JOHAN
Kah A Thut Awlthang Theen
(JOHN)
Johan lawng a thut Awlthang Theen lawngah Jesuh tah “thlaanghing la aka coengg tih mami tim ah khaw aka sa” Pathen kah dungyan Awl ni tila a thui. Cabu dawngah a thui angla he kah Awlthang Theen he aka tae thli lawngah Jesuh he tah awlkam tangte Thlawnkung, Pathen Capa ni tila a tangna u ham, ahih te a oeng tih thlawnna te a khuehna ham a thut ni. (20.31).
Jesuh he tah Pathen kah dungyan awl ni tila awlroekna a thui coengah Awlthang Theen a tongcuekna ah, Jesuh he Pathen Capa, Pathen lawng awl a kam sut Thlawnkung la a awmna kawng, Kawpoek rai broela a sai te a thui. Tecoengah kawpoek rai a sai thaihu thli kah a thuingaihna te a thui. Tecoengah thlaang khatsut lawng Jesuh awl te a tangna u tih a hubang la a coenggna kawng, thlaang vaang lawng tangna u nawh tih a oelh a taih u kawng te a thut. Aboel 13-17 toe ah Jesuh amah a tuukna yiin ah Jesuh oen a hubang thli pawlneengna kawng, thinglam dawng a ngawnna khawhin a pha thlan vengah a hubang thli lawng a tawng ham koei raina thli ueh thaina ham ngaikhuek awl a thui pe te a thut. Cabu aboetna ben a boel dawngah Jesuh a tuukna oen awl a awlcekna kawng, a ngawnna oen a thawhkoepna kawng, a thawh koep coengah a hubang hue tengah a phumphona kawng te a thut.
Aboel 8:1-11, khuiah thlaanghalhnu a tuuk kawng he khatsut cathut thli oen acuek vengkah caletna dawngah awm nawh tih khatsut lawngtah athloekla a thloeng u.
Johan lawng Khrih rang oen dang thai la aka awm dungyan hingna kutdo, tahe ah tongnan la aka awm hingna, Jesuh tah lawngpui, awltak oen hingna ni tila aka do hue lawngah hingna a dangna kawng te awlpui la a thut. Johan cathut alakloena he tah muithla ben ah atak tang te a tuengna ham khawhin roekk ah khawsakna dawngkah thaihu: tui, takawi, aangna, tuu oen tuudoen, misurkung oen misurthaih, he ang thli he miknoekna la a hawna.
1
Hingna Awl
1 Dilai suen thlan ah, awl tah awm oepsoeh poen; ahih tah Pathen oen awm haih tih ahih te tah Pathen ni.
2 Acuek veng kalawng te awl te tah Pathen oen ah awm haih.
3 Ahih rang oen ah Pathen lawng thaihu boeih he a sai; Ahih rang oen ah a sai mueh thaihu khat khaw awm nawh.
4 Te awl te tah hingna kungpui la awm tih te kah hingna lawngah thlaanghing tengla aangna te avan khuen.
5 Te kah aangna lawng yiinna khui te a thue tih, yiinna lawng metuek vengah khaw thih thai manawh.
6 Pathen lawng amah kah laipai Johan te avan tuih,
7 thlaang boeih lawng awlthang te a yaak tih a tangna u ham, aangna kawng te aka thui ham ahih te va law.
8 Amah tah aangna nawh ni; aangna kawng te thui hamla aka law thlaang ni.
9 Te kah aangna tah dilai la law tih thlaanghing boeih aka thue aangna tangtang ni.
10 Te awl te tah dilai ah awm, ahih rang oen Pathen lawng dilai he a sai de ahih te dilai lawng ming nawh.
11 Ahih tah amah ram la law de amah kah thlaang thli lawng do u nawh.
12 Tecakhaw khatsut lawngtah ahih te a tangna u tih a do u; tedawngah ahimi te Pathen kah ca-anau la coenggna te a dang u.
