4
Yomnhuk bang lyis shoeuhshih, nyungs bang lyis zaiq las namoq dah yhensain phoq jens lyis, ngamoq shuk das zis yhei chi los geh, ge sang lha, Bashan mha nyhuk toh dah noeuzains jens teh coeu dah Samari vmesbih jens eh, haih zis gyo geh. Yomzains Yhensain ka gyingshang zis yah dvyhangteh nyang dangthoengh toh goeus. Namoq lyis nghweh yah lang she loh buisnyeis jweh los das. Namoq yuk khanghmuh gas oeng nghweh thyoh mas oengdoq teh nghuot das. Namoq lyis ni thank ciank dyoq dwang mas she loh las nghe pheh tyamp das, ge.noteDvkhonh bos shih zis Hebre mas ma bvng.
Israel jens Ma xuq
Yomzains Yhensain taiq, Israel jens eh, Bethel mha dah gyingshang joqyos mas loh las yaunos kuot geh. Namoq Giga mas loh chah lyis namoq duot nyhoq yaunos loh kuot geh. Nvp yau nvp phudyei gaunyhauq tsoq chi los geh, somh vnyeih khanghmuh ciboms dvboms yoeus los geh. Mangso lhyi nhaiqshoqlang ohlhyoq tsoq dyei geh. Namoq chi los dah lhyenwhei jyungshuk cho khwank kyoh geh. Heika namoq ngwis dah kuot ja nghuot.
Ngos namoq dah wus dvnganh mas phanghkhauq she kat laus eq namoq ngah jyank mas ma tauh los. Namoq dah jyo mau gvgis chah nyeis uhlyis ngos mau lyis zwi toh. Dvwus mas mau wus nhang laus eq gohtoeu dvwus mas mau ma wus. Yos dvkhyangh mas mau wus nhang lha dvkhyangh mas gas kyuk joq. Dius jens gas jeis shet las yomnhuk zis yah wus dvkhamh mas bang jeis xo nyvng das ge nghamhloms dah wus dvwus mas loh laus eq houmha jeis ma tham shuk. Nghuot laus eq namoq ngah jyank mas ma tauh los shih, ge.
Ngos lyeisjyenh nhang lha namoq dah jyo lhyi kyuk nhang. Janghgyik gas namoq dah khyam, zvbiq khyam, maiphang zains, tsanlun zains lyis dvnganh zo tyamp; nghuot laus eq namoq ngah jyank mas ma tauh los shih.
10 Ngos namoq jyank mas Egutu mas nhang dah yomh teh zis nhang. Ngos namoq dah loloeu jens lyis jeszan yvmas sat las namoq dah nyang jens lyis yoeus tyamp. Namoq dah thoenggus mas hau sheimvng dah bop shom yah namoq nho mha hoengh nhang. Nghuot laus eq namoq ngah jyank mas ma tauh los shih.
11 Ngos namoq dvyhamh lyis Sodom yahge Gomora lyis mhont teh mhont tyamp. Namoq doeng los bang gas ngeh nyeis dah wuseh lyis nyi masyah she thuq yoeus teh nghuot. Nghuot laus eq namoq ngah jyank mas ma tauh los, ge Yhensain taiq.Ref 4.11: Vpm 19.24 12 Housoeh las Israel dius jens eh, ngos namoq lyis joeng das. Ngos nvng lyis haih zis kuot das yvmvyah ngos joeng cho mha xauhgoh das zis cicont kuot aq, ge.
 
13 Mangso ka boms jens lyis kuot toh las,
lyeis lyis gvnkhanh toh soeu nghuot.
Nyang nghamh cho dius jens lyis seq nhang.
Nyeih lyis nyenh pheh thaiq kat.
Nyang gas nyeisjvng dah nyhang joqyos thoq mas suh loh.
Maukhung Jesphung Yhensain Mangso ka nyah nyings nghuot.