1 Hmie luo thue ca cawsaa chekha ca zangna kha thuse'a yite, dung a thepa thlaapa hne khuevuo tie pacuvna kha ama ziy aa, tapata Thlaapa ta a siesa pata a ri. 2 Hingpa pacuvna ca thaa lingpa ta ama pakuo nakawta a chiephathleduona a thiypa, a hanghiepa phahruo a cuo pakhipa tie'a taata a vawpa tana a cuo. 3 Iema cata achiyhiena kha thlu yite ning li riypa ama tapa sa chekha zaw a aw. Capa sa ca zangtuv tie hne biehmisipa a pachangpa tie ta palungtluona hne cuhluo riypa, Khazing ta a tuepa sa tana a cuo. 4 Tahematapakieca Khazing ta a sapa bangkhuo ca pha te khaapa hinghmuo thaw riy aw vyi, palungtluo bierina hne cuhluo riypatana a cuo. 5 Tahematapakieca Khazing bie hne thlaachuona khata a pathe sapa tana a cuo.

6 Uvnu hne sieta zawnote 4:6 Gk Uvnu zaw kha hingpa pacuvna hing na chang kie yi ca na za ziy ciepa aa hmuopa pacuvna hne zangna bie lieta a lethawpa a phapa Khrih Zingsuv changtaapanote 4:6 Or Khrihsaa uvthyi ta na cuo aa. 7 Khazing hne biena a pa-uvsathyi lipa phungpa cakhawpa hne nungpuv tie phungpa kha cahriy tie. Khazing ciyzaa riypa kha a zue tie. 8 Tahematapakieca saapa temaana khata thlahnena a hnyi ra pahaata Khazing ciyzaana ca a luo ting ta thlahnena a hnyi. Ata ma hringna hne a vaw riypa ma hringna cuota biekuona a hnyi. 9 Capa bie ca aa hmuopa hne cuhluo aa phuvpa tana a cuo. 10 Hingpa repa hingtana riethyisa pata te ma maa lawpa ta a cuo. Tahematapakieca maa nguopuonapa kha a hringpa Khazing'a lie kha ma bang. Ama ca cawsaa bangkhuo a khuotuv hne a hlyi ta zangtuv tie a khuotuv ta a cuo.

11 Hingpa hing na naa daakhyi riypa hne na pacuv riypata a cuo. 12 Mingnu na cuo nakawta ahungtahmuo ca mangbung kha yi se, cuorasala na bierikuovy hne na awtuvzyazaa lie cuose, duedingna, zangna hne pathena lie kha zangtuv tie cuota a mangpuo riypata aw tie. 13 Kama i vya chiy nate ta zaapuv hmielie Caapathepa rina, pasuna hne pacuvna kha za tue pari tie. 14 Uvthyi tie ta na cunglie ama kuv ama khang ningta profet-biephu ta aca pipa thlaapa lasaw kha siysaa ri li pata aw lie ciy. 15 Cawsaa bangkhuo ta na lethawpa kha ama hmung the riypata khapa hmang zaw kha hrie la iema cuo khata a pi tie. 16 Nama pangpa cuose, na pacuvna lie cuose a raaring tie. Hing hmang hing ci li pata tue tie, cahaa cata na tue kieca nama kha a khuo khu'a cate na bie naathlietuv tie zaw kha na khuo khu'a yi.