5
Nhaiqlom thaiq das xiklyis lui
1 Israel dius jens eh, hai ngos namoq xiklyis kat dah shei uhngauh yvlyis gyo geh.
2 Lonyi teh nghuot dah Israel gas lains joq goeus,
khanhamp eq ma doms toq los lo:
nyang lyis nyeisjvng mas doeuh tyamp toh goeus,
nyang lyis hank ma toeutoq lo.
3 Yomzains Yhensain taiq, Israel jeslo dvkhyoengh nhang kat dah wus mas dvxo, dvxo nhang kat dah wus mas dvci kyingh dvtauh los lo das, ge.
4 Yhensain Israel dius jens lyis taiq, Ngah jyank mas los geh, housoeh lyis namoq kang dwis das.
5 Paiq das zis Besheba mas vloh goh: ngos lyis Bethel mas vtungh xo goh. Bethel gas cha eq ma nghuot lo das. Giga mas vloh goh, nyah dius jens gas jonsdoeus loh goeus.
6 Yhensain jyank mas loh geh, housoeh lyis namoq kang dwis das. Namoq ma loh lyis nyang Israel thoq mas nyi soeh ngeh los das. Hauh nyi gas Bethel dius jens thoq mas ngeh loh las hank eq ma yoh sat das.
7 Lyi jus cho lhyi lhyent las dius jens lyis nyamoq dah toeuh lyis mhuih yoeus bang eh, namoq gas jom goeus.
8 Yhensain ka Kru mvjvnnoteKru mvjvn ge zis English mas Pleides ge zis nghuot. yahgeRef 5.8: Yob 9.9, 38.31
Wala shingtaunoteWala shingtau ge zis Orion ge dah kyi nyings nghuot. ge kyi lhyi tsain kuot toh.
Nyang gas mauchuotdwang lyis bvng yvpheh,
nyeih lyis nyenh pheh lhaiq kat.
Thomh mas jeis lyis lui las
nyeisjvng thoq mas huot khyoq.
Nyah nyings Yhensain nghuot.
9 Nyang gas yombos bang yahge
nyamoq dah thoenkgus jesdvp jens thoq mas dyoqbis cho she kat.
10 Dius jens namoq gas soetuon jang mas lyi ma jus yvlyis tyi lha taiq bang lyis hoeng. Jus zis taiq bang lyis hoeng.
11 Namoq nyungs bang lyis zaiq las nyamoq dah jyo lhuot yoeus. Housoeh las namoq luk yungh yah ci dah yhen mas ma xauh nyeis das, nghuot ya namoq tsungh dah zvbiq khyam yungh mas dah zvbiq ma xauh shuk das.
12 Namoq dah yaunos kha iq gyukphoh nghuot zis yahge dius khanyhoq sat zis ngos seq. Namoq dius gis jens lyis shoeuhshih, khauwhot zo, nyungs bang lyis soetuon jang mas jus khyvlyis ma yoh nhang.
13 Housoeh las hei iq ma gis dah shishenh lyis samlo nyeis zis gas yik cho kuot zis nghuot.
14 Namoq kang dwis das xiklyis ma gis zis jhank las gis zis tungh xo kuot geh. Housoeh lyis Maukhung Jesphung Yhensain Mangso ka namoq taiq zis yah dvyhangteh namoq yah dvgeh jyoengh nyeis das.
15 Ma gis yvlyis hoeng lha, jus yvlyis jyet geh: soetuon jang mas lyi jus cho ung los yvlyis yoeuh geh. Yhensain ka haih vnyau mas kang dwis nyeis shih bang lyis nhaiqnyen das mvbeh.
16 Housoeh las Maukhung Jesphung, Yomzains Yhensain taiq, Wus talhoeu jens mas noskyingh kuk ngaus das. Nyamoq gas yos zwi bang lyis yangh mvng lyangh bang yah dvgeh los ngaus das nyhenshang khi das.
17 Zvbiq khyam dvnganh mas kaiq ngaus cho bos das. Ngos namoq lyis los joeng das yvmvyah haih zis bweh das. Yhensain taiq goeus.
18 Yhensain dah buisnyeis lyis langh nyeis bang xiklyis houka kha iq gyukphoh nghuot! Hauh zis namoq xiklyis chah vkyuh dyei lah? Namoq xiklyis hauh buisnyeis gas chuot las bvng zis ma bos das.
19 Houka dvyuk yuk khangkhyi lhyi phang lhyi woms yah xauhgoh teh nghuot das, nghuot ya dvyuk yuk yhen mha los las nyah loq tyoyvm mas kih lyis lhangnyis chweh teh nghuot das.
20 Yhensain dah buisnyeis gas chuot zis she los las ma bvng. Houka bvng zis ma bos soeng soeng noq dah buisnyeis nghuot das.
21 Yhensain taiq, Ngos namoq dah lomsnoq cho pwe lyis hoeng. Ngos hauh yvlyis ma yoh jhen lo.Ref 5.21-22: Esa 1.11-14
22 Namoq ngos lyis ngheq dyei jyungshuk, jyo jyungshuk chi los dyei lyis ngos hauh yvlyis ma lhom yoeus das. Jyungshuk khyvlyis namoq nyhuk toh dah gaunyhauq she los zis ngos ma lhom yoeus das.
23 Namoq dah chungh hoeu thwe lhyi no geh. Ngos namoq dah toenk lyis ma mes gyo.
24 Hauh gungsthaiq, lyi jus cho ka jeislo lvng teh yaus las, dan cho ka khanhamp eq ma kanh loh dah jeislvng teh nghuot nhang geh.
25 Israel dius jens eh, ngos namoq lyis mhanhdyvp mas nyeici zvn shwih los gyo lyis namoq lyis phudyei yahge jyungshuk ma sang.Ref 5.25-27: Lgy 7.42-43
26 Nghuot laus eq gvshih namoq hwankti mangso Sakut yahge kyi mangso Kaiwan gungslho lhyi tsain paiq goeus yvmvyah namoq hauh gungslho jens lyis tsain wuq yenh chah das.
27 Ngos namoq lyis Damasku thyitvp pheh dvmau mas shwih jons loh ge, Maukhung Jesphung Mangso ge nyings nghuot dah Yhensain taiq.