11
1 Mede hwankti Dari doq dah zvn lyis, Mikhael lhyi ngvnyang yombos nhang lha gos dyei.
2 Gvshih ngos nvng lyis taiq kyoh das zis gas jyoeng.
Egutu, Siria Munghdan
Loeuswons soeu taiq, Persia mau lyis hwankti somh yuk guon shih das, houmha chank los nyei vyuk gas gohtoeu dvnganhmoq thoq lyis zisyos zes yoh das. Nyang yomsoq yahge zisyos nyhang lhyi nyang Greece munghdan lyis loqyom tyonh das.
3 Hauh thang lhyi yombos dah hwankti dvyuk thuq los das. Nyang gas munghdan kuh dvkoeuq lyis guon das las nyang o zis kuot das.
4 Nghuot laus eq nyah yomsoq yomtsoeuh nyuk los lyis nyah munghdan gas nyei khyamh gyoh Gwi las Gvm tyamp das. Nyang masyah ma dyos lyih dah hwankti jens nyah joqyos mas guon das. Nghuot laus eq nyamoq mas nyang mas bos khoq dah yomsoq ma bos.
5 Egutu hwankti yombos los das. Nghuot laus eq nyah jeszau jens mas dvyuk yom zes bos las zes kuh munghdan lyis guon das.
6 Zvnlom nyoshoq thang lhyi Egutu hwankti ka Siria hwankti yah buisnoms kuot las nyah lonyi lyis dyeizo das. Nghuot laus eq hau buisnoms kuot cho ma doengs das, nyang eq, nyah yhensain phoq, nyah lonote 11.6 Nyah lo ge zis Hebre mas gas nyah uwus, ge bos. yahge nyang lyis loh dih kat bang nyah jyeidwis jens dvnganh sat zis xauh das.
7 Hauh thang lhyi ma nyangh lyis lonyi dah sainhchangh dvyuk hwankti bweh los das. Nyang gas Siria hwankti dah jesphung lhyi nyamoq dah thoenkgus jesdvp mas wvng zan las ung das.
8 Nyang gas nyamoq dah mangso gungslho jens, hauh mangso jens lyis dyei toh dah ngwis xing kyahsoe jens lyis Egutu pheh doms yoeus e das. Zvn nyo nyo lo nyenstap joq thang lhyi,
9 Siria hwankti ka, Egutu mas nyhenh wvng loh das. Nghuot laus eq nyah mau pheh tsoengh tauh loh nhang zis xauh das.
10 Siria hwankti dah loloeu jens gas jeszan das sont las jesphung zainsmuh dvkoeuq tsainh toh das. Nyamoq mas dvyuk gas jeswus dah thoenkgus jesdvp lyis jeis soeh nhauq las zan shenh loh das.
11 Egutu hwankti ka nhaiqyo zis yah Siria hwankti lhyi tyi lha loh zan las nyah jesphung zainsmuh lyis nyhik yoeus das.
12 Nyang gas ung los las eq, jeslo jens nyoshoq lyis xauh sat las eq khwank das. Nghuot laus eq nyang tsoq las ma ung das.
13 Siria hwankti ka tauh loh las xikpheh thoq lyis zes nyo dah jesphung lhyi tsainh toh das. Shishenh jweh lyis jes kyahsoe yah dyingh dah jesphung zainsmuh yah tauh los das.
14 Hauh thang lhyi dius jens nyoshoq Egutu hwankti lhyi tyi lha gomloeus toq das. Daniel eh, Nyoqnyvng nyuk los das xiklyis nah vnyau mas thyoqzo bang dvyhamh gomloeus toq das laus eq nyamoq somh tyamp das.
15 Housoeh las Siria hwankti ka lhaink toh zis yah, thoenkgus jesdvp bos wus dvwus lyis zan yoeus das. Egutu jeslo jens gas ma tsoq zan lo das, nyamoq mas yombos thank bang yangh yom ma tham lo das.
16 Nyhenh wvng los dah Siria hwankti ka nyang lyis thoenk soeu ma bos las nyang mes khyvlyis kuot das. Nyang gas dangthoengh toh dah mau mas nyeis las mhont das yomsoq yoh das.
