21
Cakhutaata vuoruo thaapa hne alyi thaapa kha i hmung, tahematapakieca vuoruo taapa hne alyi taapa ca vie yite riyliy ca aw va tli. Cakhutaacata khypuv pathepa, Jerusalem thaapa kha vuoruo lie Khazing'a taata a za cungpa kha i hmung, navaa a hnyi'a nangpa lesaanung a navaapa a taw riypata aa pangipa haata aa pangi. Byithude taata ueryi lesapa suokha i thyipa ca,
"Mang tie ung, Khazing ing ca
cawsaa hrawliena a aw.
Iema'a lie kha khy sa'a te,
ama Khazing ta a cuo aa.
Iema ca a cawsaa ta cuo'a yite,
Khazing ama hrahring kha
iema'a lie a aw aa.
Ama mingthliy kha hruvpa'a yite,
thiyna aw'a va tli,
Ngiechina hne caana hne
riethyi vuosuona zaw aw'a va tli.
Zaa aw taapa hmang ca ama vie diy tli," a ta.
Cakhutaata byithude cunglie a tupapaa ta, "Mang tie, hmang bangkhuo a thaapa ta i tue diy hing," ina ta. "Hingpa hing cape tie, tahematapakieca hingpa bie hing zangtluo aa tlapa hne a hmisipa tana a cuo," ina ta vie puo. Cakhutaacata, "A tlung mangtli! Kama ca Alfa hne Omega, a hruothuna hne a chuona tana i cuo. A tiy a hriepa tie kha hringna tiyhnaa taata tiy kha lasaw ta i pi'a yi, ina ta. Tena a hmungpa bangkhuo ca hingpa hmang zaw hing ru ta cu'a yite, kama ca ama Khazing ta cuo'a ang te iema ca i saata zaw ta ama cuo aa. Cuorasala a riechiepa, a zanglituv, a pyalyipa, lie a nawpa tie, aparuvsuena a tuepa tie, mingpali a thepa tie, kuvtuezuv abiepa tie, hne a hanghiepa tie bangkhuo awna hmang ca kemyiliy, yihning thiyna khatana a cuo.
Cakhutaata avuoming pasariy chung taata pakha ta a cuopa, a hnangcawcepa, puvtlung pasana suosariy hneta a bipa kuotung suosariy a hnyipa kha a vaw te, "A vaw tie, Tuvtaata napuvnung riypa lesaanung khana ica pahmung aa," ina ta. 10 Thlaapa ta bi ang te, avuoming cata a lesapa hne aa suosapa tluocung luo kha inaa chiy. Calieca vuoruo Khazing'a taata khypuv pathepa Jerusalem a za cung pakha ina pahmung. 11 Capa khypuv ca Khazing rungnaana ta bi te, jasper ama tapa alung sungnaapa haata khe te, krystal ama tapa thlaluo haata a pasing. 12 A lesapa hne aa suosapa khypuv cadungna piehu hnyi te thlake suohraa hlyihning a hnyi. Thlake zaw lieca avuoming pahraa hlyihning ama aw. Thlake zaw cunglie ca Israel ming phanghraa hlyihning ming kha a cape te, 13 capa thlake zaw ca ningchiy luo kuo ta suothung, chaluo kuo ta suothung, sungluo kuo ta suothung hne ningtla luo kuo ta suothung ta ama aw. 14 Khypuv cadungna piehu ca inghruo suohraa hlyihning hnyi te capa zaw cunglie ca Tuvtaata lucuotuv pahraa hlyihning ming kha aa cape.
15 Kama bie naa rihnetuv avuoming ca khypuv hne a thlake tie hne a piehu kha taa riypata taanapa siyy khuecahryi kha a hnyi. 16 Khypuv ca a tung hne a phyi aa khing diy. Avuoming cata a khuecahryi ta khypuv ca a taa ca, a tung, a phyi hne aa suonapa ca a khing diy yite, me thawkha zapangaanote 21:16 Gk Stadia thawhraahlyihning kaluo ta a cuo. 17 A piehu zaw kha a taa ca avuoming ta ama hmuopa cawsaa taana ta daw zakha sawliy suopaliy aa suo. 18 A piehu ca jasper lungvaa ta sa yite, khypuv ca thlaluo haata a pasingpa siyypathepa ta ama sa. 19 Khypuv cadungna piehu inghruo ca alung sungnaapa a phangphang ta ama pangi. A thabawce lieta jasper lungvaa, a paziypa ta safaiar lungvaa, a suothungna lieta agate lungvaa, a suopaliyna ta emerald lungvaa, 20 a suopangaana ta oniks lungvaa, a suocaruvna ta karnelian lungvaa, a suosariyna ta krisolite lungvaa, a suocarina ta beril lungvaa, a suocakyna ta topaz lungvaa, a suohraana ta khalseldon lungvaa, a hlyikhana ta jacinth lungvaa hne a hlyihningna ta amethist lungvaa ta a cuo. 21 Khypuv thlake suohraahlyihning ca pale lungvaa hlyihning ta cuote, thlake suokha cyicuo ca pale lungvaa suokha cie ta a cuo. Khypuv luopuvlepa ca siyypathepa ta tuepa cuote thlaluo haata a khe.
22 Khypuv chunglie ca biena-ing hmung va ang, tahematapakieca biena-ing ca A Lesyicepa Abyipa Khazing hne Tuvtaata khatana a cuo. 23 Khypuv ca a khe riypa ning hne thlaa zaw a hu vyi, tahematapakieca Khazing rungnaana kha a khena ta cuote, a myi-ing ca Tuvtaata khatana a cuo. 24 Mingphang bangkhuo ca a khena thue cata cakuona luopuv hmung'a yite chuelyi siepahruo tie zaw ta ca khypuv chung luo ca ama rungnaana kha ama'a vya ngiekhyi aa. 25 Khypuv thlake ca ningaw ta aa pahaw aa, tahematapakieca capa lieca zuo tapa aw'a vyi. 26 Cawsaa ta mingphang zaw rungnaana hne lesyina kha capa khypuv luo ca ama'a vya ngiekhyi aa. 27 Cuorasala a pathe lipa suokha hmuo capa khypuv luo ca a ngie khu'a vyi. Duvsamakhie aa chiypa hmang a tuepa tie hne a hanghiepa tie zaw a ngie khu'a vayi. Tuvtaata hringna caa-uv lie ming capepa tie dyina a ngie khu'a yi.