7
1 Uvnu hne sieta zaw,note 7:1 Gk Uvnu zaw phungbie a pachangpa tie'a lieta phungbie taca cawsaa pakha kha a hring chung dyina a ciypakang khu tapata i ripa kha pachang va ung cama?
2 Cahaa cata navaa a hnyipa canung ca a navaapa a hring chung dyi phungbie ta ciypakang khu te, a navaapa a thiy kieca a navaapa kawlieta phungbie taata hya a zang tapa kha ma pachang.
3 Cacuonakawta a navaapa a hring thluo pata capaa hrang hne a awhne kieca nungvaathingsuena a tuepa ta a cuo. Cuorasala a navaapa a thiy kieca capa phungbie taacata hya a zangpa cuote, navaa hrang a hnyi zaw ta nungvaathingsuena a tuepa cuo vyi.
4 Cahaa cata, uv zaw nu zaw, niema ca Zingsuv pangpa thueta phungbie lie a thiypa ta cuo ung cate, Khazing cuota thyi nama pathyi riypata thiyna taata caa pathu pakhaapapaa huopa tana nama cuo.
5 Thiysaa ta ma aw ning ca suekhingna kha phungbie thueta kya thu te thiyna cuota thyi pathyi riypata ma pangpa lie kha re a hrie.
6 Cuorasala ata hing ca suena taata pachepa cuopa te, phungbie sii cuona taata a thiypa ma cuo. Cacuonakaw kiema ca phunghlungpa, caa ta capepa phungbie rawlie sii cuo li'apa pata Thlaapa ta hringna thaapa chunglie khana ma hring hriy aa.
7 Cacuokie tuokhaama ma ta aa? Phungbie ca a sue ma? Sue changchiy vyi. Cuorasala phungbie a aw li kieca, suena kha pachang'a va ang. Phungbie ta, "Malie hmang kha hie va tlie kha," a ta li kieca hietliena kha khaapama tapa pachang'a va ang.
8 Cuorasala suena ta nawbie kha hmuo pata i chunglie kha hietliena phangting a papya sa. Phungbie a aw li kieca suena ca a thiy.
9 Ahluo ta ca kama hing phungbie li pata za hring ang te cuorasala nawbie aa vaw ca suena ca kya thu te i thiy.
10 Hringna bie malie a kuopa nawbie ca i cuota thiyna ta a cuo.
11 Tahematapakieca suena ta nawbie kha a patuv pata kama kha na dung te ina thie.
12 Cacuonakawta phungbie ca a pathe, nawbie zaw a pathe, a dang te a pha.
13 Cacuokie a phapa ma i cuota thiyna a vya chiykhyi? Cuo changchiy vyi. Thiyna a vya chiykhyituv ca suena tana a cuo. Suena ca suena a cuopa kha a luo khuna riypata phana kha hmuo te i cunglie thiyna kha a patlung sa. Cacuonakawta nawbie thue khata suena a sue zya kha aa luo hryly.
14 Phungbie ca thlaapa hmang ta a cuopa kha ma pachang; cuorasala kama ca saapa cuo ang te suena chung luo sii cuo riypata zaapa tana i cuo.
15 I tuepa hing khaapama tapa pachang va ang. Tahematapakieca i khingpa kha tue lipa angta i huepa hmang tuv kha i tue.
16 I khing lipa kha i tue pakieca, phungbie a pha tapata i palung a tling tanapa tana a cuo.
17 Cuorasala khapa hmang a tuepa kha kama ta cuo va ang, i chunglie a awpa suena tana a cuo.
18 Tahematapakieca i saapa lie, i chunglie ta hmang phapa suokha hmuo aw vyi tapa kha i pachang. Hmang phapa khingna kha i hnyi, cuorasala tue khu va ang.
19 Tahematapakieca kama i khingpa hmangphapa kha tue khu va ang, cuorasala i khing lipa pha lina khana i tue.
20 I khing lipa kha i tue pata a cuo kieca, capa hmang a tuepa ca kama cuo va ang, cuorasala i chunglie a awpa suena khatana a cuo.
21 Cacuonakaw hmang awtuv zya i hmungpa ca, hmang phapa i tue khing tiyta hmang pha lipa kha kama'a lieta a aw.
22 Tahematapakieca i hringna ta Khazing phungbie kha a khing,
23 cuorasala i chunglie phungbie hrangpa a za aw rapa kha pachang ang te, capa phungbie ca i palung ta a pha a tapa phungbie a dutuv khata a cuo. Ca phung cata i chunglie a awpa suena sii khata ina tue.
24 Cawsaa palung riethyipa tana i cuo! Hingpa saapa thiyna taahingta ahungma naa khuo aa?
25 Abyipa Zingsuv Khrih thueta naa khuotuv Khazing ca pathuosa pata cuo mangsue!
Cacuonakawta, i pathiypalung ta ca Khazing phungbie kha ziy ang te, cuorasala i saapa ta ca suena phungbie kha i ziy.