KORINTHU
BANG LYIS CANGXEIH HUON MAUSSAUH
(1 CORINTHIANS)
Hauh wus gas soenghi cho mha svsoh kuhxing dah wus, lyi thungh chank cho mha khwank nyeis dah wus, lomsnoq cho vja ja changjet dah wus, ge nyings hoeuh. Lvgyo Paulo dah maussauh mas yhaugyen dah soe ka, phung mha xam ma xonh las lvn loh cho, nyetnau cho chank las wotwu dyoq cho, nye yukgis zomh cho yahge phoengh hwank dah nyeidang jens, ehnyet lhoq shang cho, phung khau mha chank chah cho, Gyingshang Dyos dah jyehjuh jyungshuk cho yahge dwis toq cho tsain nghuot. Nyang gas Yhensain Yesu dah cho gausyis loeus ge dah dang yah dvyhangteh, hauh soe dvkoeuq dvkoeuq lyis nauh nauh seq gyo seq nyvng shoq taiq phui kyoh toh.
Mangso dah dius nyau jens lyis Mangso dyei dah jyehjuh jens mas kuh thank dah jyetdap ehnyet cho chixoeuq toh dah sonzoh dvci somh gas haih maussauh buk gonh mas dius jens zes seq thank dah vdoeus nghuot.
1
Yesu Khristu dah lvgyo kuot das xiklyis Mangso dah ehnyet yah khi toh dah ngos Paulo yahge boek Sotene gas,
Korinthu wus mas joq, Mangso dah phung mha bos bang yahge khyiq khanghmuh mas ngamoq yahge nyamoq dah Yhensain Yesu Khristu lyis chomp paiq bang Khristu Yesu gvng mas Mangso dah gyingshang bang bweh das xiklyis lui yoeus zis xauh bang dvnganh jyank mas dang tying kat.Ref 1.2: Lgy 18.1
Yah Uwus Mangso yahge Yhensain Yesu Khristu dah jyehjuh yahge nyenstap zis gas namoq lyis dyei bas jungh.
Khristu mas Shvmanh Jyehjuh
Yesu Khristu gvng mas namoq lyis jyehjuh dyei toh yvmvyah, ngos namoq nyhenshang ngah Mangso lhyi vjangh nhaiqshoqlang sang. Namoq gas Khristu Yesu mas dvdain dvlom bweh nyeis yvmvyah taiq dang yahge seq cho dvnganh, ja khanghmuh gas nyah gvng mas dyinghjet joq goeus. Khristu dah Loeus gas namoq mas vnyet goeng goeng yoh chent joq goeus. Housoeh, yah Yhensain Yesu thuq los das yvlyis langh nyeis uhlyis namoq ma xauh lhom yoeus dah jyehjuh jyungshuk dvja eq ma bos lo. Yah Yhensain Yesu Khristu dah buisnyeis lyis yobos huon chank ma bos bas jungh, Nyang gas thang thank jweh shoq goeng joq nhang das. Nyah Lo, yah Yhensain Yesu Khristu yah yoh zomh shoq namoq lyis lui yoeus dah Mangso ka wontang.
Phung mha Gang Lvn Cho
10 Ngah boekyis eh, namoq dvnganh gas taiq dang xamxonh goh nyeis das xiklyis ngos namoq lyis Yah Yhensain Yesu Khristu nyings yah yomdyei kat; housoeh lyis namoq mas gang lvn loh cho ma bos das. Namoq nghamh cho, toeuqkhom dvkoeuq mas xamxonh goh nyeis geh. 11 Khasoeh ge lyis, ngah boekyis eh, namoq mas dyoqgoh cho bos yvlyis Khloe yhenbang dvyhamh ngos lyis los taiq kyoh. 12 Ngos heisoeh taiq bah, namoq dvyuk yah dvyuk shaih khyvlyis, Ngos gas Paulo thang chank, ngos gas Apolo thang chank, ngos gas Petru thang chank, ngos gas Khristu thang chank, ge tsain taiq goh nyeis.Ref 1.12: Lgy 18.24 13 Khristu gas vphung phung khyoq zis xauh goeus nyvng lhyeh? Paulo ka namoq xiklyis taplhangh zis kham goeus lhyeh? Namoq Paulo nyings masyah jeisnyhop tsain kham goh lhyeh?
