6
1 A cuo kie tuokhaatama ma ta aa? Khazing vi ca a cha hryly se tapata suena ca ma tue hryly'a maw?
2 Tue changchiy'a va puv. Suena lie ma thiy tli pata tuokhaatama a chunglie ca ma aw pari the aa?
3 Khrih Zingsuv chunglie tiy a nawpa kiema bangkhuo ca a thiyna chunglie zaw tiy maa naw tapa kha pachang va ung ca maw?
4 Cacuonakawta tiy maa naw ning khata ama hne paby pakhawpa cuo pate a thiyna lieta ma thiy ra tli; cahaa cata Khrih ca Paa rungnaana ta a pathu pakhaa pahaata kiema zaw hringna thaapa ta ma hring ra aa.
5 A thiyna lie ama hne ma thiypakhaw kieca hringna luo pathu pakhaa a cuona lie kha kiema zaw pathu pakhaa pakhawpa ma cuo ra aa.
6 Ma pangpa suena kha para riypata ma cawsaa hlungpa kha ama hneta vieluo lie khepuo pata a cuo tli tapa kha ma pachang. Caca suena sii ta ma cuo li tlina riypatana a cuo.
7 Tahematapakieca a thiypa ca suena taata hya a zangpa tana a cuo.
8 Cuorasala Khrih hneta ma thiyhne kieca ama hneta ma hring hne aa tapa kha ma zang.
9 Thiyna taata pathu pakhaa pata a cuopa Khrih ca thiypakhaa li tli pata thiyna ta uv'a va tli tapa kha ma pachang.
10 Suena lieca yikha ta ade pata thiy te, a ta a hringna hing ca Khazing chunglie tana a hring.
11 Cacuonakawta niema zaw ta, suena lieca thiy pate Khazing chunglie ca Khrih Zingsuv thueta ma hring tapata na maa rue riypatana a cuo.
12 Cacuonakawta saapa khingna kha nama ziy li riypata a thiy thepa nama pangpa ca suena ta uv kha tie se.
13 Nama pangpa a khaapa khahmuo a pha lipa suena tuena riypata pi kha ung. Cuorasala thiyna taata hringna luo pathu pakhaapa haata nama pangpa a khaapa kha hmuo Khazing'a luo kha aa dangpa hmang tuena riypata pi tie ung.
14 Tahematapakieca niema ca suena rawlie hring li pata vihnyina rawlie nama hring nakawta suena ta ca uv kha yi se.
15 Cacuokie tuokhaata? Suena rawlie aw li pata vihnyina lie ma aw nakawta suena ca ma tue'a ma? Tue changchiy'a va puv!
16 Niema ca pakhakha'a luo kha ri a ngiepa sii haata namaa pi kieca, suena ta a chiykhyipa thiyna lie a cuo zaw, ri-angiena ta a chiykhyipa adangna lie a cuo zaw namaa pipapaa sii cata nama cuopa kha pachang va ung cama?
17 Cuorasala Khazing ca a law pata cuo mangsue. Tahematapakieca niema ca suena sii nama za cuo raalaa pata ata hing ca pacuvna nama hmungpa chung taata biehmisipa kha pathiypalung hmisi ta nama ziy mangtli.
18 Suena taata hya pazangpa cuo ung cate, adangna sii ta nama cuo tli.
19 Nama thyi khu the li nakawta chuelyi bie ri ta i ri pata a cuo. Ahluo taca nama pangpa kha a pathe lipa hmang tuena luo hne a le vie hrylypa zyachiena luo namaa zaa pi. Cuorasala ata hing ca nama pangpa kha pathena luo caa chiykhyi riypa yi aa dangpa hmang tuena ta a pi tie ung.
20 Suena sii ta nama cuo ning kha adangna hne a patuv pata hya a zangpa nama cuo.
21 Cacuokie atalie nama nang a zaakhyipa hing ta li pata khaapa thlahnena ma nama hmung? Capa hmang zaw a chuona ca thiyna tana a cuo.
22 Cuorasala ata hing suena taata hya pazangpa cuo ung cate Khazing sii ta nama cuo mangtli. Thlahnena nama hmungpa ca pathesana cuote a chuona ca chuozaa hringna ta a cuo.
23 Tahematapakieca suena muo ca thiyna cuote, cuorasala Khazing lasaw ca ma Byipaapa Khrih Zingsuv chunglie chuozaa hringna tana a cuo.