AWLPHAWNG
(JOHAN TENGAH)
(REVELATION)
Johan tengah tueng sak la aka awm Awlphawng he tah Khrihca thli lawng Jesuh Khrih he Bawipa la a oeng u dawngah heemtekna patang a khang u vengkah a thut ni. Cathutkung lawng a mengtengna tah ca aka tae thli te ngaiuepna oen tha-awmna peek ham oen ah patang khangna oen heemtekna atue khuiah kawpoek boet ohla acakla awm u ham tha phawhna ni.
He cabu khuiah he teveng tue ah Khrihca thli bueng lawng doek a ming thai tih atloe boeih lawngah a ming thai nawh awlphawng oen huhthlaam te awlpaveel oen broela a thui awm. He cabu kah mengtengna he huhthlaam a phunphun oen alawng a-im tloetloela koekthoek ah koepkoep a thui. Tahe san ah, he cabu kah mengtengna te thuicaihna tah atloetloela awm mai cakhaw he cabu kah angaihna atungpui tah aciimphanla tueng; te tah Pathen lawngah Khrih Bawipa rang oen a raal boeih oen Seitan te a hukhueng koek atah biit a taa vetih, amah kah uep-awm thlaang oen amah aka oeng thli te tah vaan thaai oen dilai thaai kah yotheen kawthawina te kutdo la a peek ai a tite ni.
1
1 He cabu he tah Jesuh Khrih lawng a phawng thaihu kawng thutna ni. He awlphawng tah aka thoeng yue ham koei te a tuihyoeihthlaang thli tengah tueng sak ham Pathen lawng a peek. Khrih lawngah he thaihu thli he a tuihyoeihthlaang Johan te ming sak hamla vanthlaang te a tuih tih,
2 Johan lawng a huh thaihu boeih te a thui. Pathen tengkah awlthang oen Jesuh Khrih lawng a phawng awltak tah he ni.
3 He cabu aka tae thli tah a kam awm phoeih tih tawngha kah awlthang awl aka hutung thli oen he cabu khuiah a thut he aka vai tah yotheen a dawng u. Metihtiah he thaihu boeih a thoengna ham atue tah yoeii tengkek poen.
Khrihcabu Pasarih Tengah Toeina
4 Johan teng kalawng, Asia ram khuiah aka awm Khrihcabu pasarih tengah: Aka awm lii, aka awm poen tih aka awm poe ham koei Pathen teng kalawng amah ngawlhcoen hai kah Muithla pasarih teng kalawng,
5 duekna kalawng lamhacuekla aka tho, thincak sausi la aka awm, dilai sengpahrang boeih ukkung la aka awm Jesuh Khrih teng kalawng lungvatna oen ngaimawngna tah nangmi tengah awm hawn seh. Mami n'lungna tih a duekna oen mami he thawlhna kalawng aka loeih sak tih,
6 ana Pa oen Pathen kah bii te bi thai ham mami he sengpahrang la khawseh Khawsoeih la khaw seh aka saikung Jesuh Khrih tengah ruep-awmna oen huham tharana tah dungyan toe awm yoeyah hawn seh! Amen.
7 Bueh lah! ahih tah muui dawng kalawng va rum thuk! thlaang boeih lawng a huh ai,amah te cai oen aka thun hue lawngkhaw a huh u ai, Dilai sawkah thlaang boeih lawng rungrap u ai. Te tila awm roe hawn seh.
8 “Kai tah lamhacuek, oen hukhuengkoek ni tila aka awm lii,aka awm coeng poen tih aka awm poe ham koei Thara koek Bawipa Pathen lawng a thui.
Huhthlaam Dawngah Khrih A Huh
9 Kai tah nangmi kah maya Johan ni. Jesuh kah hubang la ka awm van angla a Ram khuiah aka awm hue kah patang khangna aka ming haih na puei na paw van ni. Pathen kah awl oen awltak, Jesuh lawng a phawng te ka thui dawngah Kai he Patmos tuisanglak ah n'khueh.
10 Bawipa Hin ah Muithla lawng ka sawah n'tlaak thil tih pengsara awl angla angaihhlangla aka riing awl te ka hu ben ah ka yaak.
11 Te awl lawng, “Na huh thli he ca oen thut lang na thut cabu te he kah khawpui pasarih Efesa, Samarna, Perkamum, Tiatira, Sardis, Filadelfia oen Laudisia ah aka awm Khrihcabu hue tengah pat peh, "tila a thui.
12 Te tila awl aka thui te huh hamla ket ka maang tih ka bueh vengah sui haivangna pasarih ka huh.
13 Te haivangna pasarih laklaw ah thlaanghing oen aka lo u pakhat pai, a khowsai toe aka pha baidung te a bai tih a raang dawngah sui cihin oen yeen u.
14 Ahih kah sam tah tuumul angla rawsawng angla bawk tih a mik tah hai angla alh;
15 a khow rawi tah hai dawng a thloei ruhum tuicii, a thuut heet angla thlupthlup pang tih a awl tah liksaituitlaak tuenn awl angla riing.
16 Ahih lawng a bantang kut ah aisi pasarih a pawm tih a kaa dawng kalawng voeivaang aka hatt samsen va thoeng. A mik-hai tah hingthun khawmik angla aang.
17 Ahih te ka huh vengah thlaangduek angla a khowkung ah ka tlim. A bantang kut te ka sawah a tloeng tih, “Rih boel! Kai tah lamhacuek oen hukhuengkoek la ka awm:
18 Kai tah aka hing ni!Kai tah ka duek, tede tahe ah kai tah dungyan toe yoeyahla ka hing poen. Kai lawng duekna oen thlaangduek khaaw celkhui sawah ukna aana ka khueh.
19 Tedawngah nang lawng na huh thaihu boeih tahe ah aka awmlii thaihu thli oen hai ben ah aka thoeng ham koei thaihu thli pahih bok la thut lah.
20 Ka bantang kut dawngah na huh aisi pasarih oen sui haivangna pasarih kah thuingaihna awlhuep tah he tila awm: aisi pasarih hue he tah Khrihcabu thli pasarih kah vanthlaang tih haivangna pasarih tah Khrihcabu pasarih ni.