ROM
Thlaang Thli Tengah Pawl Kah Capat
(ROMANS)
Pawl lawngah Rom khaaw la ceh a ngaih dawngah lawngpui a roekna angtoekla he ca he a pat pe. Ahih kah a ngaih tah Rom khaaw kah khrihcabu tengah kawlkalh ah bii bi coengah ahimi kah bawmcemna rang oen Sping ram la ceh ham a ngaih. He capat dawngah Pawl lawng Khrihca phung amah kah a ming heet te khawhin roekk hingna khawboe ramlang ah lawh ham koei oen hing puei ham koei te aciimphanla a thut. Pawl kah atloe capat boeih lak ah Rom capat dawngkah a phungthui he soepbir.
Rom khawpui kah khrihcabu a toeina te a thut coengah ahimi ham a thangthui pe yoeyah kawng te a thui pe tih capat khuiah awlpuila thui a ngaih te a thut pahoei. Pathen lawng thlaanghing he metila thlaangdoeng la a khueh tite awlthang theen lawng a tueng sak. Te doengna tah acuek veng kalawng aboet toe oengna rang oen ni” tila a thut. (1.17).
He kawng he Pawl lawng asoep ngaai la a thut. Thlaangphun boeih Judah phun oen Gental phun khaw thawlhna tharana lawng a khuk boeih dawngah Pathen haiah thlaangdoeng la awm ham angoe. Te doengna tah Jesuh Khrih oengna rang oen ni. Khrih oen tuhkaina tah hingna athaai va thoeng, Pathen oen roeproeina awm tih thawlhna oen duekna tharana khui kalawng ah Pathen kah Ciim Muithla lawng loeihna te a peek. Aboel (5-8) dawngah Pathen Phungawl lawng a mengtengna oen aka oeng thlaang he Pathen Muithla lawng a hingna dawngah me ang tharana a peek ti he a thut. Tecoengah thlaanghing boeih ham Pathen kah a ngaihna awm tih te tah Pathen kah a ngaihna dawng te ah Judah oen Gental thlaangphun a thuumna kawng a thui. Judah phun lawng Jesuh a hoett he thlaang boeih lawng Jesuh rang oen Pathen kah lungvatna a dangna ham tih Judah thlaangphun lawng Jesuh he hoett poe manawh tila a thut. Aboetna ah Khrihca khawsakna ti he tah lungna oen khawsakna tih thlaangtloe boeih oen roeproeina kawng he a thui. Pathen kah bii bina kawng, peng oen ram ham Khrihca hue kah sai ham koei he a thut tih pumpak voemtoeina a khueh coengah Pathen a koehna awl oen aboet sak.
1
1 Khrih Jesuh kah tuihyoeihthlaang, Pathen lawng Awlthang Theen phawng hamla n'tuek tih n'khue celtuih Kai Pawl lawng ca kavan pat.
2 Te Awlthang Theen tah yan veng kalawng Pathen lawngah tawngha thli rang oen awl a kam tih Caciim dawngah a thut tangte te ni.
3 Te tah Pathen Capa mami kah Bawi Jesuh Khrih kawng te ni. Thlaanghing pumsa ben atah ahih he Devid cadil la awm.
4 Pathen la a awmna oen ciimna ben atah huham tharana oen duekna kalawng a thawhna rang oen ah Pathen Capa la a awm te a tueng sak.
5 Ahih rang oen Pathen lawng celtuih la awmna m'peek tih thlaangphun boeih lawng oengna oen awlngaaina a khueh thaina ham oen ah mawt ham kai he n'tuih.
6 Te kah Rom khawpui ah aka awm nangmi khaw Jesuh Khrih kah a koe la awm ham Pathen kah khuena ah na thuum u van.
7 Tedawngah Pathen lawng a lungna tih a thlaang la coengg ham a ceel Rom khawpui ah aka awm nangmi boeih tengah he ca he kavan pat. Pathen oen Bawipa Jesuh Khrih kah lungvatna oen ngaimawngna tah nangmi tengah awm hawn seh.
Awmngaih Thangthuina
8 Dilai pum ah nangmi kah oengna kawng te a yaak boeih u poen dawngah Jesuh Khrih rang oen Pathen tengah lamhacuekla awmngaih ciil ka thui.
9 A Capa kawng Awlthang Theen te ka thinkaw lungbui boeih oen ka thui tih a bii ka bi he soeng tila Pathen tah kai kah sausi la awm. Ka thangthui roekk ah nangmi kan poek yoeyah te Pathen lawng a ming.
10 Pathen kawngaihna a awm atah vai at mai khaw nangmi tengla law ham Pathen tengah ka bih.
11 Metihtiah nangmi oen muithla ben yotheenna te veel haih tih tharana awm sak ham ka ngaih dawngah nangmi te huh ham ka ngaih tangkiik.