14 Krispu yahge Gai-u mas lai las, ngos namoq hank lyis eq jeisnyhop ma dyei yvmvyah ngos Mangso lhyi nhaiqshoqlang sang.Ref 1.14: Lgy 18.8, 19.29; Rom 16.23 15 Housoeh yvmvyah namoq gas ngah nyings yah jeisnyhop kham goeus ge hank eq ma yoh tsain taiq. 16 Jyoengh oen lhyi Stephana yahge nyah yhenbang lyis eq ngos jeisnyhop dyei goeus; hauh thoq lyis gohyuk hank lyis dyei shih lah zis ngos ma soh lo.Ref 1.16: 1Kr 16.15 17 Khasoeh ge lyis Khristu ngos lyis nhang kat zis gas jeisnyhop dyei das xiklyis ma nghuot, gausyis dang taiq kyoh das xiklyis dvnghuot. Khristu dah tapzains dah yomsoq gas vkom ma bweh bas jungh, ngos nhuot joeui yah taiq kyoh zis ma nghuot.
Khristu gas Mangso Joeui
18 Khasoeh ge lyis Khristu tapzains mas shei dah loeus gas, dyoqbis loh bang xiklyis vjyuk ma bos; nghuot laus eq khyuot yoeus xauh bang, yah xiklyis gas hauh zis Mangso dah yomsoq nghuot. 19 Khasoeh ge lyis lhaihtoh dang mas taiq zis gas,Ref 1.19: Esa 29.14 (LXX)
Joeui bos bang dah joeui lhyi ngos lhoq thyoq das,
Dolhain bang dah seqgyo cho lhyi ngos peq tyamp das,
ge. 20 Housoeh las joeui bos bang khalhye nyeis lah? Maussauh lhaih soeu khalhye nyeis lah? Haih mungkvn mas dah dangdat khalhye nyeis lah? Mangso ka haih mungkvn mas dah joeui lhyi vkoh vpaq kuot tyamp dyei ma nghuot lhyeh?Ref 1.20: Yob 12.17; Esa 19.12, 33.18, 44.25
21 Khasoeh ge lyis dius gas vsainnyang joeui yah Mangso lhyi ma yoh seq bas jungh ge, Mangso ka nyah joeui da zis yah dvyhangteh kuot toh goeus. Hauh gungsthaiq ngamoq taiq kyoh dah dang koh paq, lyis lomsjingh bang lyis khyuot yoeus das xiklyis Mangso nghamh thyet goeus. 22 Hauh yvlyis kyink das nyhenshang Yuda jens gas vlho tsain sang lha, Heleni jens gas joeui tsain xo. 23 Nghuot laus eq ngamoq gas, taplhangh toh zis xauh soeu Khristu dah cho tsain taiq kyoh. Hauh zis gas Yuda jens dah xiklyis lainszo gus nghuot, Gohnyau bang xiklyis koh paq bweh nyeis. 24 Nghuot laus eq Mangso khi yoeus zis xauh dah Yuda jens yahge gohnyau bang xiklyis Khristu gas Mangso dah yomsoq yahge Mangso dah joeui nghuot. 25 Khasoeh ge lyis Mangso dah vkoh vpaq cho ka dius dah joeui bos thoq lyis joeui zes bos. Mangso dah yomnhuk zis gas dius dah yombos thoq lyis yom zes bos.
26 Gvshih boekyis eh, namoq lyis khi yoeus cho nghamh wu yoeuh geh. Gungsshoh khyvlyis joeui bos bang nyoshoq bos zis ma nghuot. Toeuh bos bang yahge zau nyau mas bang eq nyoshoq bos zis ma nghuot. 27 Mangso ka joeui bos bang lyis xoq lhoeu phuh das xiklyis mungkvn mas koh bang ge nghamh toh bang lyis khyen yoeus. Yombos bang lyis xoq lhoeu phuh das xiklyis mungkvn mas yomnhuk bang ge suon toh bang lyis khyen yoeus. 28 Mungkvn mas yhaugyen ge nghamh yoeus bang lyis mhont das xiklyis Mangso ka dius ngis gyoh bang, gohyuk yah choqh bang, cha ma nghuot ge nghamh yoeus zis xauh bang lyis khyen yoeus. 29 Hauh vjyuk gas, Mangso xikkhonh mas hank eq ma yoh khwank das xiklyis nghuot. 30 Mangso ka namoq lyis Khristu yah dvdain dvlom bweh nhang goeus las, Mangso ka Khristu lyis, yah dah joeui duot los nhang goeus. Yang nyah gvng mas Mangso xikkhonh mas yoh dan los goeus. Mangso dah gyingshang bang yoh bweh los goeus zis yahge yaunos masyah khyuot kat zis xauh goeus. 31 Housoeh las lhaihtoh dang mas taiq zis yah dvyhangteh, Khwank dais bos soeu hank laus eq Yhensain mha khwank nyeis bas jungh, ge.Ref 1.31: Yer 9.24