5
Belshaza dah Zo shuk Pwe
Dvnyens gas hwankti Belshaza nyah xamchangh jens dvkhyoengh lyis yus las pwe zainsmuh kuot las nyamoq zvbiq dvgeh tsain shuk. Nyamoq shuk nyeis uhlyis Belshaza gas nyah uwus Nebukhaneza Yerusalem Yhenmuh masyah wons los dah ngwis xing kom, yahge khuq jens chi los das xiklyis zaudang khyoq. Hwankti ka nyamoq lyis khi yvmvyah, nyang eq nyah xamchangh jens, nyah yhensain nyhiq jens, nyah nyinhungh jens hou mhayah yoh tsain shuk. Hauh xing kom, xing khuq lyis lvnyap chi wvng los las nyamoq dvnganhmoq hou mhayah zvbiq tsain shuk las, ngwis, xing, thunk, thyeq, saiq yahge luk yah kuot toh mangso jens lyis tsain chungh.
Nyetlos nyettant dius loq dvkoeuq thuq los las hwankti yhen tyoyvm mas lhaih zoh loh. Houmha nyibung dah bvng zis vlhomuh bvng nyeis. Hauh loq housoeh lhaih nyeis yvlyis hwankti nyvng. Nyang nyoqnho dyoq zis yah svsoh gyuk dvn las nyah phvlukchvp nvn los. Nyang yomkat kaiq las, dvyuk yuk hweq kat bang, gyuiswvng bang, kyi yoeuh bang lyis shwih los geh, ge. Nyamoq wvng los lyis hwankti taiq zis gas, Hank laus eq hai lhaih toh zis yoh nghap las hauh vjyuk cha nghuot zis ngos lyis yoh taiq kyoh soeu ka hwankti dyimis huot, nyah lainzain mas xing jvngchoh huot zis yah nyang haih munghdan mas yomsoq bos soeu somh vyuk duot das, ge. Hwankti dah joeui dyei bang xik mas los laus eq, nyamoq hank eq hwankti lhyi hau lhaih toh zis ma yoh nghap, vjyuk eq ma yoh taiq kyoh. Hwankti Belshaza gas svsoh chiq las, nyang nyoqnho zes dyoq los. Nyah xamchangh jens eq cha kuot das zis ma seq mus nyeis.
10 Hwankti dah ungwes hwankti nyhiq gas hwankti yahge nyah xamchangh jens dah thwe xauhgyo las nyang pwe yvpmuh mas wvng los. Nyang taiq, Hwankti vcaiq vto dwis nyeis bas jungh, vchiq, nyoqnho vdyoq. 11 Nah munghdan mas gyingshang mangso jensnote 5.11 mangso jens, nghuot ya Mangso. dah dyos bos soeu dvyuk nyeis. Nah uwus hwankti kuot yoq lyis haih soeu ka gis dah ehnyet, seq cho, mangso jens dah joeui teh dah joeui bos cho chixoeuq. Nah uwus hwankti Nebukhaneza gas nyang lyis botthyet bang, hweq svra jens, gyuiswvng bang yahge kyi yoeuh bang dah vgyis toh. 12 Nyang gas kunk, joeui bos, yhetmoq pho cho mha lyes, wishomp seq phant, nghop toh cho seq taiq thuq; housoeh las hwankti yah Belteshaza ge nyhink dyei dah haih dius Daniel lyis khi aq. Nyang haih vjyuk cha nghuot zis dvnganh nvng lyis taiq kyoh das, ge.
Daniel Hau Lhaih toh Vjyuk Phui
13 Daniel lyis hwankti xikkhonh mas lvnyap shwih los las hwankti nyang lyis taiq zis gas, Nvng ngah uwus hwankti ka Yuda mau masyah heimha shwih los, Yuda jonsdoeus soeu Daniel vnghuot lah? 14 Nvng mas gyingshang mangso jens dah dyos bos las nvng lyes, seq cho yahge joeui bos cho ngos xauhgyo. 15 Hai lhaih toh zis nghap las hauh vjyuk cha nghuot zis ngos lyis taiq kyoh das xiklyis joeui dyei bang yahge hweq kat bang lyis shwih wvng los laus eq nyamoq hauh vjyuk ma yoh xo nyvng. 16 Gvshih nvng nghop toh vjyuk yoh xo, nghop shung toh cho lhyi seq phant cho, ngos xauhgyo: Nvng hai lhaih toh zis yoh nghap las hau chah vjyuk nghuot zis ngos lyis taiq lyis, nvng hwankti dyimis wuot, lainzain mas xing jvngchoh wuot las haih munghdan mas yomsoq bos soeu somh vyuk duot das, ge.