17 Siria hwankti ka nyah jesphung gonh yhung lha jens loh das zis nghamh toeuq. Housoeh lyis nyah jeswus dah munghdan lyis yoh mhont das xiklyis nyang yah buisnoms kuot las nyah lonyinote 11.17 Nyah lonyi, nghuot ya Lonyilo dvyuk ge bos. dyeizo. Nghuot laus eq nyang toeuq cho ma ung das.
18 Hauh thang lhyi nyang gas thomh yvm mas dah dius nyau jens lyis zan las nyoshoq moq lyis ung das. Nghuot laus eq lvbaus uhshe soeu dvyuk nyang lyis ung das las, nyang lhoq lhoq teh kuot cho thank loh nhang das. Jyoengh, Siria hwankti dah lhoq lhoq teh cho nyah thoq mas tauh dyei das.
19 Hwankti ka nyah mau mas dah thoenkgus jesdvp pheh tauh loh das, nghuot laus eq nyang gas somh loh das, shei loh das.
20 Nyah thang mha gohtoeu hwankti dvyuk thuq los das. Nyang gas nyah munghdan mas zisyos je los das xiklyis dius jens lyis vkhoq zaiq kui das zis zau dvyuk nhang das. Ma nyangh lyis hau hwankti ka sat zis xauh das. Nghuot laus eq nyang gas dius jens nyvng yvmas eq ma nghuot, jeszan mas gyoh zis eq ma nghuot, ge.
Siria Hwankti Lhung
21 Loeuswons soeu phui kyoh nyeis shih. Hauh Siria hwankti ka lhoeng soeu nghuot das. Nyang gas hwankti kuot das toeuh ma yoh. Nyang gas dius jens nyenstap joq uhlyis hauh munghdan lyis dyvm zan las nyhenh wvng das. Nyang gas dius jens lyis mhuih zis yah yomsoq zwi tyamp.
22 Nyang lyis tyixo soeu ka, Mangso dah Phudyei Zainsmuh laus eq thyoqpi lha thyuk tyamp zis xauh das.
23 Nyang gas buisnoms toh thang lhyi nyamoq lyis mhuih jyomh das. Housoeh nyang gas dius nyau ngis lyis dvguon laus eq zes zes yombos los das.
24 Nyang gas yohzo yohshuk dah mauxom mha lhvp nyhenh wvng las nyah phauh thyeih moq hank eq ma kuot ku yvlyis kuot das. Hauh thang lhyi nyang jes mas xauh yoeus dah zisyos kyahsoe lhyi nyah thang chank bang lyis gvm dyei. Nyang thoenkgus jesdvp jens lyis zan das zis toeuq laus eq nyah shishenh ma nyangh lyis thank tyamp das.
25 Nyang gas Egutu hwankti lhyi jeszan das zis jesphung dvkoeuq womh womh tsom toh das. Egutu hwankti eq thoenk zan das zis yomsoq bos dah thoenkgus jesdvp zainsmuh sont das. Nghuot laus eq Egutu hwankti ka mhuih zis xauh las ma ung das.
26 Nyang yah ni thank joeui dyei bang nyang lyis mhont das. Nyah jeslo jens nyoshoq sat xauh das, nyah jesphung ka thyuk tyamp zis xauh das.
27 Hauh thang lhyi hau hwankti aiq yuk dvjus mas dvgeh wom zo das zis tsung das laus eq nyamoq dah ihsoeh gas ma gis zis nghuot las, dvyuk yah dvyuk hwah goh das. Mangso toeuq toh shishenh ma jweh shih yvmvyah nyamoq o zis ma yoh kuot.
28 Siria hwankti ka Mangso dius jens dah lomsnoq cho lhyi mhont das ge nghamh thyet zis yah nyang xauh yoeus dah lvnyhvp dvnganh yah dvgeh nyah yhen pheh tauh loh das. Nyang gas, nyang o khyvlyis kuot thang lhyi nyah mau pheh tauh loh das.
29 Thang lhyi nyang Egutu mas doms nyhenh wvng das. Nghuot laus eq haq lhain ka chojeis gohshot shaih loh das.
30 Roma jens sangpho yah los las nyang lyis loqyom tyonh zan das las nyang gyuk das.
Hauh thang lhyi nyang nhaiqyo zis yah tauh los las Mangso dius jens dah lomsnoq cho lhyi tungh mhont das. Hau lomsnoq cho lhyi tyamp bang joeui dyei yvlyis chank kuot das.