13 Ahimi lawng thlaanghing phung angla Pathen kah ca-anau la coengg nawh, ahimi te thlaanghing ana pa kah ca-anau angla a cuun moenih; ahimi kah ana Pa tah Pathen amah ni.
14 Te awl te tah thlaanghing la coengg tih lungvatna oen awltak oen ah betoet, mami tim ah he awm. Mami lawng amah kah ruep-awmna te n'huh u, te ruep-awmna te tah ana Pa kah khuehduen pakhat bueng Capa la a awm te ni.
15 Johan lawngah ahih kawng te a thui vengah, “Ahih tah kai coengah aka law ni, tede ahih tah kai lak ah aka lenduet ni, metihtiah kai ka awm thlan ah ahih tah awm poen tila akawng ka thui te tah ahih he poen ni” tila paang tih a thui.
16 Amah kah abetoet lungvatna khui kalawng yotheen kam-awmna khat coeng khat te mami m'peek.
17 Pathen lawng Phungawl te Mosi rang oen m'peek, tede awltak oen lungvatna tah Jesuh rang oen ni a law.
18 Pathen he a-u khat lawngkhaw hu u vai nawh. Pathen amah oen van at la haih, ana Pa tengah aka awm a capa khat bueng lawngah he ana Pa te a tueng sak poen.
Baptisma Pekung Johan kah Awlthui
(Mt. 3.1-12; Mk. 1.1-8; Lk. 3.1-18)
19 Jerusalem kah aana khuehkung Judah thlaang thli lawng Levi thlaangphun oen khawsoeih khatsut te Johan tengla a tuih tih, “Nang he a-u nuem?” tila a doet sak u.
20 Johan lawng thana ohla, “Kai tah Messiah nawh ni” tila phah ohla aciimla a thui pe.
21 Ahimi lawngah, “Tetih atah nang he a-u? Nang he Elijah aw?” tila a doet u. Johan lawngah, “Kai he Elijah nawh ni” tila awl a thung pe. Ahimi lawngah, “Nang he tawngha aw?” tila koep a doet u tih, “Kai he tawngha nawh ni” a tina.
22 Ahimi lawngah, “Tetih atah nang he a-u? Kaimi aka tuihkung hue tengah awl khuen ham a awm dawngah namah oen namah ta a-u na ti? van thui lah,” a tina u.
23 Johan lawng awl a thung pe tih: “Kai tah, tawngha Isaiah lawng, ‘Bawipa a cehna ham lawngpui te adoengla sai uh’ tila ramhum huhang ah aka paang te ni” tila a thui pe.
24 Farasi thlaang thli lawng a tuih laipai hue lawngah,
25 Johan nala te, “Nang he Messiah nawh, Elijah nawh tih tawngha nawh atah n'tu ah nang lawng baptisma na peek?” tila a doet u.
26 Johan lawng, “Kai lawngtah tui oen ah baptisma te ka peek, tede nangmi lawng na ming u nawh, nangmi tim ah aka pai pakhat te awm.
27 Ahih tah kai ka law coengah va law, tede kai tah ahih kah khowmuek rui pateng thlam pe ham ka ting ka tawkk moenih” a tina.
28 He kah thaihu boeih a coenggna he tah Johan lawng baptisma a peekna Jordan tuiva rall kah khawcuuk ben ah aka awm Bethani khaaw ah ni.
Pathen kah Tuuca
29 Avuen khawhin atah amah tengla Jesuh a law te Johan lawng a huh tih, “Dilai thawlhna aka phuei Pathen kah Tuuca ke bueh u lah!
30 Kai coengah thlaang pakhat va law, tede ahih tah kai lak ah bawilen ngaai, metihtiah kai he n'cuun thlan ah ahih tah awm poen.’ tila akawng ka thui te tah a hih poen ni.
31 Kai lawngah ahih he a-u ti khaw ka ming nawh, tede kai lawng tui oen ah baptisma ka peek he tah ahih te Israel thlaang thli lawng a mingna ham ni.” tila a thui.
