3
1 Iema kha uvtuv tie hne nawhnyi-tuv tie ri a ngie riypata chang pakhaa tie yi. Cawsaa pa-uvsathyi riypa, hmangphapa bangkhuo tue riypa,
2 pakha hmuota biechiepa ta chaw li riypa, ahru-a-ina kha cahriy riypa, nangne riypa, hne cawsaa bangkhuo hmielie a pane pata aw riypa kha chang tie yi.
3 Tahematapakieca, a hluo taca kiema hrahring zaw hing za ngaasa pate ri a ngie li pata luo ma za paa. Saapa khingna phangting hne anuona lie kha sii za cuo pate ma cuo kha pha lina hne hietliena, duv aa chiypa hne manghnue aa chiypa, pakha hne pakha ahuena lie kha ma cuo ma pachuo sa.
4 Cuorasala kiema Khuotuv Khazing phana hne duena aa luo tiyta,
5 kiema kha malie a khuo. Ca malie a khuopa ca kiema ma tuepa hmangphapa nakaw cuo li pata a nangduena thueta hne tiy ta puvpathiyna hne a Thlaapa Pathe ta sapathiyna thueta a cuo.
6 Maa Khuotuv Zingsuv Khrih thueta Thlaapa ca kiema cunglie kha a hluvpuv ta byapa ma cuo.
7 Cahaa cata kiema ca chuozaa hringna anguopuona thueta a rucutuv cuo riypata a vihnyina ta duopacupa ma cuo.
8 Capa bie ca aa hmuopa bie tana a cuo.
Khazing a zang tlipa tie taca hmangpha tuena lieta iema hne iema amaa pi riypa kha namaa daakhyi riypata icaa khingkhyi yi. Hingpa hmang hing cawsaa bangkhuo cuota a phacepa hne a thlahnepa ta a cuo.
9 Cuorasala ngaana bie a ina, thukina cazing kaw a ina, ruena a lulina, hne phungbie kaw a ina zaw kha cahriy tie, thlahnena hne muo a hnyi lipa tana a cuo.
10 Buv a chena a tuepa kha a raaringna yikha yihning na pi khu taata acaa ngie li kieca a khe kha tie ung.
11 Cahaapa cawsaa kha ca apali-apahnaa ta a cangpa hne a suepa ta cuote a suena ta suebie a ripa aa tapa kha na pachang.
12 Nama'a luo Artemas a cuo li kie Atikhikas i vya pathlie pahne i awnapa Nicopolis luo a vaw a zue la i khing, tahematapakieca thlasiy chung ca ama lie hing aw riypatana i ting.
13 Sihni Zenas hne Apollos ama khytlawna lie kha amaa hupa tluo a tling riypata na cuo khu chung ta zaa bya yi.
14 Cawsaa kha a cakhawpa ama cuo li riypa hne a huna lie a khue a pahruvpa ama cuo the riypata repha hriena lie aa pipa ama cuo riypata a cuv yi se.
15 Kama'a lie a awpa bangkhuo na nama kuv caa patuv yi. Zangna lie malie a duepa tie kha ama kuv na patuvpa mya yi.
Nama bangkhuo cunglie vihnyina aw mangsue.note 3:15 Hluo vie caa-uv lieca Amen* a bechiypuo vie.