zvng mas tauh loh geh. Tsai, khyuk nyeih bicheih ma kat ohlhyoq zo chah. Nyhet vnyeih lyis Yhensain, nah Mangso lhyi paiq das zis huom chah. Hauh nyeih lyis muh vzwi.
Jyo Yhomh Pwe
(Dyu 34:22; Lew 23:15-21)
Jyo yhomh xi masyah suon lha nyhet daus thang lhyi,Ref 16.9-12: Gyu 28.26-31 10  Yhensain, nah Mangso lhyi nyoqnho ngelang dyei das zis Jyo Yhomh Pwe kuot geh. Houmha nyang nvng lyis shvmanh dyei yvmas yoh nyhoq xihhonh jyungshuk chi los chah. 11 Nvng, nah lo jens, nah jyeidwis jens, nah wus mas nyeis dah Lewi jens, lvbaus, chauhmuh chauhlo jens yah dvgeh Yhensain xikkhonh mas tsain gausyis nyeis das. Haih zis lyis hau paiq das joqyos mas kyingh kuot das. 12 Namoq Egutu mas jons duot ku zis soh las hai tying dang lyis vlhomuh chank kuot geh.
Phunk Pwe
(Lew 23:33-43)
13 Nvng nah jyo dye yhomh, zvbiq dye nyhet thang lhyi Phunk Pwe nyhet nyeih kuot chah.Ref 16.13-15: Gyu 29.12-38 14 Hauh pwe mha nvng, nah lo jens, nah jyeidwis jens yahge nah wus mas nyeis dah Lewi, lvbaus, chauhmuh chauhlo jens yah dvgeh gausyis nyeis das. 15 Paiq das joqyos mas haih pwe nyhet nyeih kuot zis yah Yhensain, nah Mangso lhyi nyoqnho ngelang dyei geh. Yhensain ka nah jyo yhomh cho mha, nah muhzoh mas shvmanh dyei goeus yvmvyah gausyis nyeis geh.
16 Namoq dius nyau vbusbih dvnganh paiq joqyos mas dvzvn lyis somh lhain Yhensain lhyi los paiq chah. Houka Lhuiq Kat Pwe, Jyo yhomh pwe, Phunk pwe mha nghuot. Jyungshuk ma chi ngah jyank mas hank eq ma gis thuq xoeuq. 17  Yhensain, nah Mangso nyang lyis shvmanh dyei yvmas nyang yoh nyhoq, duot nyhoq chi los chah.
Lyi Jus dah Guon cho
18  Yhensain, nah Mangso namoq lyis dyei dah wus khanghmuh mas, soetuon bang yahge gohtoeu zau jens toeuq toh chah. Haih bang gas dius jens lyis dan khyvlyis soetuon das. 19 Nyamoq gas nyamoq dah soetuon yvmas lyi ma jus ma gis kuot, dius nyoqnho lhyi ma gis yoeuh, khauwhot ma gis zo: khauwhot gas joeui bos bang yahge dan bang dah nyoq lyis yangh gos tyamp las ma jus dah nghamh thyet cho bweh loh.Ref 16.19: Dyu 23.6-8; Lew 19.15 20 Vjangh yah yih yih lyi jus zis kuot aq, housoeh lyis Yhensain, nah Mangso namoq lyis dyei dah mau mas xauh nyeis das, housoeh namoq houmha yoh tsoq nyeis das.
21 Nvng Yhensain, nah Mangso xiklyis phon ci lhyi, hauh vyvm mas saiq Ashera gywes nyhiq vlho vtoh.Ref 16.21: Dyu 34.13 22 Paiq das xiklyis chah phvra lukzains eq vcuk toh. Hauh yvlyis Yhensain hoeng.Ref 16.22: Lew 26.1