16
1 Biena-ing taata ueryi lesapa suokha ta avuoming pasariy kha, "Vaa ungla Khazing hihaana kuotung suosariy kha alyi cung luo va lyi tie ung," a tapa yi kha i thyi.
2 Avuoming a pakhanapa ta a kuotung kha riyliy luo a bungh ca saahruo a hnangna a hnyipa hne ama kuvtuezuv abiepa tie cunglie kha a pahnuosapa hne a pasasapa hmaa a kya aw.
3 A pahningnapa avuoming ta a kuotung kha riyliy luo a bungh. Tiy ca a thiypa riy chung taata a pyapa thiy haata a li te riyliy chunglie a awpa a hringpa bangkhuo kha ama thiy diy.
4 A pathungnapa avuoming ta a kuotung kha cavaa hne acaa luo kha a bungh ca thiy ta amaa li.
5 Cakhutaata tiy a uvtuv avuoming ta,
"Hluo ning taata za aw te atalie zaw a awpa A pathepa,
nama ca aa dangpa tana na cuo,
tahematapakieca hingpa hmang zaw cunglie hing nama na bie a chi ciy
6 Iema ta mingpathepa tie hne profet tie thiy kha ama za palang nakawta,
ama dang riypata thiy kha na pi yi.
Caca iema amaa phuvpa tana a cuo.
7 Cakhutaata bienatluophie ta a paliepa kha thyi ang te,
"A cuo, A Lesyicepa Abyipa Khazing,
na biechina ca a hmuo te aa dang," a ta.
8 A papaliynapa avuoming ta a kuotung kha ning cungluo bungh te, ning ca cawsaa kha myi haata kuona naw pi pata a cuo.
9 Iema ca a lingsuesaapa myi ta kuo yite, cuorasala puvtlung pasana cunglie naw a hnyituv Khazing ming kha chie ama sa. A ngiepachiy pata Khazing ming kha pathuo sa vayi.
10 A papangaanapa avuoming ta a kuotung kha saahruo byithude cunglie a bungh. Saahruo uvna chunglie kha khyzingna a tlung. Cawsaa ca ama palyi kha a ce yite,
11 ama angpa pasana hne hmaa kawlieta Khazing kha chie ama sa. Ama tuepa hmangpha lipa kha a ngiepachiy vayi.
12 A pacaruvnapa avuoming ta a kuotung kha Zufrates cavaapuv cunglie a bungh. Ningchiy luo taata siepahruo tie cuota luo pa-aw riypata cavaa ca a ky.
13 Cakhutaata riyhre pakaa taata cuose, saahruo pakaa taata cuose, profetpakhipa pakaa taata cuose, ca-uv a lupa thlaapa pyalyipa pathung amaa vawpa kha i hmung.
14 Iema ca khuevuo thlaapa ta ama cuo, kharuehaa hmang kha tue yite, A Lesyicepa Khazing rietuvnapa ning thue huo cuota pahmya riypa yita ruo ting siepahruo tie'a luo kha ama si.
15 ("Mang tie ung, a paruvpa haatana i vaw aa! A thliehripa ta aa khie li riypa hne nangzaahmiechi pata a aw li riypata a hmung li pata aa tuepa cawsie a mangchiypa ca thluechiypa tana a cuo.")
16 Cakhutaata khuevuo thlaapa tie cata siepahruo tie kha Hebru ryi ta Armageddon ama tapa hmang lie ama pahmya.
17 A pasariynapa avuoming ta a kuotung kha thliy lieta a bungh. Ueryi lesapa kha biena-ing chung byithude taata kya paring te, "Aa lang tli," a ta.
18 Cakhutaacata thinghlaa aa cakang, khalung aa thy, paci tla te aling khuopuv ta aa siy. Chuelyi lie cawsaa ama aw baataata cahaapa aling ca a siy buo vyi, aling a siy buopa hrawlie a ruvcepa tana a cuo.
19 Khypuv lesyipa ca chethung ta a chechi te, ruo ting lie khypuv zaw ca ama ra. Khazing ta a lesyipa Babilon kha maw li pata a hihaana mingsuv panuo kha a padang sa.
20 Parala bangkhuo ca a ruo diy yite, tluo zaw kha hmung khu aw va tli yi.
21 Ari pangkalupa, paw zakhanote 16:21 Gk Talent suokha tluv aa riypa te aa riypa kha avuo taata cawsaa zaw cungluo ca a za tla. Ciy aa chiy hringhruopa, ari ta puv a patlung sana kawlie cata cawsaa ta Khazing kha chie ama sa.