TIMOTE
Timote'a Luo Paul Caapaphya Suokhana
Asia Minor taata Khrihsaa mingnu pakha ta a cuopa Timote hing a nung ca Judah ming cuote a paa ca Grik ming ta a cuo. Paul ruothaa re a hriena lie kha a viesaa hne a rehriehne ta a vya cuo. Timote'a luo Paul Caapaphya Suokhana lie hing a biepuvpa hmang suothung a aw.
A suokhana ta khrihsaabuv chunglie pacuvna a hmuo lipa kawlie a raaringna a pi yi. Hingpa pacuvna ca Judah ming hne Jentail ming ruena aa pyapa a cuo. Hing chuelyi thiysaa ruo hingca a pha lipa a cuo nakawta khuona hmung khuna riypata ca a hlyi ta nupa bieparuv pachang a hu te, ningbaa chekha a ang riypa hne napuv chiy li riypa zaw a hu ama ta.
A suohningna ta, khrihsaabuv chunglie rehrie zya hne Khazing biena zya hne khrihsaa uvthyi hne luochiytuv tie ta tuokhaapa hringcuozyazaa ma ama hnyi riypata a cuo tapa kha a ri.
A suothungna lieta ca Timote kha Zingsuv Khrih siipha cuo khu riypata ruena pi te, zangtuv a phangphang tie cunglie hrievu a hnyina zya kha a ri.
1
Maa Khuotuv Khazing maa ruechuopa Khrih Zingsuv thueta Khrih Zingsuv lucuotuv a cuopa Paul ta,
Zangna lie i saata tah a cuopa Timote kha caa ica paphya.
Paa Khazing hne Khrih Zingsuv'a taata vihnyina, nangduena hne diena ca na cunglie aw mangsue.
Masidonia luo i tlaw ningta ica changpa haakhata Efesa khy lie kha zaa ngaa la aa dang lipa pacuvna a pacuvtuv tie kha pacuv li tli riypata za thlu karue yi tapa ica khing. Zangna ta pachang khu a cuopa Khazing khuekhuona kaw kha pacuv cuopa ta, a-i-achuena dyi a chiykhyipa phungpa cakhawpa hne a chuo the lipa thukina cazing kaw rina lie zaw amaa pituv li riypa kha thlu tie yi Hinghaapa bietaana ta aa tingpa ca pathiypalung pathepa, achie-apha thleduona hne zangna singsaapa taata a pyapa duena tana a cuo. Cawsaa chekha ca hingpa taahingta luopie yite siyluo a hnyi lipa a-i-achue cakhawna luo kha ama chiy. Khaama ma ri tapa kha pachang li pata hne amaa daakhyipa kha khaama tapa pachang li pata phungbie saya cuo kha ama khing.
A cuona haata hmuopa kieca phungbie hing a pha tapa ca ma pachang. Kiema ta ma pachangpa ca phungbie hing aa dangpa tie cuota sapa cuo li pata phungbie a ziy lipa tie hne a patluopa tie, Khazing abie lipa tie hne a suepa tie, a pathe lipa tie hne Khazing siysaa ri li pata biena a hnyi lipa tie, a nung hne a paa a thiepa tie, cawsaa a thiepa tie, 10 aparuvsuena a tuepa tie, canungcapaa phung li pata aw hne a hmuopa tie, sii ta sung a palipa tie, a hangpa tie, a hmuo lipa lie tehte a cuopa tie, aa hmuopa pacuvna hne a carie pata a awpa tie cuota tuepa tana a cuo. 11 Capaca kama phu riypata ina pipa thluechiy Khazing thuophaabie a rungnaapa haa khatana a cuo.
12 Kama thaazuo naa pituv Khrih Zingsuv ma Byipaapa kha i law, tahematapakieca zangtluo aa tlapa ta na rue te a re hrie riypata ina hmuo. 13 Ahluo ta ca Khazing thuo a pachituv, hrisaathieruetuv, hne hnaapahnawtuv ta i za cuo. Cuorasala, Khazing nangduena kha i hmung, tahematapakieca pachang lipa hne zang li pata i za tuepa a cuo nakawtana a cuo. 14 Abyipa vihnyina ca Khrih Zingsuv chunglie zangna hne duena zaw hne khata i cuota a le ta a lepathla. 15 Khrih Zingsuv ca a suepa khuo riypatana chuelyi luo aa zuv tapa ca aa hmuopa hne cuhluo aa tlapa tana a cuo. Capa a suepa zaw hrawlie ca kama hing a suecepa tana i cuo. 16 Cuorasala capa kawlie cata Abyipa ta nang ina due pata a cuo. Zingsuv Khrih ta a suecepa i cuona cangta chuozaa hringna hmung riypata ama a vya zang riypa tie a mangpuo riypata na tue te, a cuo khuna chung ta i cunglie kha a palung a pasiy. 17 Chuozaa Siepahruo, a thiy the lipa, hmung khu a cuo lipa, ama dyi Khazing a cuopa ca chuozaa ta pa-uvsathyipa hne rungnaana pipa ta cuo mangsue. Amen.
18 I saacapaa, Timote, nama kawlieta profet tie ama za ri ciepa haata, capa bie ca ziy pata a phace pata naa du khu riypata ica chang. 19 Zangna hne a chie a pha thleduona kha a patuv pari tie. Cawsaa chekha ca chiephathleduona siysaa ama ri li nakawta ama zangna kha a ra tli. 20 Iema hrawlie ca Hymenaias hne Alekzandar kha amaa te ra. Khazing thuo pachi li riypa amaa cuv the riypata iema kha Setaa kuv chung luo i pi tli yi.