8
Caakhe Suosariy
Tuvtaata ta caakhe suopangaana a pahaw tiyta, siymaluo a che chung vuoruo lie kha a duokaring. Cakhutaata avuoming pasariy Khazing hmielie amaa daa pakha hmung yi ang te iema kha hmyakaa suokha cie ama pi.
Ziyhmyi pakhuvnapa siyy bi a cyipa avuoming a hrangpa pakha a vaw te bienatluophie lie kha aa daa. Mingpathepa tie thlaachuona hneta byithude hmielie a awpa siyy bienatluophie cunglie biena pi riypata capa avuoming ca ziyhmyi a hluvsa ama pi. Avuoming kuv taata ziyhmyi khuv ca mingpathepa tie thlaachuona hne Khazing hmiekung luo ca a khuv thaw. Cakhutaata avuoming cata ziyhmyi pakhuvnapa bi kha la te, bienatluophie lie myi kha a khung chiy khu taata alyi luo kha a thaw ca alyi lieca khalung aa thy, paci a tla, thinghlaa a cakang te aling aa siy.
Hmyakaa suosariy a hnyipa avuoming pasariy ca hmyakaa tung riypata a ting cie pata ama aw.
A pakhanapa avuoming ta a hmyakaa kha a tung ca, thiy hne aa pyapa ari hne myi kha alyi luo za tla te alyi chethungchekha ca myi ta a kuo. Thingkungpa chethungchekha ca uv sa diy te aphuv hringpa chethungchekha zaw a kuo sa diy.
A pahningnapa avuoming ta a hmyakaa kha a tung ca, myi a hlaa nguoluopa tluo lepuv haata a tapa suokha ca riyliy luo kha aa thaw. Riyliy chethungchekha ca thiy ta a li te, riyliy chunglie a awpa saruopa chethungchekha ca ama thiy. Tiypalaw chethungchekha zaw ama ra.
10 A pathungnapa avuoming ta a hmyakaa kha a tung ca, myisaa vuopa haata a tapa aasiy lesapa suokha ca cavaa hne acaa chethungchekha bangkhuo cung luo kha avuo taata a za tla. 11 Capa aasiy ming ca, "Khana," tapata a cuo. Tiy chethungchekha ca a kha nakawta capa tiy a dangpa cawsaa hluvpuv ama thiy.
12 A papaliynapa avuoming ta a hmyakaa kha a tung ca, ning chethungchekha, thlaapa chethung-chekha, hne aasiy chethungchekha ta tuvpathla pata cuote, ama khena chethungchekha ca ama zing. Ning-chung chethungchekha ca khena hnyi li tli pata zuo haata a ta.
13 Cakhutaacata i mang ca, avuo khingkhuo lie a pathlaapa hmungthlu sakha khuosa ta a khipa kha i thyi. "Ciy aa chiy, ciy aa chiy, a hrangpa avuoming pathung ta ama tung riypa hmyakaa a vya paring kieca chuelyi ming cuota ciy aa chiy hringhruo," a ta.