17 Daniel phuk taiq zis gas, Nah jyungshuk nvng yoeus toh aq, nghuot ya dvyuk yuk lyis dyei aq. Ngos nvng hwankti lhyi hau lhaih toh zis nghap las nyah vjyuk cha ge zis taiq kyoh das.
18 Nyhang Thank Mangso ka, nah uwus Nebukhaneza lyis hwankti zainsmuh kuot las shop shop bweh nhang, shoenkkhyi dyei. 19 Nyang gas svsoh kuhxing lha dius nyau jens, vnyau jens nyingh gohja ja kat bang dvnganh, nyang lyis gyuk las tsain nvn. Nyang dvyuk yuk lyis sat mes lyis sat. Dvyuk yuk lyis vdwis toh mes lyis vdwis toh. Nyang hank lyis laus eq, chungh mes lyis chungh las hank lyis laus eq khyoq mes lyis khyoq. 20 Nghuot laus eq nyang khwank, ehnyet than, lhoeng yvmvyah nyang gas nyah hwankti tank masyah khyoq zis xauh las nyang lyis chungh dah joqyos chithyuk tyamp. 21 Nyang gas diusphung mhayah khat tyamp zis xauh. Nyah ehnyet yewus ehnyet teh bweh los. Nyang ye mauhlyihzoe jens yah dvgeh noeu teh mhanh zo las nyeis. Nyang nghe mha yhet las nyah gungs gas jyweh yah jyweq nyeis. Thang thank lyis nyang gas Nyhang Thank Mangso ka dius dah munghdan jens lyis joeu las, nyang khyen yoeus soeu hank lyis laus eq hauh zis yoh dyei ge rhen.
22 Nghuot laus eq nyah lo, nvng haih cho dvnganh seq toh laus eq, nah ehnyet lyis nyhen mha ma khyoq. 23 Nvng maukhung Yhensain yah tyi lha kuot, nyah Yhenmuh masyah yoeus los dah kom yahge khuq jens lyis chi wvng los. Nvng, nah xamchangh jens, yhensain nyhiq jens, nyinhungh jens hauh kom mhayah zvbiq tsain shuk zis yah, ma yoh nyvng, ma xauhgyo, cha ma seq, ngwis, xing, thunk, thyeq, saiq yahge luk yah kuot dah mangso jens lhyi chungh. Nghuot laus eq nvng dwis das lah shei dah lah yvlyis thyet las nvng kuot zis dvnganh yvlyis joeu nyeis soeu Mangso lhyi nyoqnho ngelang ma dyei. 24 Housoeh yvmvyah Mangso hauh loq nhang lha haih dang tsain lhaih toh.
25 Heika lhaih toh zis nghuot: Suon, Suon, Laiq, Gvm loh. 26 Haih zis gas hauh vjyuk nghuot: Suon, Mangso nah munghdan buisnyeis lyis suon lha thank loh nhang goeus. 27 Laiq: Nvng lyis jvng mas laiq lyis somhtanghlhangh nghuot zis nyvng. 28 Gvm loh: nah munghdan lyis gvm loh las Mede yahge Persia lyis dyei goeus, ge.
29 Houjang Belshaza gas Daniel lyis hwankti dyimis huot, nyah lainzain mas xing jvngchoh huot zis yah nyoqnho ngelang dyei das xiklyis nyah jyeidwis jens lyis zaudang khyoq. Nyang Daniel lyis munghdan mas yomsoq bos soeu somh vyuk kuot.Ref 5.29: Vpm 41.42 30 Hauh nyens lyis Babilon hwankti Belshaza gas sat zis xauh las, 31 nyenhkyi khyukci aiq zvn nghuot dah Mede dius Dari gas hwankti yomsoq nyhik yoeus tyamp.