32 Tecoengah Johan lawng, “Vaan kalawng Muithla te akhuu angla va rum thuk tih ahih sawah a cuuk thuk te ka huh.
33 Ahih te a-u ti khaw ka ming nawh, tede tui oen ah baptisma peek hamla tuihkung Pathen lawngah ‘Muithla te va rum thuk vetih thlaang pakhat sawah a cuuk te na huh ai; ahih te tah Ciim Muithla oen baptisma pekung ni tite na ming ai,’ ti.
34 Te tah kamah lawng ka huh tih ahih tah Pathen Capa ni tila nangmi tengah kavan thui u,” tila Johan lawng a thui.
Jesuh kah Hubang Lamhacuek Hue
35 Avuen hin ah Johan te a hubang pahih oen haih a pai u vengah,
36 Jesuh a yingyawi te a huh tih, “Pathen kah Tuuca ke bueh hih lah!” a tina.
37 He tila a thui te a hubang rawi lawng a yaak tih Jesuh te a hu ah a vai hih.
38 Jesuh te a hu la dak maang, te vengah ahih rawi lawng a hu ah a vai hih te a huh tih, “N'tu na tlap hih” tila a doet. Ahih rawi lawngah, “Rabbi, me ah na awm?” a tina hih. (He kah awllung he tah, “Cangpueikung” ti ngaihna ni.)
39 Ahih lawng, “Law hih langtah bueh lah,” a tina. (Te veng te tah thlemben khawnoek palii yunyan ni.) Tedawngah ahih rawi lawng cet hih, a awmna te a bueh hih tih khawyiin toe ahih oen awm u.
40 Te rawi khuikah pakhat te tah Simon Piter kah a manau Andru ni.
41 Vaikhat atah a maya Simon nala te, “Kaimi tah Messiah te ka huh poen” a tina. (Messiah ti he tah ‘Khrih’ ti ngaihna ni.)
42 Tecoengah Jesuh tengla Simon te a ceh puei. Jesuh lawng ahih te a bueh tih, “Nang tah Johan capa Simon na miingna, tede Sifas na miingna poen ai.” a tina. (He tah Piter tina oen lo hih tih “Lungto” tila thui ngaihna ni.)
Jesuh Lawng Filip oen Nathanael A Khue
43 Avuen atah Jesuh te Galili la ceh ham kamthlah. Filip te a huh tih, “Ka hu ah bang lah!” a tina.
44 (Filip he tah Andru oen Piter a awmna Betsaida khaw kah van ni.)
45 Filip lawng Nathanael te a huh tih, “Mosi lawng Phungawl cabu dawngah akawng alam a thut tih tawngha thli lawngkhaw akawng alam a thut thlaang te kaimi lawng ka huh poen. Ahih tah Nazaret khaw kah Josep capa Jesuh te ni” a tina.
46 Nathanael lawng, “Nazaret khaw kalawng thaihu theen pakhat mai khaw thoeng thai ai aw?” tila a doet. Filip lawng, “Law langtah bueh lah.” a tina.
47 Jesuh lawng Nathanael a tengla a law te a huh vengah, “Israel thlaangphun tak tak he ah awm he; ahih tah thawlhpalhna roe awm nawh!” tila ahih lawng a thui.
48 Nathanael lawng ahih nala te, “Metila nan ming?” tila a doet. Jesuh lawng, “Filip na khue thlan ah thaidut thing phung kaak ah na awm vengah te kan huh poen” a tina.
49 Nathanael lawngah, “Saya, Nang tah Pathen Capa ni! Nang tah Israel Sengpahrang ni!” a tina.
50 Jesuh lawng, “Thaidut thing phungkaak ah na awm vengah kan huh poen tila ka thui dawngah na tangna aw? Nang lawngah he lak ah aka bo ngaai thaihu na huh hun ai!” a tina.
51 Tecoengah ahih rawi te, “Awltak tang kavan thui: Vaan te awng u vetih Thlaanghing Capa sawah Pathen kah van thlaang thli a rum thuk oen a luui hang te na huh u ai” a tina.