3
Sardis khy lie a awpa khrihsaa-buv avuoming'a luo kha hing -haahingta cape tie. Khazing thlaapa suosariy hne aasiy suosariy a hnyipa bie ca hinghaahingtana a cuo.
Na rehriepa i pachang, a hring tapata ming a hnyipa na cuo raalaa pata na thiy. A kya cha la, vuotaa a thiy'a nangpa a tuopa kha thaa patlung tie, tahematapakieca i Khazing hmielieta na re kha tluo a tlingpa ta hmung va ang. Na za cuhluopa hne na thyipa kha maw kha; capaca ziy la na suena kha a ngiepachiy tie. Naa kya cha li pata a cuo kieca a paruvpa haata a vaw'a ang te, nama'a luo kha khatiy tama i vaw aa tapa na pachang'a vaciy. Cadyiseca Sardis khy lieta a cawsie a papyapalyi lipa cawsaa a cawta na hnyi kalie; iema ca aa phuvpa ama cuo nakawta pangruopa kha a buv'a yite kama hneta ama cakuo pakhawle aa. Tena na hmung kieca iema haata pangruopa kha a buv ra'a cate, hringna caa-uv chung taata na ming kha ca hruv'a va ang. I Paa hne a avuoming hmiekunglieta na ming kha i daakhyi aa. Thlaapa ta khrihsaabuv tie'a luo a ripa hing naa a hnyipa bangkhuo ta naathlie mangyisue.
Filadelfia khy lieta a awpa khrihsaabuv avuoming'a luo kha hing-haahingta cape tie.
A pathepa hne biehmisipa a cuopa,
David tawh a hnyipa,
a khaa tiyta ahungtahmuo
ama pahaw khu lipa,
a pahaw tiyta ahungtahmuo
ama khaa khu lipa bie ca hingpa hing tana a cuo:
"Na rehriepa i pachang. Mang tie, ahunghmuo ama khaa khu lipa ingchiypakaa kha na hmielie ica pahawpa. Na thaazuo a caw tapa kha ica pachang, cadyiseca i ming kha thaw khing lipa cata i bie kha na ziy. Judah ming tana i cuo a ta raalaa yite a cuo lipa, a hangpa tie, Setaa apungna-ing ta a cuopa tie kha na phyi thabaw luo a vaw pata vya pabu sa'a yi ang te nama ica duena zya kha ama pachang riypata i tue'a yi. 10 Tahematapakieca i bie kha palung pasiysa pata anglawna hne na ziy nakawta chuelyi cunglie a awpa bangkhuo dyapasya riypata a vaw riypa ruvnaana taakhata ica khuo aa. 11 I vaw patang aa; na byilakhuv kha malie ta aca chuv li riypa yita na hnyi ciepa kha a cusa pata patuv tie. 12 Tena na hmung kieca i Khazing biena-ing chunglie kha asuvtung ta ca tue'a ang te; khatiy tahmuo capa biena-ing taacata pya'a va tli ciy. I Khazing ming hne vuoruo lie i Khazing'a taata zaa cungpa Jerusalem khypuv thaapa ming hne kama ming thaapa kha na cunglie i cape aa. 13 Thlaapa ta khrihsaabuv tie'a luo a ripa hing naa a hnyipa bangkhuo ta naathlie mangyisue.
14 "Laodisia khy lieta a awpa khrihsaabuv avuoming'a luo kha hinghaahingta cape tie: Khazing sapa bangkhuo lie a hruothuna ta a cuopa, zangtluo aa tlapa a hmisipa pachangkhyituv Amen bie tana a cuo.
15 "Na hriepa kha i pachang; nama ca a cakaa zaw cakaa ra vaciy, a sa zaw sa ra vaciy. Na cakaa kie cakaa, na sa kie sa tapa ica khing. 16 Cacuonakawta, nama ca lalung duodyi cuo cate, a cakaa zaw cakaa li, a sa zaw sa li pata na aw nakawta i pakaa taata ica pacha'a nang tli. 17 Nama ta, 'I hnyirung, i ky i ca, khaahmuo a hu va ang,' naa ta. Palung phakhyi aa chiy li tlipa, ngiechi aa chiypa, dawchiepa, mingcuepa hne na thliehripa ta na awpa kha a pachang vaciy. 18 Cacuonakawta na hnyirung na riypata myi ta rue pata pathe sa ciepa siyy kha kama'a taata na calyi riypata ruena ica pi. Na thliehripa ta na awpa na nangzaana caa pahruv riypata pangruopa naa calyi riypa cuose, na hmung the na riypata na ming lie naa thuv riypa mingsiy naa calyi riypata ruena ica pi. 19 I duepa zaw ca sue phaw yi ang te i pasiypa-ya yi. Cacuonakawta temaa lawla na suena kha a ngiepachiy tie. 20 Naathlie tie! Ingchiypakaa lie a daa ang te i cakhaw nguoluo; i ryi kha thyi cate ingchiy ina pahaw cakieca na ingchung luo kha a zaa ngie'a ang te, nama hneta sa i ning hne aa, nama zaw kama hneta sa na ninghne ra aa. 21 Tena a hmungpa ca, tena hmung ang te a byithude cunglie i Paa hne maa tuhne pahaata kama byithude cunglie a tuhnena naw i pi aa. 22 Thlaapa ta khrihsaabuv tie'a luo a ripa kha naa a hnyipa bangkhuo ta naathlie mangyisue.