4
Cacuokieca thiysaa luo hne a patuv pata malie a pathlatuv Abraham hing thiysaa luo hne aa patuv pata khaapa thlahnena ma a hmung? Tahematapakieca, Abraham hing hriena thue tana duopacupa a cuo tapata a cuo kieca, hruotle khyi riypa chekha a hnyi aa. Cuorasala Khazing hmiekunglieca hruotle khyi riypa hnyi vyi. Caapathepa ta khaapa a ta ma? "Abraham ta Khazing kha zang te, capa a zangna thue cata Khazing ta ama kha aa dangpa ta a cuhluo," a ta. Re a hriepa pakha ca a ninghlue kha lawmuo tapa pata cuo vyi. A hrie muo tana a cuo. Cuorasala tuena ta cuo li pata cawsaa pha lipa tie zaw amaa dang a tatuv Khazing a zangpa ca, a zangna kha adangna ta a cuhluopa. Cacuonakawta tuena a te li pata Khazing ta aa dangpa ta a cuhluopapaa thluechiypa a cuona zya David ta a ripa ca:
Khazing ta a pha lina a ngiethe te,
a suena a buvkhungpapaa ca thluechiypa tana a cuo.
Khazing ta a suenapa sue ta a ripa lipapaa ca thluechiypa tana a cuo," a ta.
David ta a ripa thluechiy ca vangdaw tepa tie cuo dyi tama a cuo, vangdaw te lipa tie cuo zaw ta a cuo ra ma? Ma ripa ca, "Abraham zangna ca Khazing ta adangna ta a cuhluopa," tapata a cuo. 10 Tuokhaatama cuhluopa pata a cuo? Vangdaw aa te hluo tama aa te khu taata? Vangdaw aa te khutaa cuo vyi, aa te hluo tana a cuo. 11 Abraham ta vangdaw tepa cuona paluosanapa, a dangpa cuona ca vangdaw aa te hluo baataa khata zangna ta a cuhluo mangtli. Caca ama kha vangdaw a te li pata a zangpa tie paa ta pacuo sa riypa hne iema zaw bangkhuo kha a dangna pi riypata a cuo. 12 Cahaa cata ama ca vangdaw a tepa tie paa ta zaw a cuo ngiethie, iema ca vangdaw amaa tepa dyi cuo li pata mingpa Abraham vangdaw aa te hluo ta a zangna hringzya haakhata ama hring ra nakawta a cuo.
13 Tahematapakieca chuelyi na na cu aa tapa biekuo ca Abraham hne a samingsahlaa tie ta phungbie ziyna taata ama hmungpa cuo vyi, cuorasala zangna ta hmungpa a dangna thue tana a cuo. 14 Phungbie a ziypa tie na rucutuv a cuo'a yi tapa a cuo kieca zangna ca khaapahmuo ta cuo li'a pata biekuona zaw a hrihripa tana a cuo aa. 15 Tahematapakieca phungbie ta ca Khazing hihaana kha chiykhyi te, cuorasala phungbie aw lina lieca phungbie na ama para tapa zaw aw vyi.
16 Cacuonakawta biekuona ca zangna lieta hruo a bangpa cuote, a vihnyina thueta Abraham samingsahlaa tie'a lieta biekuopa tana a cuo. Phungbie a ziypa tie'a lie dyi cuo li pata Abraham zangna haata a zangpa tie cuo zaw ta a cuo. 17 Tahematapakieca Caapathepa ta, "Kama na nama ca mingphang hluvpuv paa ta caa tue ang," a tapa haata, ama ca kiema bangkhuo paa tana a cuo. Ama ca a thiypa tie kha hringna pi yite a aw lipa zaw a pa-aw satuv, ama hrahring ta a zangpa Khazing hmie lieta ma paa tana a cuo. 18 "Na samingsahlaa ca ama hluv hringhruo aa," tapata ri ciepa haata a ruechuona khaahmuo a aw lipa chung taa khata, "mingphang hluvpuv paa tana i cuo aa," tapa kha a zang. 19 Ama ca kung zakha a ta tli. Cuorasala a thiy ciepa haata a ta tlipa a pangpa kha a rue tiyta cuose, Sarah a cingna kaw kha a rue tiyta cuose, a zangna cung vie vyi. 20 Khazing biekuona kawlie kha zang lina ta ama kha cahang khu vyi. Cuorasala Khazing kha pathuosa te zangna lie kha lethaw te a cahra. 21 Khazing ta biekuo a pi ciepa ca a patlung hrahring aa tapa kha a zang karuv. 22 Cacuonakawta a zangna kha adangna ta a cuhluopa. 23 "Aa dangpa tana a cuhluo," tapa hingpa bie hing ama huo selaw ta capepa cuo vyi, 24 kiema zaw bangkhuo cuota capepa a cuo ra. Ma byipaapa Zingsuv thiyna taata a pathu tuvpa a zangpa kiema zaw cuota a cuo ra aa. 25 Ama ca ma sue nakawta thiyna luo pachiy sapa cuote Khazing hne maa rena riypata pathu pakhaapa a cuo.