17
1 Cakhutaata kuotung suosariy a hnyipa avuoming pasariy chung taa pakha kha a vaw te, "A vaw la, tiy cunglie a tupa a lesyipa siyhrawnung ta a ang riypa bieripana na ica pahmung sa aa.
2 Alyi siepahruo tie ta ama hne aparuvsuena tue yite chuelyi lie khy a sapa tie ta hingpa nung aparuvsuena mingsuv kha ama pariy," ina ta.
3 Cacuonakaw ama ta thlaapa cahrana ta kama kha ruochung luo na sikhyi te, canung pakha ca chiesanapa ming ta a bipa, luv suosariy hne kiy suohraa a hnyipa, a sepa saahruo cunglie aa tupa kha i hmung.
4 Capa canung ca a medungpa hne a sehunglungpa caw kha a tue te siyy alung sungnaapa hne palelungvaa ta aa pangi. A kuv lie kha duvsamakhie aa chiypa hne a pathe lipa ta a bipa aparuvsuena a tuenapa siyy panuo kha aa hrie.
5 A puo lie aa capepa, bienupa a hnyipa a ming ca, "A lesyipa Babilon, chuelyi lie a awpa duvsamakhie aa chiypa hne siyhrawnung tie zaw nung," tapata a cuo.
6 Capa canung ca mingpathepa tie thiy hne Zingsuv cuota tehte a cuopa tie thiy a pariy pakha i hmung.
Capa nung ca i hmung tiyta, i nang ta a uo.
7 Cuorasala avuoming cata, "Khaapanakawma catluv nanaa na nang a uo? Canung nung hne ama a phyalepa a luv suosariy a hnyipa hne a kiy suohraa a hnyipa saahruo bienupa siyluo ca ica chang aa.
8 Na hmungpa saahruo ca a hluo ta za aw te, ata hing ca aw va tli. Dena a hnyi lipa khue chung taakhata kya pya'a te a ra aa. Chuelyi hruothu baataata hringna caa-uv chunglie ama ming cape lipa, chuelyi lie khy a sapa tie ta saahruo kha ama hmung tiyta ama nang a uo sa aa. Tahematapakieca a hluo ta za aw te, ata hing a aw li tli raalaa pata a vya aw pakhaa aa.
9 Hingpa kawlie hing singna hne pachangna aa hu: luv suosariy ca canungnung aa tunapa tluo suosariy ta a cuo; siepahruo pasariy zaw kha a cuo ra.
10 Capa siepahruo tie chung taacata papangaa ca ama thiy tli, pakha hring kalie te, a hrangpa pakha ca a vaw valie; aa vaw thue zaw ta cuo pachangta dyina a aw aa.
11 A hluo ta za aw te ata hing a aw li tlipa saahruo ca a pacarinapa a cuo raalaa pata siepahruo pasariy chunglie ta pakha ta cuote, rana luo a chiy riypatana a cuo.
12 Na hmungpa kiy suohraa ca uvpa ruo a hnyi li liepa siepahruo pahraa ta cuo yite, cuorasala saahruo hneta siymaluo pakha chung uv hne riypata siepahruo nawhnyina kha pipa ama cuo aa.
13 Iema ca saahruo'a luo ama cahrana hne ama nawhnyina kha pi riypata ama palung aa lusa.
14 Tuvtaata kha amaa du aa, cuorasala Tuvtaata tah a te'a yi. Tahematapakieca ama ca byi zaw hrawlie ta Byi hne siepahruo zaw hrawlie ta Siepahruo tana a cuo. Ama'a lie a awpa tie ca kupa tie, a tlawpa tie hne zangtluo aa tlapa tie tana ama cuo," a ta.
15 Cakhutaacata, "Siyhrawnung aa tunapa na hmungpa tiy ca ruo ting taata ryi ting a cyipa mingphang ting tana ama cuo.
16 Na hmungpa kiy suohraa tie hne saahruo khata siyhrawnung kha huesa'a yite, ama kha para'a yite a thliehripa ta ama chi aa. A saa kha a ce chuv'a yite myi ta ama rue aa.
17 Tahematapakieca Khazing ta a bie ripa a tling hluo li, iema ama uvpa ruo kha saahruo'a luo pi pata ama aa tingnapa re ama hrie khing riypa kha ama palung chunglie a chi.
18 Na hmungpa canungnung hing chuelyi siepahruo tie a uvtuv khypuv tana a cuo," ina ta.