6
Israel dah dyoqbis cho
1 Zion mha pyo pyo nyeis bang, Samari mas jesluiq goeus ge nyeis bang, mung dius jens pangh cho los dung zis xauh bang, hai kuhxing dah Israel vnyau dah uhshe zainsmuh jens eh, namoq xiklyis kha iq gyukphoh nghuot lah!
2 Khalne wus mas loh yoeuh geh. Hauh thang lhyi kuhxing dah Hamat wus, tsoq las Philisti mau Gat wus pheh gyoh loh geh. Hauh mau jens gas Yuda yahge Israel munghdan jens thoq lyis gis lhyeh? Nyamoq mau gas namoq mau thoq lyis kuh lhyeh?
3 Namoq gas dyoqbis zainsmuh buisnyeis jweh los nyeis yvlyis rhen das zis ngoek. Nghuot laus eq hau nvng kuot zis gas hauh buisnyeis zes ni shoq dvshwih los.
4 Cangzwis yah shunk toh jung mas lhain lha, yvnglo, yahge nyhuk toh dah noeulo yah pwe tsain kuot. Namoq xiklyis kha iq gyukphoh nghuot das lah?
5 Namoq gas Dawi kuot khoq teh chunghthwe xo coeu lha toenk yah xiq las bat mes.
6 Zvbiq lyis khuq dyingh dyingh shuk, nyamoq gungs lyis gis thank xangh coeu juot las nyeis. Nghuot laus eq Israel dah dyoq gyoh cho lhyi ka ma tsain kuk.
7 Housoeh las namoq shih cangxeih jonsdoeus loh das. Namoq dah pwelo pwezains thank loh lo das.
8 Yomzains Maukhung Jesphung Yhensain hai than than zaih nhang cho dyei. Ngos Israel dius jens dah khwank cho lhyi hoeng. Nyamoq pyo dah yhenzains yoszains lyis choqh. Ngos nyamoq dah wusmuh yahge houmha zis dvnganh lyis nyamoq dah jeswus lyis dyei tyamp das, ge.
9 Dvyhenbang mas dius dvci yuk nyet lyis nyamoq shei das.
10 Shei soeu dvyuk dah sainhchangh, shei pwe mha dah pwe sain ka, mvng lyis yhen khau mhayah yoeus thuq das. Hau sainhchangh gas yhen mha lungh joq shih soeu lhyi, Nvng yah hank vnyeis lo lah, ge lyis dvyuk yuk gas, Ma nyeis lo, ge das. Housoeh sainhchangh gas, Samlo nyeis aq, yang zaih chah, Yhensain nyings yangh ma gis yoeus, ge das.noteHebre mas ma bvng
11 Yhensain tying toh lyis, yhen kuh, yhen ngis lyis thungh thyi tyamp das.
12 Nyang jens gas luk thoq mas pant lhyeh? Thomh lyis noeulu yah dvyuk yuk phuk lhyeh? Nghuot laus eq namoq gas lyi jus cho lhyi nyonoq, jus cho lhyi ma jus yvpheh lhaiq kat.
13 Namoq gas Lo Deba wus lyis nyhik yoeus cho lhyi moengs. Ngamoq gas Karnaim lyis yoeus das yombos, ge moengs.noteHebre mas Lodeba vjyuk gas cha eq ma nghuot; Karnaim vjyuk gas Khyau, yombos dah vlho
14 Maukhung Jesphung Yhensain Mangso nyang taiq, Israel jens eh, ngos namoq dah mau mas wvng nyeis das lvbaus jesphung nhang das. Hauh zis gas namoq lyis mautsung pheh Hamat langhwuq masyah mautyi pheh Araba Langhkhau jweh shoq namoq lyis shoeuhshih das, ge.