AMO SAUHBUK
(AMOS)
1
1 Heika Tekoa wus mas dah yvng yoeuh soeu Amo dah dang tsain nghuot. Yuda hwankti Uzia yahge Yehoash lo Israel hwankti Yeroboam zaih lyis, hau maunyeis ma dwis shih aiq zvn dah xikpheh, Mangso ka Israel yah sen cho dvnganh Amo lyis chixoeuq.Ref 1.1: 2Hw 15.1-7; 2Ss 26.1-23; 2Hw 14.23-29
2 Amo taiq,Ref 1.2: Yol 3.16
Yhensain Zion mhayah nyings las
nyah thwe Yerusalem masyah mau soeh jau kat.
Katjang kyuk las
Kharmel boms mas dah mhanh xwi loh.
Israel yhenkyoh lyis Soetuon
Siria
3 Yhensain taiq, Damasku dius jens yaunos doms kuot doms kuot las haih xiklyis ngos nyamoq lyis jyoengh joeng das. Nyamoq gas Gilead dius jens lyis svsoh lhoeng khyvlyis kuot goeus.Ref 1.3-5: Esa 17.1-3; Yer 49.23-27; Zek 9.1
4 Housoeh las ngos hwankti Hazael tsuk dah hwankti yhen thoq mas nyi nhang lha hwankti Benhadad dah thoenkgus jesdvp lyis ngheq kat das.
5 Ngos Damasku wus khomh kyank lyis khyauh tyamp las Awen langhkhau mha nyeis bang yahge Betheden mas guon soeu lhyi yoeus tyamp das. Siria bang gas Kir mau pheh jonsdoeus loh das.
Philisti
6 Yhensain taiq, Gaza wus mas bang gas yaunos doms kuot doms kuot, haih gvng mas ngos nyamoq lyis jyoengh joeng das. Nyamoq gas dius dvnyau gonh lyis shwih las Edom jens jyank mas jons khyvlyis ungh.Ref 1.6-8: Esa 14.29-31; Yer 47.1-7; Ezk 25.15-17; Yol 3.4-8; Zep 2.4-7; Zek 9.5-7
7 Housoeh las ngos Gaza ciank thoq mas nyi khyoq las nyah thoenkgus jesdvp jens lyis ngeh das.
8 Ngos Ashdod yahge Ashkelon wus jens mas dah guon bang lyis yoeus tyamp das. Ngos Ekron wus lyis joeng das, nyet shih dah Philisti jens dvnganh shei das.
Taire
9 Yhensain taiq, Taire dius jens yaunos doms kuot doms kuot, haih gvng mas ngos nyamoq lyis jyoengh joeng das. Nyamoq gas dvnyau gonh lyis Edom pheh shwih jons loh, lho lha nyamoq kuot toh dah buisnoms dangthoengh lyis thyoq.Ref 1.9-10: Esa 23.1-18; Ezk 26.1—28.19; Yol 3.4-8; Zek 9.1-4; Mat 11.21-22; Luk 10.13-14
10 Housoeh las ngos Taire wusciank thoq mas nyi khyoq las nyah thoenkgus jesdvp ngheq das.
Edom
11 Yhensain taiq, Edom dius jens yaunos doms kuot doms kuot, haih gvng mas ngos nyamoq lyis jyoengh joeng das. Nyamoq gas nyamoq dah buisnoms Israel jens lyis shoh soeh khat las nyamoq nhaiqnyen cho ma bos yvlyis chixoeuq. Nyamoq nhaiqyo cho ma thank, khanhamp eq ma thank nhang.Ref 1.11-12: Esa 34.5-17, 63.1-6; Yer 49.7-22; Ezk 25.12-14, 35.1-15; Oba 1-14; Mal 1.2-5
12 Housoeh las ngos Teman wus thoq mas nyi khyoq zis yah Bozra thoenkgus jesdvp ngheq das.
Amon
13 Yhensain taiq, Amon dius jens yaunos doms kuot doms kuot, haih gvng mas ngos nyamoq lyis jyoengh joeng das. Nyamoq dah mau jyeq kat dah zan goh yvmas Gilead mau mas loshang gungs lyis chi dah vmesbih jens dah ung lyis yangh tsain khwih tyamp.Ref 1.13-15: Yer 49.1-6; Ezk 21.28-32, 25.1-7; Zep 2.8-11
14 Housoeh las ngos Raba wusciank thoq mas nyi khyoq las nyah thoenkgus jesdvp ngheq kat das. Housoeh lyis jeszan buisnyeis lyis kaiq hoeu lha hau zan cho ka lyeisjyang teh toeukhuk das.
15 Nyamoq dah hwankti yahge nyah zauguon jens gas jonsdoeus loh das.