9
1 Cakhutaata a papangaanapa avuoming ta a hmyakaa kha a tung ca, avuo taata alyi luo aasiy suokha a za tlapa kha i hmung. Ama ca dena a hnyi lipa khue pahawna tawh kha ama pi.
2 Dena a hnyi lipa khue kha a pahaw ca capa khue chung taacata a lesapa susana myi taata a pyapa myikhuv haakhata myikhuv ca a tawpuv ta a kya pya.
3 Myikhuv taacata khawbyapa kha pya yite chuelyi luo ama za cung. Iema ca tluociekuo cahranapa haapa kha pi pata ama cuo.
4 Chuelyi lieta a awpa aphuv cuose, tuokhaapa a hringpa kung bangkhuo hne thingkungpa zaw kha para li pata ama puo lie Khazing caakhe a hnyi lipa cawsaa kyalya dyi kha para riypata changpa ama cuo.
5 Cawsaa kha thie tlung li pata thlapangaa chung hrisaana naw ama pi. Cawsaa ama hrisaa tiyta a pasana zya ca tluociekuo ta cawsaa a be ning haa khatana a pasa.
6 Capa ningkhue thue ca cawsaa ta thiyna kha huv'a yite, cuorasala hmung'a vayi, thiy khing hringhruo'a yite, cuorasala thiyna ta iema kha a ruose'a yi.
7 Capa khawbyapa tie hmingsuo ca rie tuv riypata pachie paciepa aruo hne tana amaa lu. Ama luv lieca siyy ta tuepa byilakhuv haapa kha a khuv yite, ama hmie ca cawsaa hmie kha ama lu.
8 Ama suo ca canung suo kha lu te, ama haa ca chingde haa kha a lu.
9 Thaa cacunghnaapakaw haapa phuvhling kha hnyi yite, ama mathlaa pu ca rietuvna luo a ruole nguoluopa aruole pu hne tana aa lu.
10 Malie a be thepa tluociekuo lahmyi haapa kha hnyi yite, capa lahmyi lieca cawsaa kha thlapangaa chung riethyi a pi khupa cahrana ama hnyi.
11 Dena a hnyi lipa khue avuoming kha siepahruo ta hnyi yite, a ming ca Hebru ryi ta Abaddonnote 9:11 Caca Rana* tanapa ta a cuo. ta yite Grik ryi ta Apollyonnote 9:11 Caca Paratuv* tanapa ta a cuo. ama ta.
12 A suokhanapa ciy aa chiypa ca chuo te, hingpa khu taahingta a vaw riypa a hrangpa suohning a aw kalie.
13 Cakhutaata pacaruvnapa avuoming ta a hmyakaa kha a vya tung ca, Khazing hmiekunglie a awpa siyy bienatluophie kiy suopaliynote 9:13 Hluo vie caa-uv lieca suopaliy* tapa hing aw vyi. taakhata ueryi i thyi.
14 Hmyakaa a hnyipa a pacaruvnapa avuoming cata, "Cavaa lesapa Zufrates lie ama hrepa avuoming papaliy kha pathlie ung," a ta.
15 Cacuonakawta avuoming papaliy ca ama pathlie. Iema ca capa cuo, capa ning, capa thlaa, capa kung, lie hrahring ta chuelyi cawsaa chethungchekha thie riypata chi paciepa ama cuo.
16 Aruo rieka mekaa ca million zahning ama ta, tapata i thyi.
17 Muocuo i hmungpa lieta i hmungpa aruo hne a khangtuv tie ca hinghaahingta a cuo. A khangtuv tie ca myi haata a sepa, safaiar lungvaa haata a dungpa, ke haata a mepa cacunghnaapakaw kha amaa pakaw. Amaa ruo luv ca chingde luv kha lu te, ama pakaa taakhata myi, myikhuv hne ke kha ama pya.
18 Capa ama pakaa taata a pyapa myi, myikhuv hne ke taata a pyapa puvtlungna cata cawsaa chethungchekha ca a thie yi.
19 Aruo zaw ama cahrana ca ama pakaa lie hne ama lahmyi lietana a aw. Ama lahmyi ca pariy haakhata cuote luv ama hnyi; capa cata ruvnaana kha ama pi.
20 Capa puvtlungna ta a thie lipa, aa ngaapa cawsaa zaw ca ama kuv ta ama tuepa hmang kawlie kha a ngiepachiy vayi: Setaa abie kha cuose, siyy, ngu, thiyhring, alung hne thing ta ama tuepa, a hmung the lipa, a thyi the lipa hne a cakuo the lipa kuvtuezuv abie zaw kha thuse hlyi vayi.
21 Cahlyitaw taata cawsaa ama thiena, malie ama ca-iena, aparuvsuena ama tuena hne ama paruv thena taa zaw ta a ngiepachiy vayi.