15
Zangna lie a cahrapa kiema ta zangna a cawpa tie thaazuo dyana kha ma dyichaw a hu. Kiema palungtluona kha ma huv riypa cuo vyi. Kiema pakha cyicuo hingta ma ingpaa tie amaa sathaw riypa hne ama phana cuota ama palung ma patluo riypa yita a cuo. Caapathepa lie, "Nama caa ripachiepa zaw bie pha lipa ca kama cungliena a tla," tapata a cape pahaata," Khrih ca ama palungtluona kha tue vyi. Tahematapakieca Caapathepa ta malie a pipa palung pasiyna hne palung cahrana thueta a nguopuona ma hnyi the riypata, hluo ningta ama za capepa bangkhuo ca kiema pacuvna riypatana a cuo. 5-6 Niema ta palung a lusa pata ma Byipaapa Zingsuv Khrih a Paa hne Khazing kha nama pathuosa pakhaw the riypata, palung pasiyna hne palung cahrana Khazing ta Khrih Zingsuv kha a mangpuo pata pakha hne pakha palung a lusa pata nama aw the riypata caa bya thi yi se.
Khrih ta aca cuhluo pahaayita, Khazing ta rungnaana a hmung riypata pakha hne pakha kha a cuhluo tie ung. Ica chang khingpa yi ca, Khrih ca Khazing biehmisipa cuo khata vangdaw tepa tie changtaapa ta a za cuo. Caca mingpa tie'a luo a za pipa yi biekuona pacu sa riypa hne Jentail ming ta Khazing kha cawsaa cunglie duena a hnyina kawta ama pathuosa na riypatana a cuo. Caapathepa ta,
"Cacuonakaw, kama ta nama kha
Jentail ming hrawlie caa law'a ang te,
na ming kha hlaa ta ica pathuosa aa";
10 Cakhutaa ri pakhaa te,
"Jentail ming zaw
Khazing cawsaa zaw hne khata
a law pakhaw tie ung";
11 Cakhutaa,
Niema Jentail ming bangkhuo,
Khazing ca pathuosa tie ungla,
Cawsaa bangkhuo ta
ama ca pathuosa yi se";
12 Isaiah ta ripakhaa te,
"Jesse ciypathla pakha a vaw'a te,
Jentail ming uvtuv ta a cuo aa;
Iema Jentail ming ta ama cunglie kha
a ruechuona ama hnyi aa," a ta.
13 Thlaapa Pathe cahrana chunglie ta a ruechuona nama hnyi na riypata, anguopuona Khazing ta zangna chunglie palungtluona hne diena ta ca pabi yi se.
14 Uvnu hne sieta zaw,note 15:14 Gk uvnu zaw niema ca cawsaa phasapa cuo ung cate, pachangna hne nama bi thluo nakawta pakha hne pakha namaa cawpa thesa aa tapata kama hrahring ta ica zang yi. 15 A cuo raalaa pata hing caa i vya capepa chekha lie hing niema pathyi sa pakhaa riypata riepha ciemuo pata i vya cape. Tahematapakieca Khazing ta ina pipa vihnyina thueta, 16 Khazing thuophaabie hne aa patuv pata tluobyi rehriena lie kha Jentail ming'a luo Khrih Zingsuv rehrietuv i cuo riypatana a cuo. Caca, Jentail ming kha Khazing hmielie cuhluo aa tlapa hriykhungrina haata ama cuo riypa hne Thlaapa Pathe ta a pathe sapa ama cuona riy'a pata a cuo. 17 Cakhutaata, Khrih Zingsuv hne maa patuvna thueta, Khazing re i hriepa kawlie hing a pale riypa i hnyi. 18 Tahematapakieca, Jentail ming'a taata pa-uvsathyina hmung riypata Khrih ta kama na hmuo te a patlungpa re kaw hing ri li pata aw khu'a va ang. Hingpa a tuepa hing bie ta cuose, tuena ta cuose, 19 pahmungsana hne kharuehaa hmang cahrana ta cuose, Khazing Thlaapanote 15:19 Hluo vie caa-uv lieca Thlaapa Thlaapa Pathe a ta. cahrana ta cuose, a tuepa tana a cuo. Cacuonakawta Jerusalem taata patha pata Illyrikum te ta Khrih thuophaabie ca tluotlingsa pata i phu riypatana a cuo. 20 Cahaa cata i saduvthie ta a cuo paripa ca Khrih ama pachang buo lina lie thuophaabie phu kha a cuo, tahematapakieca malie ta a hruo ama pathu ciena lieta i sa chiy li riypa khata a cuo. 21 Caapathepa ta,
Ama kaw chang buo lipa tie khata
hmung'a yite,
ama kaw a thyi buo lipa tie ta
ama pachang aa," a ta.
22 Niema'a luo ica vya tlaw riypa yita yi hluvpuv naa pakhuopa ca ama hing tana a cuo. 23 Cuorasala, ata hing ca hingpa ruo lie hing kama cuota rehriena riypa hmang a aw li tli nakawta hne kung syipuv taakhata niema'a luo vya tlaw riypa kha i khingpa a cuo nakawta, 24 Spain luo i vya tlawpuo pata caa vya tawpaa yi ang sala, niema hne cuokha chung aa nuosa pata maa khe khutaa ungta, capa luo si riypa kha naa bya ungla tapa i khing. 25 Cadyiseca, ata hing ca Jerusalem lie mingpathepa tie cuota rehrie riypata i si. 26 Tahematapakieca Masidonia ruo hne Akhaia ruo lie a awpa tie ta Jerusalem lie a awpa mingpathepa tie hraw taata siypasa tie'a luo palung thusa pata ama pipa hmang na a aw. 27 Capa hmang ama tuepa ca ama palung aa tluokhyi sa, hmisi ta ripa kieca ama tue riypa hrahring ta a cuo; tahematapakieca, Jentail ming ta Judah ming thlaapa luo thluechiy kha amaa hraw kieca, Judah ming zaw ta chuelyi chechiy luo thluechiy kha Jentail ming'a taata amaa hraw ra riypata a cuo. 28 Cacuonakawta hingpa re hing patlung'a ang te, i ri khingpa ca, iema cuota ama khyipa tuokaa bangkhuo a tlingsa pata iema kuv cung luo i pi khu taayita, Spain luo i tlawpuo pata ica vya tlawpaale'a yi. 29 Ica vya tlaw tiy yi ta, Khrih thluechiy kha a tlingsa pata ica vya phya'a yi tapa kha i pachang.
30 Uvnu hne sieta zaw, Abyipa Zingsuv Khrih hne Thlaapa duena ta icaa nuepa yi ca, Kama cuo hingta Khazing'a luo kha thlaa na chuokhyi ung. 31 Judea ruo lie a awpa zanglituv tie kuv taata hya i zang khuna riypa hne Jerusalem lie i rehrie riypa hing mingpathepa tie cuota cuhluo tluo a cuo riypata thlaa chuo tie ung. 32 Cahaa cata, Khazing khingna a cuo pata a cuo kieca palungtluona hne niema'a luo vya chiy pata niema hrawlie thaazuo thaapa i lana ta a cuo aa. 33 Diena Khazing ca niema bangkhuo'a lie aw mangsue. Amen.