31 Nyah jeslo jens dvyhamh Yhenmuh lyis vwot v-oeu kuot. Nyeih yau phudyei lyis tung tyamp las, gyukphoh vchoqh vjyot lyis toeu tsung toh das.Ref 11.31: Dan 9.27, 12.11; Mat 24.15; Mak 13.14
32 Hwankti ka mhuih zis yah hau nyamoq dah lomsnoq cho lhyi tyamp goeus bang dah thuk cho yoh das. Nghuot laus eq Mangso thang chank bang gas tauh zan das.
33 Dius jens mas joeui bos dah uhshe bang gas nyamoq dah joeui, gohtoeu dius nyoshoq lyis gvm das. Nghuot laus eq dvxa nyangh shoq nyamoq mas dvyhamh jes mas sat xauh das, nghuot ya ngheq sat, dvyhamh lhuot zo zis xauh, thung khyoq zis xauh das.
34 Housoeh sat cho bweh los uhlyis Mangso dius jens yah los tsoq bang nyothyang ka vsainnyang vkyuh xo laus eq Mangso dah dius jens gas nyamoq masyah pangh thuk cho dvtsiq xauh yoeus das.
35 Hau joeui bos dah uhshe bang dvyhamh sat zis xauh das laus eq haih vthang ka dius jens shangkyei los das. Haih zis gas Mangso toeuq toh dah shishenh vthang jweh shoq tsoq bweh nyeis das.
36 Siria hwankti ka nyang o khyvlyis kuot das. Nyang gas mangso dvnganh thoq lyis zes kuh, ge moengs das. Nyhang thank soeu lhyi tyi lha gyukphoh loeusmus soqzo dang taiq das. Nyang haih zis lyis Mangso nyang lyis joeng shishenh jweh shoq yoh zau das. Mangso ka nyang toeuq yvlyis top kuot das.Ref 11.36: 2 Th 2.3-4; Nyoq 13.5-6
37 Hauh hwankti ka nyah phauh thyeih moq phuqsoe dah mangso yahge vmesbih jens jyet dah mangso lhyi eq chaxwe ma nhang das. Jyoengh, hau dvnganh thoq mas nyang zes kuh ge nghamh das yvmvyah mangso khanghmuh lyis chaxwe ma nhang das.
38 Hauh gungsthaiq, nyang thoenkgus jesdvp jens lyis gos dah mangso lhyi nyoqnho ngelang dyei das. Nyang gas nyah phauh thyeih moq khanhamp eq ma paiq dah mangso lhyi ngwis, xing, phauhdap luk, yahge gohtoeu phauh dah jyungshuk dyei das.
39 Nyah thoenkgus jesdvp jens lyis khomp das xiklyis nyang lvbaus mangso lhyi paiq bang lyis yhung das. Nyang lyis guon soeu khyvlyis lhom yoeus bang lyis nyoqnho ngelang zainsmuh dyei, nyamoq lyis nyhang zautank dyei, phauh shangh khyvlyis nyamoq lyis maunyeis dyei das.
40 Siria hwankti dah thang thank shishenh vluk jweh los lyis, Egutu hwankti nyang lyis zan das. Siria hwankti eq jeslhyingh jens, nyang jens yahge sangpho nyoshoq yhung lha nyah yomsoq dvnganh yah thoenk zan das. Nyang gas mau nyoshoq mas jeis nhauq teh nyhenh wvng zan das.
41 Nyang gas phauhdap thank mau mas wvng las mau nyoshoq gas toeulhain zis xauh das. Nghuot laus eq Edom, Moab mau yahge Amon lo jens nyothyang nyah loq masyah yoh luiq das.
42 Nyang gas, vyvm vwi mau thoq mas nyah loq toeu lhyi Egutu eq ma yoh luiq das.
43 Egutu mas yung toh dah ngwis xing yahge phauhdap ja dvnganh yvlyis nyang xauh sain lha Libya yahge Khush bang gas nyah thang chank das.
44 Nghuot laus eq buisthuq yahge mautsung pheh yah thuq dah loeus gvng mas nyang chiq las dius nyoshoq mhont das xiklyis nhaiqlom tsoeu zis yah thuq los das.
45 Nyang gas thomh yahge phunk bos gyingshang boms jo mas nyah hwankti yhen zvng tsain kuot toh das. Nghuot laus eq nyang lyis pangh soeu hank ma bos las thank tyamp das.