12 Ka thuingaihna tah kai kah oengna lawng nangmi te bawm ham tih nangmi kah oengna lawng kai he bawm patoeng ham ni.
13 Ka maya manau boeih, he he van ming u lah, nangmi tengla law ham ka kamthlah taitu poen de thaihu pakhat khat lawng n'kang poepa. Atloe Gental thlaang tim ah kawthawna ka khueh sak angla nangmi tim ah khaw kawthawna aka khueh awm sak ham ka ngaih tangkiik.
14 Metihtiah thlaangphun boeih tengah laiba ka khueh; Thlaang cuih oen thlaang cuih nawh tengah khaw, cathoem oen cathoem nawh tengah khaw bii bi ham laiba ka khueh.
15 Tedawngah ni Rom khawpui ah aka awm nangmi tengah khaw Awlthang Theen phawng ham ka ngaih tangkiik.
Awlthang Theen Tharana
16 Awlthang Theen tah ka uepna rapsaat; aka tangna thlaang boeih thlawnna hamla Pathen kah tharana ni. Lamhacuekla Judah thlaangphun ham tih tecoengah Gental thlaangphun hamla khaw awm.
17 Pathen lawng thlaanghing he metila thlaangdoeng la a khueh tite Awlthang Theen lawng a tueng sak. “Pathen lawng thlaangdoeng la a khueh thlaang te lawngtah oengna oen hing ai.” tila Caciim lawng a thui angla te doengna tah acuekca veng kalawng aboet toe oengna rang oen ni.
Thlaanghing Thawlhna
18 Pathen kah thinsana lawngtah thlaanghing boeih kah athe-arana oen thawlhna boeih te a oel tih vaan kalawng va tueng poen. Te athe-arana lawng awltak te yaakming thai nawh ham a kang khoep.
19 Thlaanghing lawng Pathen he ming thai koei la awm ti he aciimla a tueng poen dawngah Pathen lawng ahimi te dan a peek; metihtiah Pathen amah roe lawng a tueng sak ni.
20 Pathen lawngah dilai a suen cuek veng kalawng huh thai nawh la aka awm dungyan a tharana oen dungyan Pathen la a awmna tah aciimphanla tueng poen. Pathen kah thaihu sai dawngah ahimi lawng a huh thai. Tedawngah thlaanghing lawng a thawlhna te thuh phah thai manawh.
21 Ahimi lawng Pathen te a ming u de thangpawm koeila thangpawm u nawh, awmngaih ciil khaw thui u nawh. Ahimi kah poekna boeih tah apoeila coengg, a lung mong sut u tih yiinna oen betoet.
22 Ahimi lawng te ka cuih ti u, tede ahimi tah cuih u nawh.
23 Dungyan aka hing Pathen te bok ohla aka duek thai koei thlaanghing, va oen ramsa oen ah aka cawlh thaihu hing oen aka lo u kutsai mueime te lat a bok u.
24 Tedawngah Pathen lawng te ang thlaang hue te amami kawngaih tuiileh kap thaihu sai ham a peek tih khat oen khat sawah yahpawh koei thaihu a sai u.
25 Ahimi lawng Pathen kawng awltak te thailatna awl oen a thaw u. Saikung Pathen te bok ohla a sai thaihu te a bok u tih bii a bi pe u. Saikung Pathen te ni thangpawm yoeyah ham a awm: Amen.
26 Tedawngah Pathen lawng thlaang-hing he yarau pawh koeila aka awm pumsa cuk-halhna dawngah a thlah phaam sut. Hutaa hue lawng pateng khaw asoeng akam awmna ham koei hutaa phung te asoeng nawh la a hawna u tih khat oen khat thawlhna a sai u.
27 Tih van toengtoengla tawngpa hue lawngkhaw asoeng akam la hutaa oen pawlneengna te a hoett tih pumsa cuk-halhna dawngah tawngpa lawng khat oen khat yahna koei thaihu the thawlhna a sai u dawngah thaihu the a sai phu te ahimi lawng a dang u van.
28 Pathen kawng cuihna taktak te thlaanghing lawng a thinkaw khuiah khueh ham a ngaih u nawh dawngah aciimcaih nawh thinkaw lungbui khueh ham Pathen lawng a thlahphaam. Tedawngah sai koei nawh athe thaihu a sai u.
29 Ahimi tah soeprep athe-arana athe thaihu cungkuem, apueh ngaihna, thawlhna oen betoet u tih uett-eena, thlaang ngawnna, tawhsina, thailatna, kawnehna oen be u.
30 Rengse kawkhah phukhue awl thuina, khat oen khat thuitheetna, Pathen thina, thekhana, oekthloenna, halangna, athe sai ham poekna thli oen ah nu apa awl khaw ngaai u nawh.
31 Khawboe ramlang theen u nawh, awlkaa cak u nawh, thlaangtloe sawah reenna, lungna khueh u nawh.
32 He tila aka hing thlaang thli tah duek ham awm tila Pathen phungawl lawng a thui te a ming u. Tede he ang thaihu amami kah sai bueng ohla thlaangtloe lawng a sai u te khaw a kawtlaak puei u.